سۋرەتتەردى تۇسىرگەن ەرلان ومار
اۋەلگى قۇتتىقتاۋ ءسوز پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆادان جەتتى.
«شەرحان مۇرتازانىڭ كىسىلىك كەلبەتى مەن قارىمدى قالامگەرلىگى ءاربىر ۇلتجاندى ازاماتقا ۇلگى بولۋعا ءتيىس. كەلەلى كەڭەس ابىرويلى ءوتىپ, ۇلتتىق ءباسپاسوز كۇنى قۇتتى بولسىن», دەگەن راۋىشتەگى حابارلامانى اتالعان مينيسترلىكتىڭ قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي وقىپ بەردى.
شەرحان مۇرتازانىڭ «Egemen Qazaqstan» گازەتىن باسقارعان كەزەڭى – باسىلىمنىڭ التىن ءداۋىرى سانالادى. كەلەسى ءسوز كەزەگى سول جىلدارى شەراعانىڭ «شەكپەنىندە» ءتالىم العان, بۇگىندە اعا بۋىن جۋرناليستەردىڭ وكىلى, مەملەكەت جانە قوعام قايراتكەرى ساۋىتبەك ابدراحمانوۆقا بەرىلدى. ول باس رەداكتوردىڭ قايتپاس قايسارلىعىنا توقتالدى. جاس جۋرناليستەرگە جىگەر بەرىپ, ەشتەڭەدەن تايسالمايتىن مىنەز تاربيەلەگەن شەبەرلىگىن ءسوز ەتتى.
راس, شەرحانتانۋ بۇگىن كەشەندى, كوپ سالالى عىلىمعا اينالدى. ونىڭ كوركەم شىعارمالارى قايتا باسىلىپ جاتىر, پەسالارى ساحنادان تۇسكەن جوق, پۋبليتسيستيكاسى ءبىر توبە, جوعارى وقۋ ورىندارىندا قالامگەردىڭ اتىندا اۋديتوريا بار. الايدا ونىڭ رەداكتور رەتىندەگى شەبەرلىگى ءالى دە تولىق اشىلماعان ارال. ساۋىتبەك ابدراحمانوۆ شەرحان مۇرتازانىڭ وسى قىرىنا عىلىمي زەرتتەۋ قاجەت ەكەنىن باسا ايتتى. ونىڭ ءسوزىن اعا جۋرناليست ەركىن قىدىر دا قۋاتتادى.
ەل گازەتىنىڭ ارداگەر ءتىلشىسى جانات ەلشىبەك سول كەزدەگى «سوتسياليستىك قازاقستان» گازەتىنىڭ تابالدىرىعىن اتتاعان جاستىق شاعىن ەسكە الدى. باس رەداكتور شەرحان مۇرتازانىڭ ۇجىمىندا ىستەگەنىنە وتە باقىتتى ەكەنىن جەتكىزدى.
«ول ءتارتىپتىڭ ادامى ەدى. وتە جاسپىن عوي. رەداكتسيانىڭ ىشكى تالابىن بىلمەسەم كەرەك, ەركىن كيىنىپ كەلدىم. سول كەزدە شەرحان مۇرتازا مۇنىمدى قاتتى سىنعا الدى. ءاردايىم گالستۋكپەن ءجۇرۋىمدى تالاپ قىلدى. اعا ءسوزىنىڭ قۋاتى – سول, ءالى كۇنگە دەيىن گازەت تابالدىرىعىن گالستۋكسىز اتتامايمىن», دەدى اقساقال جۋرناليست.
«شەرحان اعا – شىن مانىندەگى رەفورماتور ەدى. تاعايىندالعانىنا ءبىر اي بولماستان, گازەتكە وزگەرىستەردى باتىل ەنگىزدى. سونىڭ ءبىرى – اي اتتارى. ول كەزدە ولاردىڭ ءبارى ورىس تىلىندە جازىلاتىن. شەرحان مۇرتازا كەلىسىمەن ءبىز «جەلتوقسان», «اقپان», «ناۋرىز» دەپ جازا باستادىق. بىزگە ارقا تىرەپ بىرنەشە گازەت اي اتتارىن قازاقشالادى. ارتىنشا «سوتسياليستىك قازاقستان» اتاۋىن «ەگەمەندى قازاقستان» دەپ ءبىر-اق اۋىستىردى. بۇل – ۇلكەن ەرلىك.
اعامىزدىڭ قاتقىل مىنەزىنەن, تۋراشىلدىعىنان ىققان ءبىرشاما زامانداستارىم «شەراعانىڭ ازۋىندا شاينالىپ كەتپەي قالاي امان ءجۇرسىڭ؟» دەيتىن. بىراق رەداكتورىمىز سىرتقا سولاي كورىنگەنىمەن, جۇرەگى سونداي جىلى, جۇمساق-تۇعىن», دەدى جانات ەلشىبەك.
«Egemen Qazaqstan» گازەتىنىڭ باس رەداكتورىنىڭ ورىنباسارى تالعات باتىرحان شەرحان مۇرتازانىڭ رەفورماتورلىق قابىلەتىن اسا جوعارى باعالاپ:
«گازەت شىعاراتىن رەداكتورلار بولادى, گازەتتى جاسايتىن ادامدار بولادى. شەراعام گازەتتى جاساعان جان ەدى», دەپ تەبىرەندى ت. باتىرحان.
بالبال تاستان باسپاسوزگە دەيىن: الەم نەگە گازەت وقي باستادى؟
جيىن سوڭىندا ۇلتتىق ءارحيۆتىڭ ديرەكتورى ساعيلا نۇرلانوۆا قاتىسۋشىلاردىڭ بارلىعىنا العىس ايتىپ, شەرحان مۇراسىنىڭ ارحيۆكە تولىق وتكەنىن, بىرقاتار قولجازبانىڭ تسيفرلانعانىن جانە ەڭ باستىسى وتە قاۋىپسىز جەردە ساقتالىپ تۇرعانىن جەتكىزدى.
ايتا كەتەيىك, قۇجاتتار اۋەلى دەستەلەنىپ, زەرتحانانىڭ اۋا تەمپەراتۋراسىنا ۇيرەتىلەدى. ارتىنشا ازوت تولتىرىلعان ارناۋلى ۆاكۋمدە ساقتالادى. ونىڭ ىشىندە قاعاز بەتىندەگى كوزگە كورىنبەيتىن زيانكەستەر ولەدى. ودان الىپ شىعىپ ارناۋلى ماماندار قۇجاتتى قالىپقا كەلتىرۋمەن اينالىسادى. ءبىر پاراقتى وڭدەۋگە ءبىر كۇن كەتەدى. وسىلايشا, «سىرقاتتانىپ» كەلگەن قولجازبالاردى «ەمدەپ» شىعادى. تۇپ-تۋرا ادام ەمى سياقتى. شەرحان مۇرتازانىڭ «Egemen Qazaqstan» گازەتىنەن كەلىپ تۇسكەن قاعازدار سانى 6 مىڭ دانانى قۇرادى. ماماندار ارقايسىن وڭدەپ, تۇگەلدەي تسيفرلاندىردى.
