ەلىمىزدىڭ ەڭ ۇزدىك تەننيسشىسى العاشقى اينالىمداردا كايا يۋۆان (سلوۆەنيا), ۆارۆارا گراچەۆا (فرانتسيا), تەرەزا ۆالەنتوۆانىڭ (چەحيا) تاس-تالقانىن شىعاردى. ودان كەيىن ەليزە مەرتەنستى دە وپ-وڭاي ەڭسەردى. شيرەك فينالدا جولى الەمنىڭ ەكىنشى راكەتكاسى يگا شۆەنتەكپەن قيىستى. 24 جاستاعى ۆارشاۆانىڭ تۋماسى سپورتتىڭ بۇل تۇرىندە كوپتەگەن بەلەستى باعىندىردى. «رولان گارروستا» (فرانتسيانىڭ اشىق بىرىنشىلىگى) ءتورت مارتە تەڭدەسسىز دەپ تانىلسا, US Open (اقش) مەن ۋيمبلدوندا ( ۇلىبريتانيا) ءبىر-ءبىر رەتتەن توپ جاردى. WTA-نىڭ 25 تۋرنيرىندە باس جۇلدەنى ولجالادى. وسى جولى ەكەۋى ويىنىنىڭ ءبىرىنشى سەتىندە ءبىراز تىرەسكەنىمەن, ەكىنشىسىندە ەلەنا قارسىلاسىنا باس كوتەرتپەدى – 7:5, 6:1.
جارتىلاي فينالعا جەرلەسىمىز امەريكالىق دجەسسيكا پەگۋلامەن كەزدەستى. 31 جاستاعى اقش تەننيسشىسىنىڭ ەڭ زور تابىسى – 2024 جىلى US Open دوداسىنىڭ فينالىندا ونەر كورسەتتى. WTA تۋرنيرلەرىندە توعىز رەت توپ جاردى. كەزىندە الەمنىڭ ءۇشىنشى راكەتكاسى دارەجەسىنە جەتكەن دجەسسيكا قازىر ۇزدىكتەر تىزىمىندە التىنشى ورىندا تۇر. بىراق ەلەنانى ەڭسەرۋگە ونىڭ دا الەۋەتى جەتپەدى – 6:3, 7:6.
باس جۇلدە ءۇشىن تارتىس ەلەنا رىباكينا ارينا سوبولەنكو اراسىندا ءوتتى. بۇگىندە تورتكۇل دۇنيەنىڭ تەڭدەسسىزى اتانىپ وتىرعان بەلارۋس ەلىنىڭ بەتكەۇستارى US Open مەن مەلبۋرندەگى تۋرنيرلەردىڭ ەكى دۇركىن جەڭىمپازى اتانىپ, رولان گارروستىڭ فينالىنا شىقتى. «ۇلكەن دۋلىعانىڭ» جۇپتىق سايىستارىندا دا مەرەيى ۇستەم بولدى. WTA-نىڭ 22 دۇركىن جەڭىمپازى دەگەن اتاعى تاعى بار. ءدال وسى سپورتشى وسىدان ءۇش جىل بۇرىن «Australian Open» دوداسىنىڭ شەشۋشى سىنىندا ءبىزدىڭ ويىنشىدان باسىم ءتۇسىپ, باس جۇلدەدەن ايىرعان ەدى.
جالپى, قوس مىقتىنىڭ ءتۇرلى جارىستاردا جولدارى ءجيى قيىسىپ ءجۇر. بىلتىر جىل اياعىندا ساۋد ارابياسىندا ۇيىمداستىرىلعان WTA-نىڭ قورىتىندى تۋرنيرىندە رىباكينا سوبولەنكوعا سان سوقتىردى. تاي-برەيكتە وتانداسىمىز وعان ءبىر ۇپاي دا ۇستاتپادى. ەندى مىنە, بىتىسپەس قارسىلاستار «Australian Open-2026» ءتۋرنيرىنىڭ فينالىندا جولىقتى. العاشقى ەكى سەتتە ەكەۋى يتجىعىس ءتۇستى – 6:4, 4:6. ۇشىنشىسىندە سوبولەنكو 3:0 ەسەبىمەن الدا كەلە جاتتى. سوعان قاراماستان, بۇكىل ەرىك-جىگەرىن بويىنا جيعان جەرلەسىمىز قاتارىنان بەس گەيمدى ۇتىپ, تارازى باسىن وزىنە اۋداردى. ناتيجەسىندە, الەمنىڭ ءبىرىنشى راكەتكاسىن تاعى دا تىزە بۇكتىردى – 6:4. ءسويتىپ, ەلەنا رىباكينا «ۇلكەن دۋلىعا» دودالارىندا ەكىنشى مارتە دارا شىقتى. 2022 جىلى ۋيمبلدوندا باس جۇلدەنى ولجالاعان ەدى. وسى جەڭىسىنىڭ ارقاسىندا ەلەنا دافنا اكحەرست كۋبوگىمەن قوسا, 2,8 ميلليون دوللار كولەمىندە سىياقى الدى. سونداي-اق الەمدىك رەيتينگتە ءۇشىنشى ورىنعا كوتەرىلدى.
