فوتو: اشىق دەرەككوز
باعانىڭ بۇلاي وسۋىنە ەڭ الدىمەن ينفلياتسيادان تىس فاكتورلار اسەر ەتكەن. نەگىزگى سەبەپ – شيكىزات قۇنىنىڭ كۇرت قىمباتتاۋى. جىل سوڭىنا قاراي ءداندى كوفەنىڭ باعاسى 36,3 پايىزعا ءوستى. سونىڭ سالدارىنان ەريتىن كوفە دە, دايىن كوفەلىك سۋسىندار دا قىمباتتادى.
بۇل جاعداي تەك قازاقستانعا عانا ءتان ەمەس. كوفە بۇكىل الەمدە قىمباتتاپ جاتىر. حالىقارالىق Trading Economics پورتالىنىڭ مالىمەتىنشە, 2025 جىلدىڭ جەلتوقسانىندا الەمدىك بيرجادا كوفە فۋنتى 4,1 اقش دوللارىنا جەتكەن. بۇل – سول جىلدىڭ قاڭتارىمەن سالىستىرعاندا 28,1 پايىزعا جوعارى.
الەمدىك باعانىڭ وسۋىنە كليماتتىڭ وزگەرۋى نەگىزگى سەبەپ بولىپ وتىر. ارابيكا وندىرەتىن باستى ەل – برازيليادا بىلتىر قۋاڭشىلىق بولدى. ال ۆەتنامدا 2025 جىلدىڭ جازىنداعى اپتاپ ىستىق روبۋستا ونىمىنە كەرى اسەرىن تيگىزدى. ناتيجەسىندە الەمدىك نارىقتا ۇسىنىس ازايدى.
نەلىكتەن تاڭەرتەڭ كوفە ىشۋگە بولمايدى: كارديولوگ تۇسىنىكتەمە بەردى
سوعان قاراماستان, قازاقستانداعى كوفە باعاسى ءالى دە ەڭ جوعارى ەلدەردىڭ قاتارىنا كىرمەيدى. Numbeo رەيتينگىندە 2026 جىلدىڭ قاڭتارىندا قازاقستان كاپۋچينو باعاسى بويىنشا 103 ەلدىڭ ىشىندە 77-ورىنعا جايعاستى. بىزدە ءبىر كەسە كاپۋچينو ورتا ەسەپپەن 2,2 دوللار نەمەسە شامامەن 1,1 مىڭ تەڭگە تۇرادى. بۇل ەۋروپانىڭ الدىڭعى قاتارلى ەلدەرىنەن بىرنەشە ەسە ارزان. مىسالى, دانيادا ءبىر كەسە كوفە 6,6 دوللار, شۆەيتساريادا 6,2 دوللار تۇرادى.
ەاەو ەلدەرىمەن سالىستىرعاندا دا قازاقستانداعى باعا ورتاشا دەڭگەيدە. رەسەيدە كاپۋچينو 2,6 دوللار, بەلارۋستە 2 دوللار, وزبەكستاندا 1,9 دوللار شاماسىندا.
قازاقستان ءۇشىن كوفە – تولىقتاي يمپورتتىق ءونىم. ول 47 ەلدەن اكەلىنەدى. نەگىزگى جەتكىزۋشى – برازيليا. كەدەندىك ستاتيستيكاعا سايكەس, 2025 جىلدىڭ قاڭتار-قازان ايلارىندا وسى ەلدىڭ ۇلەسى قازاقستانعا يمپورتتالعان كوفەنىڭ 39,9 پايىزىن قۇراعان. وسى كەزەڭدە برازيليادان شامامەن 1,5 مىڭ توننا كوفە جەتكىزىلگەن, بۇل ءبىر جىل بۇرىنعىدان ءبىر جارىم ەسە كوپ. ەكىنشى ورىندا رەسەي تۇر – 937,7 توننا. ساراپشىلار بۇل كولەمنىڭ ەداۋىر بولىگى رەەكسپورت بولۋى مۇمكىن ەكەنىن ايتادى.
سوڭعى ەكى جىلداعى دەرەكتەر تاعى ءبىر ءۇردىستى كورسەتەدى. قازاقستان ۆەتنامنان كوفە يمپورتىن 3,4 ەسە, قىتايدان 43,9 ەسە ارتتىرعان. بۇل ەلدىڭ برازيليالىق جەتكىزىلىمگە بالاما جولداردى ىزدەي باستاعانىن اڭعارتادى.
جالپى, 2025 جىلدىڭ قاڭتار-قازان ايلارىندا قازاقستانعا 3,7 مىڭ توننا كوفە اكەلىنگەن. بۇل – وتكەن جىلمەن سالىستىرعاندا 26,9 پايىزعا كوپ جانە سوڭعى بىرنەشە جىلداعى ەڭ جوعارى كولەم. اقشالاي ماندە يمپورت بىردەن 60,4 پايىزعا ءوسىپ, 36,9 ملن دوللارعا جەتكەن.
الەمدىك ساراپشىلار قىمباتشىلىق سالدارىنان كەي ەلدەردە ادامدار كوفەدەن باس تارتا باستاعانىن ايتادى. ال قازاقستاندا كەرىسىنشە جاعداي بايقالادى. ۇلتتىق ستاتيستيكا دەرەكتەرىنە قاراعاندا, سوڭعى ءۇش جىلدا قازاقستان ازاماتتارى ەريتىن كوفەنى كوبىرەك تۇتىنا باستاعان. بىلتىرعى ءۇشىنشى توقساندا ءبىر ادامعا شاققانداعى ورتاشا تۇتىنۋ 77 گراممدى قۇراعان. بۇل الدىڭعى جىلمەن سالىستىرعاندا 4,1 پايىزعا جوعارى.
