«ك» توبىندا العاشقى ماتچىن وتكىزگەن پورتۋگاليا مەن كونگو دەموكراتيالىق رەسپۋبليكاسىنىڭ قۇرامالارى تەڭ تارقاسىپ, ءبىر ۇپايدان ەنشىلەدى. ويىننىڭ 6-مينۋتىندا جارتىلاي قورعاۋشى جواۋ نەۆەش ەسەپ اشىپ, پورتۋگاليا قۇراماسىن العا شىعاردى. ءبىرىنشى تايمنىڭ نەگىزگى ۋاقىتىنا قوسىلعان 5 مينۋتتىڭ ىشىندە كونگو قۇراماسىنىڭ شابۋىلشىسى يوان ۆيسسا تارازى باسىن تەڭەستىرىپ, ءوز ەلىنىڭ تاريحىندا الەم چەمپيوناتىندا گول سوققان العاشقى ويىنشى اتاندى. جاھاندىق مۋنديالعا 1974 جىلدان كەيىن ەكىنشى مارتە ات ءىزىن سالعان افريكالىق قۇراما وسىلاي ازۋىن كورسەتىپ, تۇڭعىش رەت ۇپاي ولجالادى.
اقش-تىڭ حيۋستون قالاسىنداعى «ەن-ەر-دجي ستەديۋم» ستاديونىندا وتكەن ويىندا الەمنىڭ تاڭداۋلى فۋتبولشىسى كريشتيانۋ رونالدۋ جارقىراپ كورىنە المادى. 41 جاستان ءتورت اي اسقان ساڭلاق التىنشى رەت الەم چەمپيوناتىنا قاتىسىپ وتىر. رونالدۋ ماتچ بارىسىندا ونىڭ شاۋ تارتىپ, شالدىعا باستاعانى انىق بايقالدى. الاڭدا بار-جوعى دا اسا بىلىنبەدى. ورتەكەدەي ويقاستاعاندا تۇلەپ سالا بەرەتىن سۇرمەرگەن سارقىلا باستاعانداي اسەر قالدىردى. ءتىپتى ارىپتەستەرى الدىنا اكەپ, اياعىنا سالىپ بەرگەن دوپتى قاقپاعا ءدال باعىتتاي الماي, پۇشايمان كۇيگە ءتۇستى. رونالدۋ الاڭدا 90 مينۋت بويى توبە كورسەتىپ جۇرگەنى بولماسا باۋىرىن جازا, قولتىعىن سوگە كوسىلە المادى.
«ك» توبىنداعى ەكىنشى ماتچ مەكسيكادا ءوتتى. مەحيكونىڭ ايگىلى «اتستەكا» ستاديونىندا وزبەكستان مەن كولۋمبيا قۇرامالارى شەبەرلىك بايقاستى. الەم چەمپيوناتىنا تۇڭعىش رەت ات بايلاعان وزبەك اعايىننىڭ ۇلتتىق قۇراماسى جاھان دوداسىن جاتىرقاعان جوق. جاسىل الاڭدا جاسىن ويناتىپ, قارسىلاستىڭ قىسىمىنا تويتارىس بەرە جىگەر تانىتتى. قورعانىس شەبىنىڭ مىقتىلىعى سونشالىق, كولۋمبيالىق فۋتبولشىلاردى تىرپ ەتكىزگەن جوق. ولاي دەيتىنىمىز كولۋمبيالىق شابۋىلشىلار وتكىر ءجۇسىپوۆ قورعاعان وزبەكستان ۇلتتىق قۇراماسىنىڭ قاقپاسىنا العاشقى تۋرا سوققىنى تەك 17-مينۋتتا عانا باعىتتاي الدى. انگليانىڭ «مانچەستەر سيتي» كومانداسىندا وينايتىن تالانتتى ابدۋقادىر حۋسانوۆ باستاعان تاسقامال قورعانىستى بۇزا العان جوق. دەگەنمەن دە مۇمكىندىكتى ءمۇلت جىبەرمەيتىن كولۋمبيا قۇراماسى دىتتەگەنىنە جەتتى. ماتچتىڭ 40-مينۋتىندا مۋنوس ەسەپ اشىپ, كولۋمبيالىقتار العا وزعان. ەكىنشى تايمدا ەڭسە تىكتەگەن وزبەك فۋتبولشىلارى 60-مينۋتتا گول سوقتى. 22 جاستاعى وزبەكستاننىڭ التىن ايدارلى ساقاسى اببوسبەك فايزۋللاەۆ الەم چەمپيوناتىنداعى العاشقى گولىن ەنشىسىنە جازدى. قارشىعاداي عانا جۇقالتاڭ جىگىت كولۋمبيا قۇراماسىنىڭ ەڭگەزەردەي قورعاۋشىلارىن كادىمگىدەي ساستىردى. ەۋروپانىڭ ەڭسەلى كلۋبتارىندا شىڭدالعان ەلدور شومۋرودوۆ باستاعان وزگە جىگىتتەر دە جاسىنداي جارقىلدادى.
