ول ءسوز باسىندا كوميسسيا مۇشەلەرىنە كەلىسۋ, تالقىلاۋ جانە قىزۋ پىكىرتالاستاردىڭ كۇردەلىلىگىنە قاراماستان, اشىقتىق پەن سىندارلىلىق ۇستانعانى ءۇشىن العىسىن ءبىلدىردى.
«زاڭگەر ارىپتەستەرىمە ازاماتتىق قوعامنىڭ ۇسىنىستارىنا ناقتى تۇجىرىم تاپقاندارى ءۇشىن العىس ايتقىم كەلەدى», دەدى قارلىعاش جامانقۇلوۆا.
ادام قۇقىقتارىن قورعاۋ كەپىلدىكتەرىن كەڭەيتۋ ماسەلەسىنە توقتالا وتىرىپ, مەملەكەتتىك ورگاندار قىزمەت بابىنا قاراي كۇن سايىن ادامداردىڭ تاعدىرىمەن بايلانىستا بولاتىنىن اتاپ ءوتتى.
جاڭا كونستيتۋتسيادا تەڭگەنى ۇلتتىق ۆاليۋتا رەتىندە بەكىتۋ ۇسىنىلدى
اتاپ ايتقاندا, مەملەكەتتىك شەشىمدەر – رۇقساتتار, تىيىمدار نەمەسە تەكسەرۋلەر قاراپايىم ادامنىڭ جۇمىس ىستەۋ, وقۋ, ەمدەلۋ جانە ءوز مۇلكىن قورعاۋ مۇمكىندىگىن انىقتايدى.
قارلىعاش جامانقۇلوۆانىڭ پىكىرىنشە, ادامنىڭ مەملەكەتتىك ورگانداردىڭ زاڭسىز ارەكەتتەرىنەن نەمەسە ارەكەتسىزدىگىنەن كەلتىرىلگەن زياندى وتەۋ قۇقىعى قۇقىقتىق مەملەكەتتىڭ جانە قۇقىقتار مەن بوستاندىقتاردىڭ ناقتى سيپاتىنىڭ نەگىزگى ەلەمەنتتەرىنىڭ ءبىرى بولىپ تابىلادى.
«قازاقستاندىقتار وسىنداي زالال ءۇشىن بارابار وتەماقى الۋى ءتيىس. ەگەر ازاماتقا ادىلەتسىزدىك جاسالسا, ول جۇمساعان ۋاقىتى, اقشاسى نەمەسە ءتىپتى جۇيكەسى ءۇشىن وتەماقى الۋى كەرەك», دەپ اتاپ ءوتتى ول.
ونىڭ ايتۋىنشا, مۇنداي كونستيتۋتسيالىق كەپىلدىك ازاماتتاردى قورعاپ قانا قويماي, مەملەكەتتىك ورگاندار مەن لاۋازىمدى تۇلعالار تاراپىنان زاڭسىز شەشىمدەر مەن ءىس-ارەكەتتەر قابىلداۋ قاۋپىن ازايتا وتىرىپ, تۇراقتى الدىن الۋ اسەرىن تيگىزەدى.
«ەگەر سوت مەملەكەتتىك ورگاندار مەن لاۋازىمدى تۇلعالاردىڭ شەشىمدەرى مەن ءىس-ارەكەتتەرى زاڭسىز دەپ تانىعان جاعدايدا, ازاماتتارعا وسىنداي وتەماقى الۋ مۇمكىندىگىنە كەپىلدىك بەرۋ قاجەت», دەدى قارلىعاش جامانقۇلوۆا.
ول مۇنداي كەپىلدىكتى كونستيتۋتسيا دەڭگەيىندە ەنگىزۋ ءار ادامنىڭ قۇقىق سۋبەكتىلىگىن تانۋ ەكەنىن اتاپ ءوتتى.
كونستيتۋتسيالىق رەفورما جاستارعا قانداي مۇمكىندىكتەر ۇسىنادى؟
«جاڭا كونستيتۋتسيا ءاربىر ادام قۇقىقتار مەن مىندەتتەردىڭ يەسى بولىپ تابىلاتىندىعىنان جانە ولاردى, مەملەكەتتەن دە قورعاۋدى ءوز بەتىنشە تالاپ ەتۋگە قۇقىلى كەندىگىنەن تۋىندايدى», دەدى ول.
جالپى, قارلىعاش جامانقۇلوۆانىڭ پىكىرىنشە, مۇنداي نورمانى ەنگىزۋ ءاربىر ازاماتتى جاريا-قۇقىقتىق قاتىناستاردىڭ تەڭ قۇقىلى قاتىسۋشىسى ەتەدى, «زاڭ جانە ءتارتىپ» قاعيداتىن ىسكە اسىرۋدىڭ پراكتيكالىق قۇرالىنا اينالادى.
«سايىپ كەلگەندە, مۇنداي نورمامەن جاڭا كونستيتۋتسيانىڭ جوباسى ەل ازاماتىن, ونىڭ مۇددەلەرى مەن قۇقىقتارىن ءبىرىنشى ورىنعا قوياتىن بارىنشا ادامعا باعدارلانعان بولادى. سوندىقتان كونستيتۋتسياعا ءاربىر ازاماتتىڭ مەملەكەتتىك ورگانداردىڭ نەمەسە ولاردىڭ لاۋازىمدى تۇلعالارىنىڭ زاڭسىز ارەكەتتەرىنەن نەمەسە ارەكەتسىزدىگىنەن كەلگەن زياندى وتەۋ قۇقىعى تۋرالى نورمانى ەنگىزۋدى ۇسىنامىن», دەپ تۇيىندەدى ول.
