سۋرەتتى تۇسىرگەن – اۆتور
بايانداما جاساعان وبلىس اكىمىنىڭ كەڭەسشىسى سۇلتانبەك سىزدىقوۆ مۋزەي ينفراقۇرىلىمىن دامىتۋعا ەرەكشە نازار اۋدارۋ قاجەت ەكەندىگىن ەسكە سالدى. جاڭا مۋزەيلەر سالۋ كەزىندە مەملەكەتتىك-جەكەشەلىك ارىپتەستىك تەتىكتەرىن قاراستىرۋعا بولاتىنى ايتىلدى.
– ماسەلەن, تاريحي مۋزەي عيماراتتارىن كاسىپكەرلەرگە بيزنەس جۇرگىزۋ ماقساتىندا پايدالانۋعا بەرىپ, ونىڭ ورنىنا اۋماعى مەن فۋنكتسيونالدىق مۇمكىندىكتەرى جاعىنان تەڭ كەلەتىن زاماناۋي جاڭا مۋزەي سالۋ تاجىريبەسىن ەنگىزگەن ءجون. مۇنداي ءتاسىل تاريحي مۇرانى ساقتاۋعا, تۋريستەردى تارتاتىن جاڭا نىساندار قۇرۋعا, بيۋدجەتكە تۇسەتىن جۇكتەمەنى ازايتۋعا مۇمكىندىك بەرەدى, – دەدى اكىمنىڭ كەڭەسشىسى.
سونداي-اق اپتاسىنا نەمەسە ايىنا ءبىر رەت مۋزەيلەرگە تەگىن كىرۋ كۇنىن ەنگىزۋ مۇمكىندىگىن قاراستىرۋ كەرەكتىگى دە ۇسىنىلدى. باياندامادا ايتىلعانداي, بۇگىندە سپورت ءتۋريزمى – الەمدىك تۋريستىك يندۋسترياداعى ەڭ قارقىندى دامىپ كەلە جاتقان باعىتتاردىڭ ءبىرى. شىعىس قازاقستان وبلىسىندا ماۋسىمارالىق كەزەڭدە بوس تۇراتىن دەمالىس بازالارى مەن شيپاجايلاردى وقۋ-جاتتىعۋ جيىندارىن ۇيىمداستىرۋعا پايدالانۋ جايىن پىسىقتاۋ قاجەت. حالىقارالىق دەڭگەيدەگى ءىس-شارالاردى وتكىزۋ قۇقىعىنا يە بولۋ وڭىرگە ينۆەستيتسيا تارتۋدىڭ ءتيىمدى قۇرالدارىنىڭ ءبىرى رەتىندە قاراستىرىلۋعا ءتيىس.
وسى ورايدا نۇرىمبەت ساقتاعانوۆ تەاترلاردىڭ, تاريحي-مادەني نىسانداردىڭ تۋريستىك الەۋەتىنە اۋديت جۇرگىزىپ, تۋريستەر ءۇشىن تارتىمدى ءارى كەلەشەگى بار نىسانداردىڭ تىزبەسىن ايقىنداۋ قاجەتتىگىن ايتتى.
– مادەنيەت باسقارماسىنىڭ KPI كورسەتكىشتەرىنە مادەنيەت مەكەمەلەرىنىڭ اقىلى قىزمەتتەرىنەن تۇسەتىن كىرىس كولەمى, تۋريستەرگە ارنالعان كادەسىي ونىمدەرىن وندىرۋگە تارتىلعان قولونەرشىلەر سانى, كادەسىي ونىمدەرىن وتكىزۋ كولەمى ەنگىزىلۋگە ءتيىس. وبلىستىق دەنە شىنىقتىرۋ جانە سپورت باسقارماسى حالىقارالىق جارىستار مەن وقۋ-جاتتىعۋ جيىندارىن تارتۋعا ارنالعان ۇزاقمەرزىمدى باعدارلاما ازىرلەگەنى ءجون. قالالار مەن اۋداندار اكىمدىكتەرى سپورتتىق ءىس-شارالاردى وتكىزۋگە, وقۋ-جاتتىعۋ جيىندارىن ورنالاستىرۋعا ارنالعان الاڭدار مەن ينفراقۇرىلىمعا قاتىستى ۇسىنىستار دايىنداۋى قاجەت, – دەدى ايماق باسشىسى.