65-مينۋتتا كولۋمبيالىق جارتىلاي قورعاۋشى لۋيس دياس ەنشىسىنە گول جازىپ, كومانداسىن العا شىعاردى. وزبەكستان قۇراماسىنىڭ ويىنشىلارى قارىمتا شابۋىلدى ورىستەتۋ تاكتيكاسىنا سۇيەنىپ, دوپ ايىرماشىلىعىن قىسقارتۋعا بارىن سالدى. باس تورەشى ەنتوني تەيلور (انگليا) ەكىنشى تايمنىڭ نەگىزگى ۋاقىتىنا 8-مينۋت قوستى. 90+8 مينۋتتا الاڭعا 72-مينۋتتا شىققان حامينتون كامپاس ءۇشىنشى گولدى سوعىپ ەتتى. ماتچ تۇگەسىلەر تۇستا وزبەكستان قۇراماسىنىڭ قورعاۋشىسى بەحرۋدجون كارىموۆتىڭ الىستان شىرەنە تەپكەن سوققىسى كولۋمبيا قۇراماسىنىڭ قاقپاسى ماڭدايىنان قايتتى.
يتاليالىق مامان فابيو كانناۆارو باپتايتىن وزبەكستان ۇلتتىق قۇراماسى ەكىنشى ماتچىندا پورتۋگاليا قۇراماسىنا قارسى ويناپ, قارسىلاسىنان ۇپاي ولجالاۋعا ۇمتىلادى.
بەيسەنبىنىڭ تاڭىنا اۋعان مەزگىلدە تەحاس شتاتىنداعى ارلينگتون قالاسىنداعى «ەي-تي-ەند-تي» ستاديونىندا «L» توبىنىڭ 1-تۋرى ويىنى ءوتتى. انگليا قۇراماسى حورۆاتيا فۋتبولشىلارىن 4:2 ەسەبىمەن ۇتتى. ماتچتىڭ 12-مينۋتىندا شابۋىلشى گارري كەين پەنالتيدەن ەسەپ اشىپ, اعىلشىندار العا وزدى. حورۆاتتار دا قاراپ قالماي, 36-مينۋتتا جارتىلاي قورعاۋشى مارتين باتۋرينا تارازى باسىن تەڭەستىردى. ءبىرىنشى تايمنىڭ 42-مينۋتىندا گارري كەين ەنشىسىنە ەكىنشى گولىن جازدى. 45+5-مينۋتتا پەتار مۇسا ەسەپتى تەڭەستىرگەنىمەن, ەكىنشى تايمدا حورۆاتيالىقتاردىڭ قورعانىسى سىر بەردى. 47-مينۋتتا انگليا قۇراماسىنىڭ جارتىلاي قورعاۋشىسى دجۋد بەللينگەم كومانداسىن العا شىعارسا, 85-مينۋتتا ماركۋس راشفورد ناتيجەنى 4:2-گە جەتكىزدى.
بۇل توپتاعى ەكىنشى, گانا مەن پاناما قۇرامالارى اراسىنداعى ماتچ كانادانىڭ تورونتو قالاسىنداعى «بي-ەم-و فيلد» ستاديونىندا ءوتتى. ماتچتىڭ نەگىزگى ۋاقىتىندا ەسەپ اشىلمادى, شۆەتسيالىق باس قازى گلەنن نيۋبەرگ 5 مينۋت قوسقان ەدى. كالەب يرەنكي 90+5-مينۋتتا ەنشىسىنە گول جازىپ, گانالىقتار 3 ۇپاي ولجالادى.
