كليەنتتەر بولىنىسىنە ۇڭىلسەك, جەكە تۇلعالاردىڭ سالىمدارىنداعى قاراجاتتىڭ باسىم بولىگى – شامامەن 26 ترلن تەڭگەنى (-0,8%) قۇراپ وتىر. ال بانكتىك ەمەس زاڭدى تۇلعالارعا تيەسىلى ۇلەس 20,2 ترلن تەڭگەگە (-7,3%) تەڭ. وسى ورايدا «BCC Invest» بروكەرلىك كومپانياسىنىڭ ساراپشىلارى وزدەرىنىڭ ەكونوميكالىق شولۋىندا ەل ازاماتتارى ءۇشىن جيناقتاردى تەك دەپوزيتتە ساقتاماي, وبليگاتسيالارعا سالۋ تيىمدىرەك ەكەنىن العا تارتادى. مامانداردىڭ پايىمىنشا, تەڭگەمەن جانە ۆاليۋتامەن نومينيرلەنگەن وبليگاتسيالار بويىنشا پايىزدىق مولشەرلەمەلەر بۇگىندە دەپوزيتتىك مولشەرلەمەدەن جوعارى بولىپ وتىر.
2026 جىلى جيناقتى قاي ۆاليۋتادا ساقتاعان ءتيىمدى؟
ساراپشىلاردىڭ ايتۋىنشا, 2025 جىلدىڭ ءۇشىنشى توقسانىنىڭ سوڭىندا مەرزىمسىز دەپوزيتتەر بويىنشا پايىزدىق مولشەرلەمەلەر ونىڭ مەرزىمىنە قاراي 15% دەڭگەيىندە قالىپتاسقان. ال مەرزىمدى جانە جيناق دەپوزيتتەرىنە كەلسەك, تولىقتىرۋ قۇقىعىنسىز سالىمدار بويىنشا مولشەرلەمە 10,5-18,1% ارالىعىن, ال تولىقتىرۋ مۇمكىندىگى قاراستىرىلعان جيناقتار بويىنشا 11,8-17,6%-دى قۇراعان.
«تەك ساقتاپ قانا قويماي, سونىمەن قاتار كوبىرەك يكەمدىلىك پەن الەۋەتتى كىرىستىلىك العىسى كەلەتىن ينۆەستور ءۇشىن وبليگاتسيالار تۇرىندەگى بالامالار كوبىنەسە سەنىمدىرەك كورىنەدى», دەلىنگەن BCC Invest شولۋىندا.
KASE-تەگى كورپوراتيۆتىك وبليگاتسيالاردىڭ كىرىستىلىگى تەڭگەمەن جىلدىق 13,61-25%, ال دوللارمەن 4,5-10% ارالىعىندا قۇبىلىپ تۇر. باستاپقى نارىقتاعى وبليگاتسيالاردىڭ باسىم بولىگى ۇسىناتىن تابىس مولشەرلەمەسى ءداستۇرلى دەپوزيتتىك ستاۆكالاردان الدەقايدا جوعارى. بۇل ءۇردىس, اسىرەسە, جوعارى تابىستى شىعارىلىمدار سەگمەنتىندە ايقىن بايقالادى. ساراپشىلاردىڭ پايىمىنشا, ەگەر بانكتەر ناقتى كىرىس مولشەرلەمەسىن بەكىتسە, وبليگاتسيالار ينۆەستورعا مەرزىمىنە قاراي قوسىمشا سىيلىقاقى الۋعا جول اشادى.
سونىمەن قاتار ماماندار دەپوزيتتەردىڭ تيىمدىلىگى قاراجاتتى پايدالانۋ مۇمكىندىگىنە تىكەلەي بايلانىستى ەكەنىن العا تارتادى. ماسەلەن, پايىزى جوعارى جيناق دەپوزيتتەرى سالىمدى مەرزىمىنەن بۇرىن الۋعا شەكتەۋ قويادى, ءارى بۇل جاعدايدا كليەنت جيناقتالعان سىياقىسىنان ايرىلىپ قالۋى مۇمكىن. ال وبليگاتسيالار نارىقتاعى يكەمدىلىكتى ساقتاي وتىرىپ, قۇندى قاعازدى ساتۋ نەمەسە وتەۋ ارقىلى قارجىنى ەرتە شىعارىپ الۋعا مۇمكىندىك بەرەدى. BCC Invest ساراپشىلارىنىڭ پىكىرىنشە, وبليگاتسيالاردىڭ تاعى ءبىر ارتىقشىلىعى – تاۋەكەلدەردى ءارتاراپتاندىرۋ الەۋەتىندە. ينۆەستور ءوز پورتفەلىن ءتۇرلى ەميتەنتتەر مەن مەرزىمدەر اراسىندا ءبولۋ ارقىلى قارجىلىق قاۋىپسىزدىگىن نىعايتا الادى.
بۇدان بولەك, ەلىمىزدەگى ۆاليۋتالىق دەپوزيتتەردىڭ كىرىستىلىگى, ادەتتە, 1%-دان اسپايدى. ال دوللارلىق وبليگاتسيالار جىلدىق 10%-عا دەيىن تابىس ۇسىنا الادى. وسىعان بايلانىستى ساراپشىلار ۆاليۋتالىق دەپوزيتتى تابىس قۇرالى ەمەس, تەك «ۆاليۋتالىق سەيف» رەتىندە قاراستىرۋدى ۇسىنادى.
