فوتو: اشىق دەرەككوز
ونىڭ ايتۋىنشا سوڭعى ءۇش جىلدا شەتەلگە تۋىس ەمەس دونوردان باعانالى جاسۋشالاردى ترانسپلانتاتسيالاۋعا بالالاردى جىبەرۋ 3 ەسەگە, ال كارديوحيرۋرگيالىق ەمگە جولداۋ 5,2 ەسەگە قىسقاردى. جىل سايىن 2 مىڭنان استام بالاعا كارديوحيرۋرگيالىق وپەراتسيالار جاسالىپ, جۇرەك اقاۋلارى دەر كەزىندە تۇزەتىلىپ جاتىر. بيىل پروتوندىق, يودتەراپيا جانە تامىرلى اقاۋلاردى ەمدەۋ تولىق قولجەتىمدى بولادى.
ء«بىز مي ىسىكتەرى مەن تامىرلى پاتولوگيالاردى ءبىر ساتىلى ەمدەۋ ءۇشىن گيبريدتى وپەراتسيالىق بولمەلەردى ەنگىزىپ جاتىرمىز. قىزمەتتى جاڭعىرتۋ اياسىندا 36 بالاعا «گامما-پىشاق» اپپاراتىندا راديوحيرۋرگيالىق وپەراتسيالار جۇرگىزىلدى. جىل سايىن 400 بالاعا ەستۋ يمپلانتتارى ورناتۋ بويىنشا وپەراتسيالار جاسالادى, ورتا ەسەپپەن 700 شالا تۋعان نارەستەگە رەتينوپاتيانى تۇزەتۋ جۇرگىزىلەدى. جوسپارلانعان ءىس-شارالاردىڭ بارلىق كەشەنى ازاماتتاردىڭ شەتەلگە ەمدەلۋگە جىبەرىلۋىن 50%-عا تومەندەتۋگە مۇمكىندىك بەرەدى», دەدى مينيستر.
«قازاقستان بالالارى»: تۇجىرىمداما بالالارعا قاتىستى قانداي ماسەلەلەردى شەشەدى؟
سونداي-اق مينيستر مەكتەپتەردەگى مەديتسينالىق پۋنكتتەردى دەفيبريللياتورلارمەن جابدىقتاۋ جانە ستوماتولوگيالىق كابينەتتەرىن اشۋ ماسەلەلەرىنە توقتالدى.
«مەكتەپتەردىڭ مەديتسينا قىزمەتكەرلەرى جازاتايىم وقيعالار كەزىندە عانا ەمەس, شۇعىل جاعدايدا دا كومەك كورسەتۋگە دايىن بولۋى ءتيىس. سوندىقتان مەكتەپتەردى دەفيبريللياتورلارمەن قامتاماسىز ەتۋ وتە ماڭىزدى. وسى ورايدا, اكىمدەردەن جاراقتاندىرۋعا ءتيىستى قارجىلاندىرۋ قاراستىرۋىن سۇرايمىن. الداعى 3 جىل ىشىندە قوسىمشا 862 ستوماتولوگيالىق كابينەت اشۋدى جوسپارلاپ وتىرمىز», دەدى اقمارال ءالنازاروۆا.
مينيستر سونداي-اق ەلىمىزدە نارەستە ءولىمى ەكى جىلدا 13%-عا تومەندەگەنىن اتاپ ءوتتى.
