سۋرەت: senate.parlam.kz
تالقىلاۋعا مۇددەلى مەملەكەتتىك ورگانداردىڭ, سونىڭ ىشىندە ىشكى ىستەر, قورعانىس مينيسترلىكتەرىنىڭ, باس پروكۋراتۋرانىڭ, سونداي-اق بەيىندى ۆەدومستۆولار مەن ۇيىمداردىڭ وكىلدەرى قاتىستى.
وتىرىس بارىسىندا اتاپ وتىلگەندەي, زاڭنىڭ نەگىزگى ماقساتى – كۇزەت قىزمەتى سۋبەكتىلەرىنىڭ قىزمەتىن جەتىلدىرۋ, قارۋ يەلەرىنە قويىلاتىن تالاپتاردى كۇشەيتۋ, سونداي-اق قۇقىق قورعاۋ جانە ارنايى مەملەكەتتىك ورگاندار, ازاماتتىق قورعاۋ ورگاندارى قىزمەتكەرلەرى مەن اسكەري قىزمەتشىلەردى تۇرعىن ۇيمەن قامتاماسىز ەتۋ, تۇرعىن ءۇي تولەمدەرى تەتىكتەرىن رەتكە كەلتىرۋ.
زاڭمەن, اتاپ ايتقاندا, تۇرعىن ءۇي تولەمدەرىن ۇسىنۋ جانە جۇزەگە اسىرۋ ءتارتىبىن ايقىنداۋ بويىنشا وكىلەتتىكتەردى ۇكىمەتكە بەرۋ, ازاماتتىق جانە قىزمەتتىك قارۋ يەلەرى ءۇشىن قوسىمشا مىندەتتەر ەنگىزۋ, كۇزەت قىزمەتى سۋبەكتىلەرى ءۇشىن ەسەپتىلىك ورناتۋ, سونداي-اق اسكەريلەندىرىلگەن تەمىرجول كۇزەتىنىڭ قۇقىقتىق مارتەبەسىن بەكىتۋ قاراستىرىلادى.
بۇدان بولەك, مەملەكەتتىك قۇقىقتىق ستاتيستيكا سالاسىنداعى ەرەجەلەر ناقتىلانادى جانە قۇقىق قورعاۋ ورگاندارى باسشىلارىنىڭ كادرلىق شەشىمدەر ءۇشىن جاۋاپكەرشىلىگى كۇشەيتىلەدى.
تالقىلاۋ قورىتىندىسى بويىنشا ۇسىنىلىپ وتىرعان وزگەرىستەر مەملەكەتتىك باقىلاۋدى كۇشەيتۋگە, كۇزەت قىزمەتتەرىنىڭ ساپاسىن ارتتىرۋعا جانە قۇقىق قورعاۋ جۇيەسىندەگى كادر ساياساتىن جەتىلدىرۋگە باعىتتالعانى اتاپ ءوتىلدى.
