يتاليادا وتەتىن قىسقى وليمپيادا ويىندارى - 2026 جىلدىڭ باستى سپورتتىق دوداسىنا اينالماق. وليمپيادا اياسىندا مۇزداعى جانە تاۋداعى سپورت تۇرلەرى ءبىر الاڭدا توعىسادى. ال اشىلۋ جانە جابىلۋ سالتاناتى ەلدىڭ تاريحي ءارى سيمۆولدىق ورىندارىندا ۇيىمداستىرىلادى.
اتالعان ءدۇبىرلى دودا 6 اقپاندا باستالادى. قازىرگى تاڭدا قازاقستان قۇراماسى وليمپيادالىق ليتسەنزيالار ءۇشىن كۇرەسىپ جاتىر. بۇگىنگى كۇنگە دەيىن ءبىزدىڭ سپورتشىلار شورت-ترەك, مانەرلەپ سىرعاناۋ جانە كونكيمەن جۇگىرۋ سپورت تۇرلەرى بويىنشا وليمپياداعا قاتىسۋ قۇقىعىنا يە بولدى.
جالپى العاندا, وليمپيادادا 116 وليمپيادالىق جانە 79 پاراليمپيادالىق جۇلدە جيىنتىعى ساراپقا سالىنادى. جارىستار قىسقى سپورتتىڭ بارلىق كلاسسيكالىق تۇرلەرى بويىنشا وتەدى: تاۋ شاڭعىسى, شاڭعى جارىسى, بياتلون, كونكيمەن جۇگىرۋ, شورت-ترەك, مانەرلەپ سىرعاناۋ, حوككەي, سنوۋبورد, فريستايل, بوبسلەي, شاڭعى قوسسايىسى, سكەلەتون, شاڭعىمەن تۇعىردان سەكىرۋ, كەرلينگ, شانا سپورتى.
ايتا كەتەرلىگى, سكي-الپينيزم العاش رەت وليمپيادا باعدارلاماسىنا ەنگىزىلدى.
2026 جىلعى ازيا ويىندارى
جازعى سپورت تۇرلەرى بويىنشا جىلدىڭ باستى جارىسى - ازيا ويىندارى بولماق. اتالعان تۋرنير 2026 جىلدىڭ 19 قىركۇيەگى مەن 4 قازانى ارالىعىندا جاپونيانىڭ ايچي-ناگويا قالاسىندا وتەدى.
ازيا ويىندارى − وليمپيادادان كەيىنگى قۇرلىقتاعى ەڭ ءىرى سپورتتىق دودا. 2026 جىلى جارىس باعدارلاماسى ەداۋىر كەڭەيتىلدى: 41 سپورت ءتۇرى, 68 ديستسيپلينا, 460 جارىس ءتۇرى قامتىلادى. باعدارلاماعا اكۆابايك, بريدج, كيبەرسپورت, بوۋلينگ سەكىلدى جاڭا سپورت تۇرلەرى ەنگىزىلىپ, العاش رەت ازيا ويىندارىندا ارالاس جەكپە-جەكتەن سايىس ۇيىمداستىرىلادى.
ازيادا-2026 ستراتەگيالىق ماڭىزعا يە, سەبەبى ول وليمپياداعا ەكى جىل قالعاندا جانە ىرىكتەۋ كەزەڭىنىڭ قارساڭىندا وتەدى.
2026 جىلعى جاسوسپىرىمدەر وليمپياداسى
جىل سوڭىندا سەنەگال استاناسى داكار IV جازعى جاسوسپىرىمدەر اراسىنداعى وليمپيادا ويىندارىن قابىلدايدى. دودا 31 قازان مەن 13 قاراشا ارالىعىندا وتەدى.
ايتا كەتەيىك, جاسوسپىرىمدەر وليمپياداسى افريكا قۇرلىعىندا العاش رەت ۇيىمداستىرىلادى. ويىندارعا قاتىساتىن سپورتشىلاردىڭ جاسى جابىلۋ سالتاناتى كەزىندە 17-دەن اسپاۋى ءتيىس. ال ەڭ تومەنگى جاس ساناتىن ءار سپورت ءتۇرى بويىنشا حالىقارالىق فەدەراتسيالار بەكىتەدى.
جارىس باعدارلاماسىنا 25 سپورت ءتۇرى ەنگىزىلدى. ال تاعى 10 سپورت ءتۇرى كورسەتىلىمدىك فورماتتا وتەدى. بۇل شەشىم قابىلداۋشى ەل مەن ايماقتاعى جاستاردىڭ سپورتقا قىزىعۋشىلىعىن ارتتىرۋعا باعىتتالعان.
الدىڭعى جاسوسپىرىمدەر وليمپياداسىنان ايىرماشىلىعى − داكار-2026-دا ءداستۇرلى ىرىكتەۋ جۇيەسى بولمايدى. كۆوتالاردى حالىقارالىق وليمپيادالىق كوميتەتى مەن حالىقارالىق فەدەراتسيالار ورتالىقتاندىرىلعان تارتىپپەن بولەدى.
جابىق كەشەندەگى جانە جەكپە-جەك سپورت تۇرلەرى بويىنشا 2026 جىلعى ازيا ويىندارى
2026 جىلى ەر-رياد (ساۋد ارابياسى) تاعى ءبىر ءىرى كەشەندى جارىستىڭ ورتالىعىنا اينالادى. مۇندا جابىق كەشەندەگى جانە جەكپە-جەك سپورت تۇرلەرى بويىنشا ازيا ويىندارى (AIMAG) وتەدى.
