سۋرەت: primeminister.kz
پرەزيدەنت ايتقانداي, جاڭاشىل تەحنولوگيالار جاڭا ورتا قالىپتاستىردى.
«جاساندى ينتەللەكت زامانىنا بەيىمدەلە بىلگەن, سوعان قاراپ تىرشىلىگىن تۇزگەن, ءتىپتى جاڭا ۇدەرىستەرگە ناقتى ءارى بەلسەنە قاتىسقان ەلدەر عانا تابىسقا جەتپەك. سوندىقتان قازاقستان تسيفرلاندىرۋ ءىسىن قارقىندى دامىتىپ, جەكە جانە قوعامدىق ءومىردىڭ بارلىق سالاسىنا جاساندى ينتەللەكتىنى ەنگىزە باستادى», دەدى قاسىم-جومارت كەمەل ۇلى.
ايتسە دە مەملەكەت باسشىسى تسيفرلاندىرۋ جانە جاساندى ينتەللەكت جىلى ءسان قۋىپ, ۇرانداتۋ ءۇشىن جاريالانباعانىن دا ەسكە سالدى. راس, بۇل شەشىم ۇكىمەت مۇشەلەرىنە ناقتى مىندەتتەر جۇكتەپ وتىر.
وسى ورايدا مەملەكەتتىك قارجى جۇيەسىنىڭ تسيفرلىق ترانسفورماتسياسىنا جەتەكشىلىك ەتەتىن ادام رەتىندە بۇعان قاتىستى ءوز كوزقاراسىمدى جەتكىزۋدى ورىندى دەپ سانايمىن. تۇتاستاي العاندا, كەز كەلگەن تەحنولوگيانىڭ كوزدەگەن ماقساتى – ادامدارعا قولعابىس ەتۋ. بۇل ەڭبەك ونىمدىلىگىندە, وپەراتسيالىق ۇدەرىستەردىڭ تيىمدىلىگىندە, سول سەكىلدى قىزمەت ساپاسىنىڭ جاقسارۋى مەن قاعازباستىلىق سىندى بيۋروكراتيالىق كەدەرگىلەردىڭ ازايۋىنان بايقالۋعا ءتيىس.
قۋانتارلىعى سول, قارجى مينيسترلىگى بۇل باعىتتا ءبىرشاما جۇمىستى قولعا الدى. وسىنداي وزىق شەشىمدەرىمىزدىڭ ءبىرى – كاسىپكەردىڭ بىرىڭعاي جەكە كابينەتى. اتالعان جوبا قازىر قاناتقاقتى رەجىمدە ىسكە قوسىلعان. ونى قاتارداعى پلاتفورما رەتىندە قابىلداۋ قاتە. بۇل – مەملەكەت پەن بيزنەستىڭ ءوزارا بايلانىسىن جاقسارتا تۇسەتىن تىڭ جۇيە جانە ول ادامداردىڭ ناقتى قاجەتتىلىكتەرىنە باعدارلانعان. ياعني كاسىپكەر ۋاقىتىن ءتۇرلى جۇيەدە قاجەتتى قىزمەتتەردى ىزدەۋگە ەمەس, كەرىسىنشە كاسىبىن دامىتۋعا كوڭىل بولۋگە ءتيىس. ءبىزدىڭ تسيفرلى ءونىمدى قولعا الۋداعى ماقساتىمىز دا وسى بولاتىن.
ۇزاق جىل وتاندىق بيزنەس وكىلدەرىنە بىرنەشە اقپاراتتىق پلاتفورمادا جۇمىس ىستەۋگە تۋرا كەلدى. كاسىپكەردىڭ بىرىڭعاي جەكە كابينەتى مۇنىڭ ءبارىن ءبىرتۇتاس تسيفرلىق كەڭىستىكتە بىرىكتىرىپ, قارجى مينيسترلىگىنىڭ قىزمەتتەرىنە ءبىر جەردەن كىرۋگە جول اشادى. وندا كومپانيا مەن ونىڭ قىزمەتتەرى تۋرالى نەگىزگى مالىمەتتەر, قارجى مينيسترلىگى جۇيەلەرىنىڭ بارلىق حابارلاماسى, سەرۆيسپەن جۇمىس ىستەۋ كەزىندە كەمشىلىكتەردى بولدىرماۋعا كومەكتەسەتىن كەڭەستەر قامتىلعان.
جاساندى ينتەللەكت بيزنەس-كومەكشىسىنە ەرەكشە توقتالعىم كەلەدى. ول سالىق ماسەلەلەرىن شەشۋگە كومەكتەسىپ, دەكلاراتسيالاردى تولتىرۋ ءتارتىبى بويىنشا كەڭەس بەرىپ, مىندەتتەمەلەردى ەسكە سالادى. بۇعان قوسا چەكتەر مەن ىسكەرلىك بەلسەندىلىك دەرەكتەرى نەگىزىندە جي جاڭا كاسىپتى باستاۋعا ارنالعان جايلى لوكاتسيانى (ورىندى) تاڭداۋعا كومەكتەسەدى. سونداي-اق مەملەكەتتىك ساتىپ الۋلار مەن تەندەرلەرگە قاتىسۋ مۇمكىندىكتەرى تۋرالى اقپاراتتى كورسەتۋگە قاۋقارلى. قازىر بولجام جاساۋ فۋنكتسياسى استانا قالاسى بويىنشا جۇمىس ىستەپ تۇر. بولاشاقتا ونىڭ گەوگرافياسىن ءبىرىزدى تۇردە كەڭەيتەمىز.
ءبىز بۇل پلاتفورمانى دامۋ كەزەڭىندە سانالى تۇردە قولدانىسقا ەنگىزىپ وتىرمىز, وسى ارقىلى جۇيە كاسىپكەرلىك قوعامداستىقپەن بىرگە قالىپتاسىپ, بيزنەستىڭ ناقتى سۇرانىستارىنا يكەمدەلەدى.
اسەت تۇرىسوۆ,
قارجى ۆيتسە-ءمينيسترى
