سارىارقا اۋدانىنداعى ءوندىرىس ايماعىنا اياق باسقان ساتتەن-اق جۇمىستىڭ قىزۋ قارقىنى بايقالادى. ءبىر جەردە مەتالل كەسىلىپ, ەندى ءبىر جەردە جاڭا تەحنيكانىڭ قاڭقاسى قۇراستىرىلىپ جاتىر. وسى وندىرىستىك الاڭداعى ماڭىزدى جوبالاردىڭ ءبىرى – «اۆتوكومپونەنتى KZ» زاۋىتى. استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ, سونداي-اق «استانا دامۋ ورتالىعى» جشس قولداۋىمەن ىسكە قوسىلعان كاسىپورىن بۇگىندە ەلوردانىڭ ونەركاسىپتىك الەۋەتىن ارتتىرۋعا ۇلەس قوسىپ وتىر.
كوپشىلىك ارنايى تەحنيكانى دايىن كۇيىندە كورەدى. ال ونىڭ ارتىندا قانشاما ينجەنەرلىك ەسەپ, تەحنولوگيالىق شەشىم مەن جۇمىسشى ەڭبەگى تۇرعانىن اڭعارا بەرمەيدى. بۇل كاسىپورىندا فۋرگوندار, كوممۋنالدىق-جول تەحنيكالارى, ءورت ءسوندىرۋ ماشينالارى, ۆاحتالىق اۆتوبۋستار مەن ءتۇرلى ارنايى قوندىرعىلار شىعارىلادى.
تسەح ىشىنە كىرگەندە ءوندىرىستىڭ بىرنەشە كەزەڭى قاتار ءجۇرىپ جاتقانىن بايقايسىڭ. لازەرلىك ستانوكتار مەتالل تاباقتاردى دالدىكپەن كەسىپ جاتىر. ارعى بەتتە بولاشاق فۋرگوننىڭ قاڭقاسى دانەكەرلەنىپ جاتىر. ءبىر تسەحتا پانەلدەر دايىندالسا, كەلەسى بولىكتە بوياۋ مەن قۇراستىرۋ جۇمىسى جۇرگىزىلەدى.
كاسىپورىننىڭ ءوندىرىس جونىندەگى ديرەكتور ورىنباسارى ەدگار بەندا ءوندىرىستىڭ قالىپتاسۋ تاريحىنا توقتالدى.
«باستاپقىدا كومپانيا يمپورتتىق جابدىقتاردى جەتكىزۋمەن اينالىستى. كەيىن وسىنداي ونىمدەردى ءوز ەلىمىزدە وندىرۋگە بولاتىنىن تۇسىندىك. ءسويتىپ, ءوز ءوندىرىسىمىزدى ىسكە قوستىق. قازىر فۋرگونداردى تولىق تسيكلمەن شىعارامىز. بۇرىن مۇنداي ونىمدەردىڭ باسىم بولىگى سىرتتان اكەلىنەتىن ەدى», دەيدى ەدگار بەندا.
كاسىپورىن نارىقتا ون جىلدان استام ۋاقىتتان بەرى جۇمىس ىستەيدى. كەيىنگى جىلدارى ءوندىرىستى جەرگىلىكتەندىرۋگە ەرەكشە كوڭىل بولىنگەن. بۇگىندە فۋرگون تەحنيكاسى وندىرىسىندەگى جەرگىلىكتى قامتۋ ۇلەسى 70 پايىزدان اسقان.
زاۋىتتا كوممۋنالدىق قىزمەتتەرگە ارنالعان ءتۇرلى تەحنيكالار مەن ارنايى جابدىقتار دا قۇراستىرىلادى. قازىر مۇندا «كوپىر» مەكەمەسىنە ارنالعان جىلجىمالى اۆتوجوندەۋ شەبەرحاناسى دايىندالىپ جاتىر. ارنايى كولىك ىشىندە جوندەۋ جۇمىسىنا قاجەتتى قۇرال-جابدىقتىڭ ءبارى قاراستىرىلعان.
ءوندىرىس الاڭىندا ءجۇرىپ, قازىرگى زامانعى تەحنولوگيالاردىڭ ءوندىرىس ۇدەرىسىنە قالاي ەنگەنىن انىق بايقايسىڭ. لازەرلىك كەسۋ قۇرىلعىلارى مەن اۆتوماتتاندىرىلعان جۇيەلەر ءونىم ساپاسىن ارتتىرىپ قانا قويماي, جۇمىس ونىمدىلىگىن دە ەسەلەي تۇسكەن. زاۋىتتاعى ەڭبەك مادەنيەتى دە نازار اۋدارتادى. تسەحتار جارىق ءارى تازا. قىزمەتكەرلەر قاۋىپسىزدىك تالاپتارىنا ساي ارنايى كيىممەن قامتاماسىز ەتىلگەن. دەمالىس ورىندارى دا قاراستىرىلعان.
بۇگىندە كاسىپورىندا ەلۋگە جۋىق ادام ەڭبەك ەتەدى. الداعى جىلدارى جۇمىسشى سانىن ەكى ەسەگە جۋىق ارتتىرۋ جوسپارى بار.
الايدا وندىرىستەگى نەگىزگى ماسەلەلەردىڭ ءبىرى – بىلىكتى كادر تاپشىلىعى. سوندىقتان جاڭا مامانداردىڭ كوپشىلىگى جۇمىس بارىسىندا تاجىريبە جيناقتاپ, قايتا دايارلىقتان وتەدى.
زاۋىت قىزمەتكەرى رۋسلان گاريفۋلليننىڭ ماماندىعى – مەحانيك. بۇگىندە ول مەحانيكالىق-قۇراستىرۋ جۇمىسىنىڭ سلەسارى رەتىندە ەڭبەك ەتەدى. «ەڭبەگىڭنىڭ ناتيجەسىن كورۋدىڭ ءوزى ەرەكشە سەزىم بەرەدى. بۇگىن قۇراستىرعان تەحنيكاڭ ەرتەڭ ەل يگىلىگىنە قىزمەت ەتەدى. ونىڭ ۇستىنە تۇراقتى جۇمىس پەن لايىقتى جالاقى ادامعا سەنىمدىلىك بەرەدى», دەيدى جۇمىسشى.
مامانداردىڭ ايتۋىنشا, مۇنداي كاسىپورىنداردىڭ ماڭىزى جىل سايىن ارتىپ كەلەدى. ويتكەنى ولار دايىن ءونىم شىعارىپ قانا قويماي, ينجەنەرلىك تاجىريبەنى قالىپتاستىرادى, جاڭا جۇمىس ورىندارىن اشادى ءارى وڭدەۋ ونەركاسىبىنىڭ الەۋەتىن كۇشەيتەدى.
زاۋىت اۋلاسىنان شىققان كەزدە ءبىر نارسە انىق سەزىلەدى. مۇندا جاي عانا تەحنيكا قۇراستىرىلىپ جاتقان جوق. بۇل كاسىپورىندا تاجىريبە جيناقتالىپ, جاڭا وندىرىستىك مادەنيەت قالىپتاسىپ كەلەدى. مەتالل مەن مەحانيزمنىڭ اراسىندا ەل ونەركاسىبىنىڭ ەرتەڭى دە شىڭدالىپ جاتقانداي اسەر قالدىرادى.
