رەفورمانىڭ وزەگى − پارلامەنتتىڭ ءرولىن كۇشەيتۋ جانە ونى حالىقتىق بيلىكتىڭ شىنايى ينستيتۋتىنا اينالدىرۋ. ءبىر پالاتالى پارلامەنتكە كوشۋ جانە ونى حالقىمىزدىڭ ءتول تاريحىنداعى قاستەرلى ۇعىم − قۇرىلتاي دەپ اتاۋ تۋرالى ۇسىنىس بيلىك پەن قوعامنىڭ اراسىنداعى التىن كوپىردى قايتا قالپىنا كەلتىرەدى.
مەملەكەت باسشىسى جاڭا پارلامەنتتىڭ اتاۋىن «قۇرىلتاي» دەپ اتاۋدى ۇسىندى
بۇل رەفورما پارلامەنتتىڭ زاڭ شىعارۋ قىزمەتىن دە تۇبەگەيلى وزگەرتەدى: ەندىگى جەردە زاڭ جوبالارى ءۇش كەزەڭنەن تۇراتىن جاڭا پروتسەدۋرامەن – الدىمەن جالپى ماقۇلداۋ, سوسىن وزگەرىستەردى بەكىتۋ جانە سوڭعى كەزەڭدە قابىلداۋ ارقىلى وتپەك. مۇنداي ءتاسىل قابىلداناتىن زاڭداردىڭ ساپاسىن ارتتىرىپ, ءاربىر نورمانىڭ جان-جاقتى ساراپتالۋىن قامتاماسىز ەتەدى. وسىلايشا, پارلامەنت قىزمەتىن قايتا قۇرۋ ارقىلى مەملەكەتتىڭ ينستيتۋتسيونالدىق تۇعىرى نىعايىپ, «كۇشتى پرەزيدەنت − ىقپالدى پارلامەنت − ەسەپ بەرەتىن ۇكىمەت» قاعيداتىنا نەگىزدەلگەن ورنىقتى ساياسي جۇيە تولىققاندى قالىپتاسادى.
پارلامەنتتىك رەفورمانىڭ تاعى ءبىر ماڭىزدى قىرى − دەپۋتاتتىق كورپۋستىڭ جاساقتالۋ ءپرينتسيپى. پرەزيدەنتتىڭ ءوز كۆوتاسىنان جانە قازاقستان حالقى اسسامبلەياسىنىڭ ارنايى كۆوتاسىنان باس تارتۋى مەملەكەتتى دەموكراتيالاندىرۋ جولىنداعى تەڭدەسسىز ەرىك-جىگەردىڭ كورىنىسى بولىپ تابىلادى. ەندىگى كەزەكتە دەپۋتاتتار تەك قانا باسەكەلەستىك نەگىزدە, ورتاق تارتىپپەن سايلانادى. بۇل رەتتە ماندات سانىنىڭ 145-كە دەيىن وڭتايلانۋى مەن كوميتەتتەر سانىنىڭ سەگىزدەن اسپاۋى − پارلامەنتتىڭ كاسىبيلىگى مەن جەدەلدىگىن ارتتىرۋعا باعىتتالعان ناقتى قادام.
رەفورما زاڭ شىعارۋشى ورگانعا مەملەكەتتىك ماڭىزدى قۇرىلىمداردى باقىلاۋ قۇزىرەتىن دە بەرەدى: كونستيتۋتسيالىق سوت, جوعارى اۋديتورلىق پالاتا مەن ورتالىق سايلاۋ كوميسسياسى مۇشەلەرىن تاعايىنداۋ, ءتىپتى جوعارعى سوت سۋديالارىن سايلاۋ ەندى تەك پارلامەنتتىڭ كەلىسىمىمەن جۇزەگە اسىرىلادى. بۇل «تەپە-تەڭدىك پەن تەجەمەلىك» جۇيەسىن ناقتى ىسكە قوسىپ, پارلامەنتتىڭ ساياسي سالماعىن ارتتىرا تۇسەدى. سونىمەن قاتار, ۆيتسە-پرەزيدەنت ينستيتۋتىنىڭ ەنگىزىلۋى مەن قازاقستاننىڭ حالىق كەڭەسىنىڭ قۇرىلۋى بيلىك يەرارحياسىن تۇراقتاندىرىپ, حالىق پەن بيلىك اراسىنداعى ديالوگتىڭ جاڭا تريبۋناسىنا اينالماق.
پرەزيدەنتتىڭ بيلىك باسىنا كەلۋدىڭ تەك زاڭدى سايلاۋ ارقىلى جۇزەگە اسۋى تيىستىگى تۋرالى ۇستانىمى, اتاپ ايتقاندا, مەملەكەت باسشىسى قىزمەتىنەن مەرزىمىنەن بۇرىن كەتكەن جاعدايدا ەكى اي ىشىندە سايلاۋ وتكىزۋ نورماسىن اتا زاڭدا شەگەلەپ بەكىتۋى − مەملەكەتتىڭ بولاشاق قاۋىپسىزدىگى مەن ساياسي ساباقتاستىعىنىڭ كەپىلى. بۇل اۋقىمدى رەفورمالار جيىنتىعى, شىن مانىندە, جاڭا كونستيتۋتسيا قابىلداۋمەن پارا-پار قادام. ءبىز ادىلەتتى قازاقستاننىڭ ىرگەتاسىن بىرگە قالاپ, مەملەكەتتىلىكتىڭ جاڭا دەڭگەيىنە قادام باسىپ وتىرمىز. سوندىقتان بۇل ستراتەگيالىق باستامالاردىڭ ەل يگىلىگىنە قىزمەت ەتەتىنىنە كامىل سەنەمىن.
مەيىرگۇل جەتپىسباەۆا,
ءال-فارابي اتىنداعى قازۇۋ-دىڭ اعا وقىتۋشىسى, ف.ع.ك.
