كاسىپكەرلەرگە قولايلى ەكونوميكالىق الاڭ

سالىق جەڭىلدىكتەرى قاراستىرىل­عان الاڭدا كاسىپ اشقىسى كەلەتىن وتان­دىق جانە شەتەلدىك بيزنەسمەندەردىڭ قاتارى كوبەيىپ كەلەدى. ءارى ارنايى ەكونوميكالىق ايماقتىڭ اقتاۋ قالا­سىمەن شەكتەلمەي, جاڭاوزەن قالا­سىندا دا ءوز الاڭىن اشۋى وڭىردەگى كاسىپ­كەرلەرگە قولايلى بولىپ وتىر. قازىر مۇنايلى قالادا اەا-نىڭ ەكى سۋبايماعى ورنالاسقان.

مۇنداعى نىساننىڭ ءبىرى – ونەركا­سىپ ايماعى. جالپى كولەمى 280 گەكتاردى قۇرايتىن الىپ اۋماقتىڭ وزىن­دە ءوڭىردىڭ يندۋستريالىق الەۋە­تىن ارتتىرۋعا باعىتتالعان ءۇش ينۆەستيتسيا­لىق جوبا جۇزەگە اسىرىلىپ جاتىر. جۋىردا «كاسكور-ماشزاۆود» مۇناي-گاز سالاسىنا ارنالعان سوراپ­تىق-كومپرەسسورلىق قۇبىرلار مەن سوراپتىق شتانگالار ءوندىرۋ جوباسىن ىسكە قوستى. جىلىنا 540 مىڭ دانا سوراپتىق شتانگا مەن 51 مىڭ توننا قۇبىر شىعاراتىن وندىرىستىك قۋاتتاعى كاسىپورىن تولىق دەڭگەيگە كوتەرىلگەندە 250 جاڭا جۇمىس ورنى اشىلادى. ينۆەستيتسيا كولەمى 17,3 ملرد تەڭگەنى قۇرايتىن كاسىپورىندا قازىر جۇمىسشىلاردى قابىلداۋ, وقىتۋ ۇردىستەرى ءجۇرىپ جاتىر.

الاڭداعى ەكىنشى نىسان – جاڭا­وزەندە اسفالتبەتون قوسپاسىن ءوندىرۋ جوباسى. 5 گەكتار اۋماقتا ورنالاسقان, قۇنى 300 ملن تەڭگە بولاتىن بۇل شاعىن ءوندىرىس 15 ادامدى جۇمىسپەن قامتىپ, جۇمىستارىن جول مەن ينفراقۇرىلىم باعىتىندا جۇرگىزەدى.

ال پوليەتيلەن قۇبىرلارىن ءوندىرۋ جانە مۇناي-گاز سالاسىنا ارنالعان قۇبىرلارعا ىشكى قورعانىش قاپتاما جاساۋعا نەگىزدەلگەن كاسپورىن 3 گەكتار اۋماقتى قامتيدى. ينۆەستيتسيا كولەمى 12 ملرد تەڭگەنى قۇرايتىن كاسىپورىن ىسكە قوسىلعان سوڭ 50 ادامدى تۇراقتى جۇمىسپەن قامتيتىن بولادى.

– جالپى, ارنايى ەكونوميكالىق ايماقتىڭ نەگىزگى ماقساتى – حالىقتى تۇراقتى جۇمىسپەن قامتۋ. وسى باعىت­تا ينۆەستورلار تارتىلىپ, جاڭا وندى­رىس­تەردى ىسكە قوسۋعا قولايلى جاع­داي جاسالىپ, كاسىپكەرلەرگە ينفراقۇرى­لىمدىق, اكىمشىلىك قولداۋ كورسەتى­لەدى. بۇل باعىتتاعى جۇمىس الداعى ۋاقىت­تا دا جۇيەلى تۇردە جالعاسىن تابا بەرە­دى, – دەيدى «اقتاۋ تەڭىز پورتى» اەا ات­قا­رۋشى ديرەكتورى گۇلميرا ايتكەنقىزى.

سونداي-اق ۇكىمەتتىڭ 2025 جىلعى 5 جەلتوقسانداعى قاۋلىسىنا سايكەس «اقتاۋ تەڭىز پورتى» اەا اۋماعىنا كەندىرلى كۋرورتتىق ايماعى قوسىلىپ, ارنايى ەكونوميكالىق ايماقتىڭ جالپى اۋماعى 9 814 گەكتارعا جەتتى. ناتي­جەسىندە, اەا يندۋستريالىق, پورتتىق, لوگيستيكالىق جانە تۋريستىك باعىتتاعى 15 سۋبايماقتى قامتۋعا قول جەتكىزدى.

ماڭعىستاۋ وبلىسى