جيىندا تۋريزم سالاسىنداعى باسقا دا ماسەلەلەر ءسوز ەتىلدى. شىعىس قازاقستان وبلىسىندا ينۆەستيتسيا تارتۋ باعىتىنداعى جۇمىستار وڭ ناتيجە كورسەتە باستادى. بيىل العاشقى ءتورت ايدا وڭىردە نەگىزگى كاپيتالعا تارتىلعان ينۆەستيتسيالار كولەمى 202 ملرد تەڭگەگە جەتىپ, ناقتى كولەم يندەكسى 108,7%-دى قۇرادى. ول تۋرالى اكىمدىك وتىرىسىندا وبلىستىق تۋريزم باسقارماسى باسشىسىنىڭ مىندەتىن اتقارۋشى يرينا سميت ءمالىم ەتتى. باسقارما وكىلىنىڭ ايتۋىنشا, بىلتىر وڭىرگە ارتىلعان تىكەلەي شەتەلدىك ينۆەستيتسيالاردىڭ جالپى كولەمى 1 750,8 ملن دوللارعا جەتكەن. بۇل – 2024 جىلعى كورسەتكىشتەن 3,1 ەسە جوعارى. وسى كورسەتكىش بو-يىنشا ءوڭىر رەسپۋبليكادا الماتى, اتىراۋ, استانا, تۇركىستاننان كەيىنگى بەسىنشى ورىنعا
تۇراقتادى.
– قازىرگى ۋاقىتتا وبلىستىڭ ينۆەستيتسيالىق پورتفەلىندە جالپى قۇنى 1,46 ترلن تەڭگەنى قۇرايتىن 100 جوبا بار. ولاردى جۇزەگە اسىرۋ ناتيجەسىندە 10,6 مىڭنان استام جاڭا جۇمىس ورنى اشىلادى دەپ جوسپارلانىپ وتىر. جوبالاردىڭ باسىم بولىگى ەنەرگەتيكا, تاۋ-كەن مەتاللۋرگياسى, اگروونەركاسىپتىك كەشەن سالالارىنا تيەسىلى, – دەدى يرينا سميت.
بيىل وڭىردە جالپى قۇنى 73,9 ملرد تەڭگە بولاتىن 18 ينۆەستيتسيالىق جوبانى ىسكە اسىرۋ جوسپارلانعان. بۇگىندە ونىڭ بەسەۋى پايدالانۋعا بەرىلدى. جىل باسىنان بەرى ينۆەستيتسيالىق پۋلعا جالپى قۇنى 320,2 ملرد تەڭگەنى قۇرايتىن 23 جاڭا جوبا ەنگىزۋگە قاتىستى جۇمىستار جۇرگىزىلدى. بارلىق وزەكتى ينۆەستيتسيالىق جوبالار ۇلتتىق تسيفرلىق ينۆەستيتسيالىق پلاتفورماعا ەنگىزىلىپ, مەملەكەتتىك ورگانداردىڭ سۇيەمەلدەۋىمەن اتقارىلادى. ينۆەستيتسيالىق كەلىسىمشارتتار اياسىندا وڭىردە وسىمدىك مايىن ءوندىرۋ, مال شارۋاشىلىعىن دامىتۋ, ءوندىرىس ورىندارىن جاڭعىرتۋ, قوناقۇي, ساۋىقتىرۋ كەشەندەرىن سالۋ باعىتىنداعى بىرقاتار ءىرى جوبا جۇزەگە اسىرىلىپ جاتىر.
تۋريزم سالاسىندا دا جاڭا ينۆەستيتسيالىق باستامالار قولعا الىنىپ وتىر. اتاپ ايتقاندا, بيىل كاتونقاراعاي اۋدانىندا قۇنى 8 ملرد تەڭگەنى قۇرايتىن 218 ورىندىق «Wellness Resort» ساناتوريلىك-ساۋىقتىرۋ كەشەنىنىڭ قۇرىلىسى باستالادى. «PANA ASIA» كومپانياسى كاتونقاراعاي اۋىلىنىڭ ماڭىندا 10 ملرد تەڭگەگە تۋريستىك اۋىل سالۋدى جوسپارلاپ وتىر. قازىردە جوبا بويىنشا ينۆەستيتسيالىق كەلىسىمشارت جاسالىپ جاتىر. بۇدان بولەك, كومپانيا سارىبەل اۋىلىندا حالىقارالىق دەڭگەيدەگى قوناقۇي كەشەنىن سالۋ مۇمكىندىگىن قاراستىرىپ وتىر. وسكەمەن قالاسىندا دا حالىقارالىق «Hilton Garden Inn» قوناقۇيىنىڭ قۇرىلىسى جوسپارلانعان. جوبانىڭ قۇنى – 17 ملرد تەڭگە.
مامانداردىڭ پىكىرىنشە, ينۆەستيتسيالىق بەلسەندىلىكتىڭ ارتۋى ءوڭىر ەكونوميكاسىنىڭ دامۋىنا سەرپىن بەرىپ قانا قويماي, تۋريزم ينفراقۇرىلىمىن جاڭعىرتىپ, جاڭا جۇمىس ورىندارىن اشۋعا مۇمكىندىك بەرەدى.
شىعىس قازاقستان وبلىسى