سەربيالىق الەكساندرا كرۋنيچپەن جۇپتاسىپ ونەر كورسەتكەن اننا دانيلينانىڭ دا قارقىنى قۋانتتى. باستاپقى باسەكەلەردە بارلىق قارسىلاسىنان باسىم تۇسكەن ولار شيرەك فينالدا الەمدىك رەيتينگتە كوش باستاپ تۇرعان چەحيالىق كاتەرينا سينياكوۆا مەن امەريكالىق تەيلور تاۋنسەندتى 6:2, 3:6, 6:0 ەسەبىمەن ۇتتى. جارتىلاي فينالدا كانادالىق گابريەلا دوبروۆسكي مەن برازيليالىق لۋيزا ستەفانيگە سان سوقتىردى – 7:6, 3:6, 6:4. وسىلايشا, اننا «ۇلكەن دۋلىعا» تۋرنيرلەرىندە ءۇشىنشى رەت باس جۇلدەگە تالاسۋ مۇمكىندىگىنە يە بولدى. 2022 جىلى وسى مەلبۋرندە, وتكەن جىلى رولان گارروستىڭ فينالىندا ويناعان ەدى. بىراق بۇل جولى دا شەشۋشى باسەكەدە دانيلينا مەن كرۋنيچ جۇبى بەلگيالىق ەليسە مەرتەنس پەن قىتايلىق چجان شۋايدى جەڭە المادى – 6:7, 4:6.
جاستار اراسىنداعى جارىستا زاڭعار نۇرلان ۇلى ەل تەننيسىنىڭ تاريحىندا قالاتىنداي ءىس تىندىردى. باستاپقىدا پانتاراتورن كۋنانان (تايلاند), تايكي تاكيزاۆا (اۋستراليا), ساۆۆا رىبكيندى (رەسەي) قاپى قالدىرعان ول ¼ فينالدا كاي تومپسوندى (گونكونگ) 3:6, 7:6, 6:4 ەسەبىمەن تىزە بۇكتىردى. جارتىلاي فينالدا زاڭعار امەريكالىق كيتون حانسقا ەسە جىبەردى – 3:6, 4:6. دەسەك تە وسى مەجەگە جەتۋىنىڭ ءوزى 17 جاستاعى قانداسىمىزدىڭ ەلەۋلى تابىسى. بىلتىر نۇرلان ۇلى US Open دوداسىندا دا ءدال وسىنداي ناتيجە كورسەتتى.
ەرلەر اراسىنداعى جارىستىڭ فينالىندا يسپانيالىق كارلوس الكاراس پەن سەربيالىق نوۆاك دجوكوۆيچ كەزدەستى. العاشقىسى نەبارى 22 جاستا, ەكىنشىسىنىڭ جاسى 38-دە. كەزىندە قارسى كەلگەندەردىڭ بارلىعىن بەت قاراتپاي ۇتىپ, تالاي رەكوردتىق كورسەتكىشكە قول جەتكىزگەن نوۆاك كەيىنگى جىلدارى ءوز پوزيتسياسىن جوعالتا باستاعانى انىق. كارلوستىڭ, كەرىسىنشە, قارقىنى جىلدان جىلعا كۇشەيىپ كەلەدى. ساقا سپورتشى مەن جاس جولبارىستىڭ ءوزارا باسەكەسى پيرەنەي تۇبەگى وكىلىنىڭ جەڭىسىمەن اياقتالدى – 2:6, 6:2, 6:3, 7:5. ءسويتىپ, الكاراس «ۇلكەن دۋلىعا» ساناتىنداعى جارىستارداعى جەڭىستەر سانىن جەتىگە جەتكىزدى. بۇعان دەيىن US Open, ۋيمبلدون, رولان گارروستى ەكى رەتتەن ۇتقان يسپانيانىڭ ماقتانىشى ءوز مانسابىندا مەلبۋرندەگى تۋرنيردە تۇڭعىش رەت توپ جاردى.
