سۋرەت: 7-su.kz
بۇعان دەيىن مۇنداي جوعارى تەحنولوگيالى وپەراتسيالار نەگىزىنەن رەسپۋبليكالىق دەڭگەيدەگى ورتالىقتاردا عانا جاسالىپ كەلسە, ەندى ءوڭىر تۇرعىندارى كۇردەلى مەديتسينالىق كومەكتى ءوز وبلىسىندا الا باستادى. ءتورت ساعاتقا سوزىلعان وپەراتسياعا جەتىسۋ كارديولوگيالىق ورتالىعى مەن استانا قالاسىنداعى «جۇرەك ورتالىعىنىڭ» ماماندارى قاتىستى. جالپى سانى 15 مەديتسينا قىزمەتكەرى جۇمىلعان كۇردەلى حيرۋرگيالىق ارالاسۋ ءساتتى اياقتالدى. بۇل – ءبىر عانا وپەراتسيانىڭ ناتيجەسى ەمەس, جىلدار بويى قالىپتاسقان تاجىريبە مەن وڭىرلىك مەديتسينانىڭ جۇيەلى دامۋىنىڭ جەمىسى.
وبلىستىق كارديولوگيالىق ورتالىقتىڭ ديرەكتورى نۇرسانا سۋراشەۆتىڭ ايتۋىنشا, مۇنداي تەحنولوگيالاردى ەنگىزۋ جەرگىلىكتى تۇرعىندارعا جوعارى تەحنولوگيالى مەديتسينالىق كومەكتىڭ قولجەتىمدىلىگىن ارتتىرا تۇسەدى.
«بۇل ءبىزدىڭ ۇجىم ءۇشىن ۇلكەن كاسىبي تاجىريبە بولدى. الداعى ۋاقىتتا وسىنداي كۇردەلى وپەراتسيالاردى جەرگىلىكتى مامانداردىڭ وزدەرى دە تولىق كولەمدە ورىنداي الادى دەپ سەنەمىز. ەڭ باستىسى – جوعارى تەحنولوگيالى مەديتسينالىق كومەكتى حالىققا جاقىنداتۋ. ءار ناۋقاستىڭ ساپالى ەم الۋعا الىسقا سابىلماي, ءوز وڭىرىندە قاجەتتى كومەكتى الۋىنا جاعداي جاساۋىمىز كەرەك», دەيدى ورتالىق باسشىسى.
جاساندى سول جاق قارىنشا جۇرەك بۇلشىق ەتى السىرەگەن كەزدە ونىڭ قىزمەتىن قولداپ, اعزاداعى قان اينالىمىن قامتاماسىز ەتەدى. مۇنداي قۇرىلعى كوبىنە جۇرەك ترانسپلانتاتسياسىن كۇتىپ جۇرگەن نەمەسە جۇرەك جەتكىلىكسىزدىگىنىڭ سوڭعى ساتىسىنداعى ناۋقاستارعا ءومىر سىيلايتىن مۇمكىندىك رەتىندە قاراستىرىلادى.
بۇگىندە وبلىس كولەمىندە جۇرەك-قان تامىرلارى اۋرۋلارىمەن ديسپانسەرلىك ەسەپتە 90 مىڭعا جۋىق ادام تۇر. ولاردىڭ اراسىندا جوعارى تەحنولوگيالى مەديتسينالىق ارالاسۋدى قاجەت ەتەتىن ناۋقاستار دا بار. سوندىقتان مۇنداي وپەراتسيالاردىڭ وڭىردە قولعا الىنۋى مىڭداعان تۇرعىن ءۇشىن ماڭىزدى جاڭالىق. وسى رەتتە «جۇرەك ورتالىعىنىڭ» №2 كارديوحيرۋرگيالىق ءبولىمىنىڭ مەڭگەرۋشىسى سۆەتلانا نوۆيكوۆا دا بۇل باستامانىڭ الەۋمەتتىك ماڭىزىنا ەرەكشە توقتالدى.
«بۇرىن مۇنداي دياگنوزى بار ناۋقاستار مىندەتتى تۇردە استاناعا نەمەسە باسقا ءىرى قالالارعا جولداناتىن. بۇل ناۋقاستىڭ وزىنە عانا ەمەس, وتباسى مۇشەلەرىنە دە ۇلكەن سالماق تۇسىرەتىن. ەندى تۇرعىندار ەمدەۋ, باقىلاۋ, وڭالتۋ قىزمەتتەرىن ءوز وڭىرىندە الا الادى. بۇل مەديتسينالىق كومەكتىڭ قولجەتىمدىلىگىن ارتتىرىپ قانا قويماي, ادامداردىڭ ءومىر ساپاسىنا دا وڭ اسەر ەتەدى», دەيدى كار-ديوحيرۋرگ.
جالپى, كەيىنگى جىلدارى وڭىردە كارديولوگيالىق قىزمەت قارقىندى دامىپ كەلەدى. اشىق جۇرەككە جاسالاتىن وپەراتسيالارمەن قاتار, از ءينۆازيۆتى ەمدەۋ تاسىلدەرى دە كەڭىنەن ەنگىزىلۋدە. اتاپ ايتقاندا, اۋىر اريتميالاردى ەمدەۋگە ارنالعان ءۇش كامەرالى كارديوۆەرتەر-دەفيبريللياتورلار ورناتۋ, سونداي-اق ميترالدى قاقپاقشا جەتكىلىكسىزدىگىن اشىق وپەراتسياسىز تۇزەتۋگە مۇمكىندىك بەرەتىن MitraClip تەحنولوگياسى ءساتتى قولدانىلىپ جاتىر.
ارينە, وڭىردەگى مەديتسينا سالاسىندا مامان تاپشىلىعى ماسەلەسى ءالى دە وزەكتى. اسىرەسە جوعارى تەحنولوگيالى باعىتتاردا تاجىريبەلى دارىگەرلەرگە سۇرانىس جوعارى. دەگەنمەن, سوعان قاراماستان, جەرگىلىكتى ماماندار رەسپۋبليكالىق ورتالىقتارمەن تىعىز بايلانىس ورناتىپ, جاڭا تەحنولوگيالاردى مەڭگەرىپ, كۇردەلى وپەراتسيالاردى جۇزەگە اسىرىپ كەلەدى.
وبلىس اكىمى ءباسپاسوز قىزمەتىنىڭ مالىمەتىنشە, جىل باسىنان بەرى وبلىستىق كارديولوگيالىق ورتالىقتا كوروناروگرافيا, ستەنتتەۋ, اريتميانى ەمدەۋ باعىتىندا 1200-دەن استام جوعارى تەحنولوگيالى مەديتسينالىق قىزمەت كورسەتىلگەن. بۇل كورسەتكىش – ءوڭىر مەديتسيناسىنداعى وڭ وزگەرىستەردىڭ ناقتى كورىنىسى.
تالدىقورعاندا العاش رەت جاسالعان جاساندى قارىنشا يمپلانتاتسياسى – ءبىر ناۋقاستىڭ عانا ەمەس, تۇتاس ءوڭىر مەديتسيناسىنىڭ جەتىستىگى. جەرگىلىكتى دارىگەرلەردىڭ كاسىبي الەۋەتى ءوسىپ, زاماناۋي مەديتسينانىڭ مۇمكىندىكتەرى وبلىس تۇرعىندارىنا بۇرىنعىدان دا جاقىنداي تۇسكەنىنىڭ ايقىن دالەلى.
جەتىسۋ وبلىسى
