مامىردا جۇمىس بەرۋشىلەر ۇزىن-سانى 104,7 مىڭ بوس جۇمىس ورنىن جاريالاسا, جۇمىس ىزدەۋشىلەردەن 123,3 مىڭ تۇيىندەمە تۇسكەن. الدىڭعى ايداعى كورسەتكىشپەن سالىستىرعاندا بوس جۇمىس ورىندارىنىڭ سانى 2,1%-عا ءوسىپ, تۇيىندەمە بىردەن 15,1%-عا ارتقان. سالالىق قۇرىلىمدا كادرلارعا ەڭ كوپ سۇرانىس ءبىلىم سالاسىندا تىركەلگەن. ناقتى سانمەن ايتساق, 20,2 مىڭ بوس جۇمىس ورنى. سول سەكىلدى وزگە دە قىزمەت تۇرلەرىن كورسەتۋ سالاسىندا – 15,5 مىڭ, اۋىل, ورمان جانە بالىق شارۋاشىلىعىندا – 10,7 مىڭ, وڭدەۋ ونەركاسىبىندە – 9,5 مىڭ, دەنساۋلىق ساقتاۋ, حالىققا الەۋمەتتىك قىزمەت كورسەتۋ سالاسىندا 9,4 مىڭ بوس جۇمىس ورنى جاريالانعان. وڭىرلەر بويىنشا, ەڭ كوپ بوس جۇمىس ورىندارى استانا قالاسى (8,5 مىڭ), پاۆلودار وبلىسى (7,2 مىڭ), الماتى قالاسى (6,7 مىڭ), اقمولا (6,6 مىڭ), قاراعاندى وبلىسىندا (6,4 مىڭ) تىركەلگەن.
جۇمىس ىزدەۋشىلەر اراسىندا ادەتتەگىدەي 35 جاسقا دەيىنگى ۇمىتكەرلەر باسىم. ولاردىڭ ۇلەسى بارلىق تۇيىندەمەنىڭ 39%-ىن قۇرايدى. 35-44 جاس ارالىعىنداعى ۇمىتكەرلەردىڭ ۇلەسى – 28%, 45-54 جاس ارالىعىنداعىلار – 20%, 55 جاستان اسقاندار – 13% شاماسىندا عانا. تۇيىندەمە جاريالاعان ايەلدەردىڭ ۇلەسى – 53%, ەرلەر – 47%. سالىستىرمالى تۇردە الىپ قاراساق, بىلىكتىلىك دەڭگەيىندە ۇسىنىس پەن سۇرانىس قۇرىلىمى بىرىمەن-ءبىرى سايكەس كەلەدى. مىسالى, تۇيىندەمەلەردىڭ 42%-ى ورتا بىلىكتى ماماندارعا تيەسىلى بولسا, 31%-ى – جوعارى بىلىكتى, 27%-ى – بىلىكتىلىگى تومەن جۇمىس ىزدەۋشىلەر.
مامىر ايىندا ۇشقىش ماماندىعىنا جۇمىس بەرۋشىلەر ءتاۋىر جالاقى ۇسىنسا, جۇمىس ىزدەۋشىلەر دە قاراپ قالماي, جوعارى جالاقى تالاپ ەتكەن. ماسەلەن, جۇمىس بەرۋشىلەر شامامەن 1,9 ملن تەڭگە كولەمىندە ەڭبەكاقى ۇسىنسا, جۇمىس ىزدەۋشىلەردىڭ كۇتكەن جالاقىسى 3,9 ملن تەڭگەنى قۇراعان. جوعارى ەڭبەكاقى ۇسىنعان باسقا بوس جۇمىس ورىندارىنىڭ ىشىندە باعدارلامالىق قامتاماسىز ەتۋ ساۋلەتشىسى (1,7 ملن تەڭگە), جابدىقتاردى سىناۋ جونىندەگى باسشى (1,6 ملن تەڭگە) بار. ال جوعارى جالاقى كۇتەتىن ۇمىتكەرلەر اراسىندا بورتسەرىكتەر (2,1 ملن تەڭگە) مەن جاق-بەت حيرۋرگى ماماندارى (2 ملن تەڭگە) بولدى.
