«ەڭبەك ادامى – ەكونوميكانىڭ قۇرالى ەمەس, مەملەكەتتىڭ باستى قۇندىلىعى. جاڭا كونستيتۋتسيا جوباسىنىڭ نەگىزگى يدەياسى – مەملەكەت ءۇشىن ەڭ قىمبات نارسە ءوندىرىس كولەمى نەمەسە پايدا ەمەس, ادامنىڭ ءوزى. جوبادا اركىمنىڭ: ەڭبەك ەتۋگە, قاۋىپسىز جاعدايدا جۇمىس ىستەۋگە, ەڭبەگى ءۇشىن كەمسىتۋسىز ءادىل اقى الۋعا قۇقىعى كونستيتۋتسيالىق دەڭگەيدە بەكىتىلەدى», دەدى ول ءوز سوزىندە.
ماكسيم روجيننىڭ ايتۋىنشا, جاڭا اتا زاڭنىڭ جوباسىندا ەڭبەك سالاسىنا تىكەلەي قاتىستى بىرقاتار ماڭىزدى جاڭاشىلدىقتار قاراستىرىلعان. سونىڭ ىشىندە مەملەكەتتىڭ ەڭبەككە قۇقىقتى كونستيتۋتسيالىق دەڭگەيدە بەكىتۋى ەرەكشە ماڭىزعا يە. سونداي-اق قاۋىپسىزدىك پەن گيگيەنا تالاپتارىنا ساي ەڭبەك جاعدايلارىنا قۇقىقتى زاڭ جۇزىندە ايقىنداۋ كوزدەلگەن. بۇل نورمالار جۇمىس بارىسىندا تۋىنداۋى مۇمكىن كاسىبي اۋرۋلاردىڭ الدىن الۋعا, وندىرىستىك جاراقاتتانۋدى ازايتۋعا, سونداي-اق ازاماتتاردىڭ ەڭبەككە قابىلەتتىلىگى مەن ءومىر ساپاسىن ساقتاۋعا باعىتتالعان.
«مۇنداي نورمالار ەڭبەك قاۋىپسىزدىگىنە قاتىستى جاۋاپكەرشىلىك مىندەتىن – مەملەكەت پەن جۇمىس بەرۋشىنىڭ كونستيتۋتسيالىق مىندەتى دەڭگەيىنە كوتەرەدى. اسىرەسە نەگىزىنەن جالدامالى جۇمىسكەرلەردەن تۇراتىن ءالسىز سالالاردى رەتتەۋدىڭ ناقتى تەتىگىن قالىپتاستىرادى», دەپ اتاپ ءوتتى ءماجىلىس دەپۋتاتى.
ادال ەڭبەك ءۇشىن ءادىل سىياقى الۋ قۇقىعىنىڭ الەۋمەتتىك ماڭىزى زور. بۇل نورما ازاماتتاردىڭ ەڭبەگى كاسىبي ولشەمدەرگە ساي ءادىل باعالاناتىنىنا كەپىلدىك بەرەدى. روجيننىڭ ايتۋىنشا, قاراپايىم ازاماتتار ءۇشىن بۇل تۇراقتى جۇمىسپەن قامتىلۋ, قاۋىپسىز ەڭبەك جاعدايلارى جانە ەڭبەگى ءۇشىن ءادىل اقى الۋعا دەگەن سەنىمنىڭ نىعايۋىن بىلدىرەدى.
ايتا كەتەيىك, بۇگىن, 7 اقپاندا قازاقستاندا كونستيتۋتسيالىق رەفورما جونىندەگى كوميسسيانىڭ كەزەكتى وتىرىسىء وتىپ جاتىر. وتىرىس بارىسىندا جاڭا كونستيتۋتسيانىڭ جوباسىنا تەڭگەنى ۇلتتىق ۆاليۋتا رەتىندە بەكىتەتىن نورما ەنگىزىلگەنى ايتىلدى.
