فوتو: اقمولا وبلىسى اكىمدىگى
ونىڭ ايتۋىنشا تاپسىرمانى ورىنداۋ كەزەڭىندە رەسپۋبليكالىق بيۋدجەتتەن شامامەن 835 ملرد تەڭگە بولىنگەن. ونىڭ ىشىندە قايتارىلعان اكتيۆتەر ەسەبىنەن ارناۋلى مەملەكەتتىك قوردان 132 ملرد تەڭگە جۇمسالعان.
«وسى قاراجاتقا 34 قالا مەن 756 اۋىل ورتالىقتاندىرىلعان سۋ جۇيەسىمەن قامتىلدى. وعان قوسىمشا, جەرگىلىكتى بيۋدجەت ەسەبىنەن 699 اۋىلدا كەشەندى بلوك-مودۋلدەر ورناتىلدى. سالىستىرمالى تۇردە ايتساق, 2021 جىلى اۋىل حالقىنىڭ 90%-ى جانە قالا حالقىنىڭ 97,5%-ى سۋمەن جابدىقتاۋ قىزمەتتەرىنە قول جەتكىزگەن ەدى. وسىلايشا, مەملەكەت باسشىسىنىڭ تاپسىرماسى تولىق ورىندالىپ, ەلىمىزدەگى 90 قالا مەن 7,5 ملن تۇرعىنى بار 6087 اۋىل اۋىز سۋمەن تولىق قامتاماسىز ەتىلىپ وتىر», دەدى ۆيتسە-مينيستر.
سۋمەن جابدىقتاۋ ساپاسىندا بارلىعى 9,5 مىڭ شاقىرىم ماگيسترالدىق جەلى رەكونسترۋكتسيالانىپ, ۇلكەيتىلگەن. ونىڭ ىشىندە قالالاردا – 1,8 شاقىرىم, اۋىلداردا – 7,7 مىڭ شاقىرىم سۋمەن جابدىقتاۋ جۇيەسى جاڭعىرتىلعان. بۇل جۇمىستار جەلىلەردىڭ توزۋ دەڭگەيىن – 38%-عا دەيىن تومەندەتۋگە مۇمكىندىك بەردى. سونىمەن قاتار سۋمەن جابدىقتاۋدى جانە كوممۋنالدىق ينفراقۇرىلىمدى دامىتۋ جۇمىستارى جالعاسىپ جاتىر. وسى باعىتتا 2026 جىلعا جالپى ترانسفەرتتەر اياسىندا 128 ملرد تەڭگە ءبولىندى, ونىڭ ىشىندە سۋمەن جابدىقتاۋعا – 78 ملرد تەڭگە, سۋ بۇرۋعا 50 ملرد تەڭگە باعىتتالعان.
قوسىمشا جاڭعىرتۋ جۇمىستارى ەنەرگەتيكا مەن كوممۋنالدىق سەكتوردى جاڭعىرتۋعا ارنالعان ۇلتتىق جوبا اياسىندا نەسيەلىك قاراجاتتار ەسەبىنەن جۇرگىزىلەتىن بولادى.
بىلتىر ەل وڭىرلەرىندەگى بىرنەشە ەلدى مەكەنگە تازا اۋىز سۋ بەرىلگەنىن حابارلاعانبىز. ماسەلەن, وتكەن جىلى شالعايداعى اقباستىعا سۋ جەتىپ, سىر ءوڭىرى اۋىز سۋ ماسەلەسىن تولىق شەشتى.
سونداي-اق, ۇلىتاۋ وبلىسىنداعى كەڭگىر اۋىلى گازعا قوسىلىپ, تازا اۋىز سۋمەن قامتىلدى.
ماڭعىستاۋدا دا اۋىز سۋ تاپشىلىعى جوق ەكەنى حابارلاندى.
