فوتو: amanatpartiasy.kz
ءماجىلىس دەپۋتاتى, «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ جاڭا كونستيتۋتسيانىڭ العاشقى باپتارىنان-اق ونىڭ تۇجىرىمدامالىق سيپاتى ايقىن كورىنەتىنىن اتاپ ءوتتى. بۇل – ادىلەتتىلىككە, تارتىپكە جانە تۇراقتىلىققا نەگىزدەلگەن قوعام سۇرانىسىنا مەملەكەتتىڭ ناقتى جاۋابى.
دەپۋتات اتاپ وتكەندەي, جاڭا اتا زاڭنىن وزەگىندە قوعامداعى كەلىسىمدى ساقتاۋ جانە وتكەن قاتەلىكتەردى قايتالاماۋ قاعيداتى جاتىر.
«كونستيتۋتسيانىڭ 2-بابىنىڭ 1-تارماعىندا قازاقستاننىڭ پرەزيدەنتتىك رەسپۋبليكا بولىپ قالا بەرەتىنى جانە مەملەكەت باسشىسىنىڭ بيلىك تارماقتارىنىڭ ۇيلەسىمدى جۇمىسىن قامتاماسىز ەتەتىنى ناقتى كورسەتىلگەن. ال 43-باپتىڭ 1-تارماعىندا پرەزيدەنت ءبىر رەت, جەتى جىل مەرزىمگە سايلاناتىنى بەكىتىلگەن. بۇل – بيلىكتىڭ مونوپوليالانۋىنا جول بەرمەيتىن ناقتى نورما. وسى باپتىڭ 5-تارماعىندا اتالعان ەرەجە وزگەرتىلمەيتىنى جازىلعان. وسىلايشا «ماڭگى بيلىك» تۋرالى كەز كەلگەن الىپقاشپا اڭگىمەگە توسقاۋىل قويىلادى», دەدى ەلنۇر بەيسەنباەۆ.
قازاقستان حالىق پارتياسى قىزىلوردادا جاڭا كونستيتۋتسيا جوباسىن تالقىلادى
سونىمەن قاتار جاڭا كونستيتۋتسيا پرەزيدەنتتىڭ جاقىن تۋىستارىنىڭ ساياسي جانە باسشىلىق قىزمەتتەردى اتقارۋىنا تىيىم سالادى. بۇل ەرەجە 45-باپتىڭ 3-تارماعىندا ناقتى بەكىتىلگەن.
«قازاقستان اشىق ءارى ناقتى ەرەجەلەر ەنگىزىپ وتىر. بۇل شەشىمدى ءبىز 2022 جىلعى رەفەرەندۋمدا قابىلدادىق جانە ونى جاڭا كونستيتۋتسيا جوباسىندا قايتا بەكىتىپ وتىرمىز», دەدى ءماجىلىس دەپۋتاتى.
كوميسسيا مۇشەسى ازاماتتاردىڭ مەملەكەت ومىرىنە ارالاسۋ مۇمكىندىكتەرىن كەڭەيتۋ, سونداي-اق كونستيتۋتسياداعى قۇندىلىقتار مەن قۇقىقتىق كەپىلدىكتەرگە ەرەكشە توقتالدى.
«العاش رەت پرەامبۋلادا ادىلەتتى قازاقستان يدەياسى مەن «زاڭ جانە ءتارتىپ» قاعيداتى ايقىن كورىنىس تاپتى. ەندى ازاماتتاردىڭ جاعدايىن ناشارلاتاتىن نەمەسە جاڭا مىندەتتەر جۇكتەيتىن زاڭدار (5-باپتىڭ 5-تارماعى) كەرى كۇشكە يە بولمايدى. سونىمەن قاتار, كونستيتۋتسيا العاش رەت ازاماتتاردىڭ تسيفرلىق كەڭىستىكتەگى جەكە ءومىرىن – دەربەس دەرەكتەر مەن ەلەكتروندى حات الماسۋدى قورعاۋعا الادى (21-باپ)», دەپ ءتۇسىندىردى دەپۋتات.
دەپۋتاتتىڭ ايتۋىنشا, كونستيتۋتسيالىق رەفورما جانە ازاماتتاردان ءتۇسىپ جاتقان ۇسىنىستار مەملەكەت پەن قوعامنىڭ كەمەلدەنگەنىن كورسەتەدى.
«مازمۇندىق تۇرعىدا ەل تۇرعىندارى جاڭا كونستيتۋتسيا ەرەجەلەرىنىڭ 98%-ىن قولدايدى. جاڭا كونستيتۋتسيا – قازاقستاننىڭ دامۋىنىڭ ايقىن دالەلى. بۇل – كۇشتى ءارى ادىلەتتى مەملەكەت جولىنداعى سانالى تاڭداۋ. «AMANAT» پارتياسى بارشا ازاماتتى ەلىمىزدىڭ بولاشاعى ءۇشىن بىرلەسە ەڭبەك ەتۋگە شاقىرادى», دەدى ەلنۇر بەيسەنباەۆ.
جاڭا كونستيتۋتسيادا قازاق ءتىلىنىڭ مارتەبەسى قالاي بەكىتىلمەك؟
