Polisia.kz-ءتىڭ جازۋىنشا 17 قاڭتار كۇنى ساعات 07:33-تە ەكىباستۇز قالاسىنداعى سۋ قويماسىندا Mitsubishi Delica ماركالى اۆتوكولىكتىڭ مۇز ويىلىپ, سۋعا باتىپ كەتكەنى تۋرالى حابارلاما تۇسكەن. اتالعان كولىكتە بالىق اۋلاۋعا شىققان ءتورت ازامات بولعان.
وقيعا ورنىنا جەدەل تۇردە ۋچاسكەلىك پوليتسيا ينسپەكتورى ارحار وسپانوۆ جەتىپ, اۆتوكولىك پەن بالىقشىلاردىڭ ورنىن انىقتاعان. كەيىن ول كوورديناتتاردى جەدەل-تەرگەۋ توبىنا جانە توتەنشە جاعدايلار قىزمەتىنە جەتكىزگەن.
اقمولا وبلىسىندا 45 جاستاعى بالىقشى سۋعا باتىپ كوز جۇمدى
– جۇرگىزىلگەن ءىس-شارالاردىڭ ناتيجەسىندە ءتورت ەر ادام دا قۇتقارىلىپ, ولارعا العاشقى مەديتسينالىق كومەك كورسەتىلدى. قۇتقارۋ كەزىندە ولار قاتتى توڭعان. سۋعا تۇسكەن كيىمدەرى مۇز بولىپ قاتىپ قالعاندىقتان, بىردەن كولىككە وتىرا المادى. شالبارلارىن قايشىمەن كەسۋگە تۋرا كەلدى. بالىقشىلاردىڭ ەشقايسىسى جاراقات العان جوق, بارلىعى ءۇسىپ قالۋ بەلگىلەرىمەن اۋرۋحاناعا جەتكىزىلدى, – دەدى ەكىباستۇز قالالىق پوليتسيا باسقارماسىنىڭ باستىعى تولەگەن قۇدايبەرگەنوۆ.
ۆەدومستۆو مالىمەتىنشە, ەر ادامدار ەسكەرتۋلەرگە جانە قاتتى ايازعا قاراماستان بالىق اۋلاۋعا شىققان. مۇز ۇستىنە شىعىپ, قۇرال-جابدىقتارىن تۇسىرگەننەن كەيىن اۆتوكولىك مۇز استىنا كەتىپ, ونى شىعارۋ مۇمكىن بولماعان.
پوليتسيا ازاماتتاردىڭ قاۋىپسىزدىگى ءبىرىنشى ورىندا ەكەنىن اتاپ ءوتىپ, تۇرعىنداردى قاتتى اياز كەزىندە الىس جولعا شىقپاۋعا جانە ساقتىق شارالارىن قاتاڭ ساقتاۋعا شاقىردى.
