فوتو: اقوردا
قاسىم-جومارت توقاەۆ يۋريكو كويكەنىڭ جەتەكشىلىگىمەن توكيو الەمدەگى ەڭ قاۋىپسىز, تازا ءارى ءتيىمدى باسقارىلاتىن مەگاپوليستەردىڭ بىرىنە اينالعانىن ايتتى.
ء«سىزدى جاھاندىق دەڭگەيدەگى كورنەكتى ساياساتكەر رەتىندە تانيمىز. كورەگەن باسشىلىعىڭىز بەن ەلىڭىز ءۇشىن ۇزاق جىلدار بويى اتقارعان قىزمەتىڭىز قۇرمەتكە لايىق. قازاقستان جۇرتشىلىعى ءسىزدى مەملەكەت قايراتكەرى جانە ەلىمىزدىڭ دوسى, سەرىكتەسى دەپ بىلەدى. قازاقستاننىڭ تاريحى مەن مادەنيەتىن دارىپتەۋگە باعىتتالعان ەڭبەگىڭىزدى جوعارى باعالايمىز. بۇل قوس حالىقتىڭ ىنتىماعىن ارتتىرا تۇسەدى», دەدى مەملەكەت باسشىسى.
پرەزيدەنت جاپونياعا بىلتىر جاساعان رەسمي ساپارىن ىقىلاسپەن ەسكە الىپ, سونىڭ ناتيجەسىندە ەكىجاقتى قارىم-قاتىناس جاڭا ءارى ساپالى دەڭگەيگە كوتەرىلگەنىنە نازار اۋداردى.
«مەن توكيونىڭ «اقىلدى قالا» باعدارلاماسىمەن تانىستىم. بۇل ءبىزدىڭ قىزىعۋشىلىعىمىزدى تۋدىردى. سەبەبى ەلىمىزدە دە Smart City تۇجىرىمداماسىن ىلگەرىلەتىپ وتىرمىز. ءسىزدىڭ استاناعا كەلگەن ساپارىڭىز پايدالى بولارىنا سەنىمدىمىن. ويتكەنى ءبىز ىنتىماقتاستىقتى ودان ءارى نىعايتۋعا جانە مەگاپوليستى باسقارۋ تاجىريبەسىن زەردەلەۋگە ىنتالىمىز», دەدى قاسىم-جومارت توقاەۆ.
توكيو گۋبەرناتورى مەملەكەت باسشىسىنا قوناقجايلىق تانىتقانى ءۇشىن ريزاشىلىعىن جەتكىزدى.
ء«سىزدىڭ كوشباسشىلىعىڭىزدى, سونداي-اق ەكونوميكالىق ءوسىم, جاساندى ينتەللەكت, تسيفرلاندىرۋ جانە ينۆەستيتسيا تارتۋ باعىتتارىن دامىتۋدى كوزدەيتىن ىرگەلى رەفورمالارىڭىزدى جوعارى باعالايمىن. قازاقستان وڭىردەگى ەكونوميكاسى ءىرى, رەسۋرسى مول ەل رەتىندە ەۋروپا مەن ازيانى جالعايتىن ورتالىق ازياداعى باستى حاب ءرولىن نىعايتىپ كەلەدى», دەدى يۋريكو كويكە.
پرەزيدەنت پەن گۋبەرناتور تسيفرلىق تەحنولوگيا, يننوۆاتسيا, حالىقارالىق قارجى جانە ءبىلىم بەرۋ سەكىلدى نەگىزگى سالالاردا سەرىكتەستىك ورناتۋ مۇمكىندىگىن قاراستىردى.
قاسىم-جومارت توقاەۆ قازاقستان مەن جاپونيا اراسىنداعى دوستىق بايلانىستاردى نىعايتۋعا ەلەۋلى ۇلەس قوسقانى ءۇشىن يۋريكو كويكەنى ءى دارەجەلى «دوستىق» وردەنىمەن ماراپاتتادى.
بۇعان دەيىن پرەزيدەنتكە پاۆلودار وبلىسىنىڭ اكىمى ءوڭىردىڭ بىلتىرعى جانە 2026 جىلدىڭ ءبىرىنشى توقسانىنداعى الەۋمەتتىك-ەكونوميكالىق دامۋى جايىندا مالىمەت بەردى.
