ۆەدومستۆونىڭ ناقتىلاۋىنشا, 14 قاڭتار كۇنى كەشكە پوليتسياعا پەتروپاۆل قالاسىنداعى 314-اتقىشتار ديۆيزياسى كوشەسىندەگى ۇيلەردىڭ بىرىندە تۇراتىن 75 جاستاعى ايەلدىڭ جوعالىپ كەتكەنى تۋرالى ارىز تۇسكەن.
انىقتالعانداي, سول كۇنى شامامەن ساعات 13:00-دە زەينەتكەر ايەل وزدىگىنەن ۇيىنەن شىعىپ, اۋرۋحاناعا بەت العان, الايدا قايتا ورالماعان. ۇيالى تەلەفونى ءسوندىرۋلى كۇيدە بولعان.
«ىزدەۋ جۇمىستارىنا قالالىق پوليتسيا باسقارماسى مەن وبلىستىق پوليتسيا دەپارتامەنتىنىڭ قىزمەتكەرلەرى, سوبر جاۋىنگەرلەرى, ۇلتتىق ۇلان اسكەري قىزمەتشىلەرى, سونداي-اق ەرىكتىلەر جۇمىلدىرىلدى. ىزدەۋگە 60-تان استام ادام قاتىستى. اۋا تەمپەراتۋراسىنىڭ تومەن بولۋى جۇمىستاردى ەداۋىر قيىنداتتى. جوعالۋدىڭ ىقتيمال نۇسقالارى قاراستىرىلىپ, مۇمكىن بولاتىن ورىندار تەكسەرىلدى, كوشە بەينەباقىلاۋ كامەرالارىنىڭ جازبالارى زەردەلەندى. الايدا قاراڭعى ۋاقىتتا جوعالعان ادامنىڭ جۇرگەن جەرىن انىقتاۋ مۇمكىن بولمادى», دەپ حابارلادى وڭىرلىك پوليتسيا دەپارتامەنتى.
15 قاڭتار كۇنى تاڭەرتەڭ قارت ايەلدى ۋچاسكەلىك ينسپەكتور اۋرۋحانا ماڭىنداعى شارۋاشىلىق عيماراتتىڭ جانىندا, ادام سيرەك جۇرەتىن اۋماقتاعى قورشاۋ ماڭىنان تاپقان.
ايەل اۋىر جاعدايدا بولعان, قاتتى توڭۋدىڭ سالدارىنان بايلانىسقا شىعا الماعان. ول دەرەۋ جەدەل جاردەم بريگاداسىنا تاپسىرىلعانىمەن, وكىنىشكە قاراي, ونىڭ ءومىرىن ساقتاپ قالۋ مۇمكىن بولمادى.
اتالعان دەرەك بويىنشا پوليتسيا زەينەتكەر ايەلدىڭ ولىمىنە قاتىستى قىلمىستىق ءىس قوزعادى.
بۇگىن ەلىمىزدىڭ 12 وڭىرىندە اۋا رايىنا بايلانىستى داۋىلدى ەسكەرتۋ جاريالاندى.