بۇل جارىس باستاپقىدا 2024 جىلى بانگكوك پەن چونبۋريدە (تايلاند) ءوتۋى ءتيىس بولعان. الايدا بىرنەشە رەت كەيىنگە شەگەرىلگەن سوڭ ازيا وليمپيادالىق كەڭەسى ونى توقتاتقان ەدى.
AIMAG اياسىندا جابىق سپورت نىساندارىندا وتكىزۋگە قولايلى قويان-قولتىق ۇرىسقا نەگىزدەلگەن سپورت تۇرلەرى مەن جەكەلەگەن ديستسيپلينالار قامتىلادى.
جارىسقا ازيا قۇرلىعىنىڭ 45 ۇلتتىق وليمپيادالىق كوميتەتىنىڭ وكىلدەرى قاتىسادى.
باعدارلامادا ازيا ەلدەرى ءداستۇرلى تۇردە مىقتى سانالاتىن سپورت تۇرلەرى بار: كۇرەس, تاەكۆوندو, كاراتە, مۋاي-تاي, كيكبوكسينگ, دزيۋدو, جەڭىل جانە اۋىر اتلەتيكا, ءجۇزۋ, ترەكتەگى ۆەلوسپورت جانە باسقا دا ديستسيپلينالار.
ويىندار 28 قاراشا مەن 7 جەلتوقسان ارالىعىندا ءوتىپ, ازيادا-2034 الدىنداعى ماڭىزدى سىناق رەتىندە قاراستىرىلادى. ايتا كەتەيىك, بۇل ازيادانى دا ەر-رياد قابىلدايدى.
2026 جىلعى جاعاجايداعى ازيا ويىندارى
ون جىلدىق ۇزىلىستەن كەيىن جاعاجايداعى ازيا ويىندارى سپورت كۇنتىزبەسىنە قايتا ورالادى. سوڭعى رەت بۇل جارىس 2016 جىلى وتكەن بولاتىن.
2026 جىلعى جاعاجاي ازياداسى 22-30 ءساۋىر ارالىعىندا قىتايدىڭ حاينان ارالىنداعى سانيا قالاسىندا وتەدى. مۇندا سۋ سپورت تۇرلەرى, جازعى سپورتتىڭ جاعاجايداعى نۇسقالارى, سپورتتىق قۇزعا ورمەلەۋ, جەڭىل اتلەتيكانىڭ جەكەلەگەن ديستسيپلينالارى, جەلكەندى سپورت جانە جەكپە-جەك تۇرلەرى قامتىلادى.
2026 جىلعى الەم چەمپيوناتتارى
سونىمەن قاتار قازاقستان سپورتشىلارىن كوپتەگەن الەم بىرىنشىلىگى كۇتىپ تۇر.
- كونكيمەن جۇگىرۋدەن الەم چەمپيوناتى (كلاسسيكالىق جانە سپرينتتىك كوپسايىس) - حەرەنۆەن, نيدەرلاند (5-8 ناۋرىز)
- جەڭىل اتلەتيكادان جابىق كەشەندەگى الەم چەمپيوناتى - تورۋن, پولشا (20-22 ناۋرىز)
- مانەرلەپ سىرعاناۋدان الەم چەمپيوناتى - پراگا, چەحيا (23-29 ناۋرىز)
- ۇستەل تەننيسىنەن كوماندالىق الەم چەمپيوناتى - لوندون, ۇلىبريتانيا (28 ءساۋىر - 10 مامىر)
- سەمسەرلەسۋدەن الەم چەمپيوناتى - گونكونگ (21-30 شىلدە)
- كوركەم گيمناستيكادان الەم چەمپيوناتى - فرانكفۋرت, گەرمانيا (12-16 تامىز)
- كۇرەس تۇرلەرىنەن الەم چەمپيوناتى - ماناما, باحرەين (5-13 قىركۇيەك)
- تاسجولداعى ۆەلوسپورتتان الەم چەمپيوناتى - مونرەال, كانادا (20-27 قىركۇيەك)
- ترياتلوننان الەم چەمپيوناتى - پونتەۆەدرا, يسپانيا (23-27 قىركۇيەك)
- ساداق اتۋدان الەم چەمپيوناتى - يانكتون, اقش (24 قىركۇيەك - 4 قازان)
- دزيۋدودان الەم چەمپيوناتى — باكۋ, ازەربايجان (4-11 قازان)
- ترەكتەگى ۆەلوسپورتتان الەم چەمپيوناتى - شانحاي, قىتاي (14-18 قازان)
- سپورتتىق گيمناستيكادان الەم چەمپيوناتى - روتتەردام, نيدەرلاند (17-28 قازان)
- اۋىر اتلەتيكادان الەم چەمپيوناتى - نينبو, قىتاي (27 قازان - 8 قاراشا)
- نىسانا كوزدەۋدەن الەم چەمپيوناتى - دوحا, قاتار (1-15 قاراشا)
- قىسقا سۋدا جۇزۋدەن الەم چەمپيوناتى - بەيجىڭ, قىتاي (1-6 جەلتوقسان)
ماۋسىم بارىسىندا سپورتتىق كۇنتىزبەدە وزگەرىستەر بولىپ, جارىس سانى ارتۋى مۇمكىن.
