باس پروكۋروردىڭ مالىمەتىنشە, 2025 جىلدىڭ اقپان ايىندا قىلمىستىق قۋدالاۋ ورگاندارىنا ينتەرنەت-الاياقتىقپەن كۇرەستى كۇشەيتۋ جونىندە ارنايى نۇسقاۋ جولدانعان. نەگىزگى ماقسات – تەرگەۋدىڭ زاڭدىلىعىن قامتاماسىز ەتۋ, كۇماندى ترانزاكتسيالاردى جەدەل بۇعاتتاۋ, زاڭسىز نەسيەلەردى توقتاتۋ جانە «دروپپەرلەر» ارقىلى كەلگەن زالالدى ءوندىرۋ.
تەگىن كىتاپتار قاۋىپتى: باس پروكۋراتۋرا ينتەرنەت-الاياقتىقتىڭ جاڭا ءتۇرى تۋرالى ەسكەرتتى
پروكۋرورلىق قاداعالاۋ بارىسىندا پوليتسيا ورگاندارىنىڭ الاياقتىق ىستەرى بويىنشا 3 387 زاڭسىز شەشىمى جويىلدى. قايتا قارالعان ىستەردىڭ 387-ءسى سوتقا جولدانىپ, 129 ءىس توقتاتىلدى.
ناتيجەسىندە 2,4 ملرد تەڭگەدەن استام سوماعا كۇماندى قارجىلىق وپەراتسيالار بۇعاتتالدى. سونىمەن قاتار الاياقتىقپەن اينالىسقان كولل-ورتالىقتاردىڭ قىزمەتى, ونىڭ ىشىندە «انتيفرود-كولل-ورتالىق» جوباسى توقتاتىلدى.
9,4 مىڭ نەسيەلىك كەلىسىم بويىنشا 8,3 ملرد تەڭگە كولەمىندەگى ءوندىرىپ الۋ ۋاقىتشا توقتاتىلىپ, 150 كەلىسىم بويىنشا 1,6 ملرد تەڭگە قارىز كەشىرىلدى.
مەملەكەتتىك سەرۆيستەرگە «1414» SMS-ءشليۋزى ارقىلى كىرۋ كەزىندە FaceID بيومەتريالىق سايكەستەندىرۋ مەن eGov QR-كودتارى مىندەتتى تۇردە ەنگىزىلدى. بۇل ۇرلانعان نەمەسە جالعان ەتسق ارقىلى نەسيە راسىمدەۋدىڭ الدىن الۋعا مۇمكىندىك بەرەدى.
سونداي-اق ۋكراينا, رەسەي جانە ارمەنيانىڭ ۋاكىلەتتى ورگاندارىمەن بىرلەسىپ, 10 ترانسۇلتتىق الاياقتىق call-ورتالىق جويىلدى. 63 قىلمىستىق توپ مۇشەسى ۇستالىپ, SIM-بوكستاردى قوسا العاندا ارنايى قۇرال-جابدىقتار تاركىلەندى.
ۇسىنىلعان دەرەكتەر قازاقستاننىڭ زاماناۋي كيبەرقاۋىپتەرگە قارسى جۇيەلى ءارى كەشەندى ءتاسىل قالىپتاستىرعانىن, سونداي-اق ىشكى رەفورمالار مەن حالىقارالىق ىنتىماقتاستىقتىڭ كۇشەيگەنىن كورسەتەدى.
