قالا وقۋشىلارى اراسىندا ەكولوگيالىق سانانى كۇشەيتۋ ماقساتىندا ەلەكتروندى ەكولوگيالىق اشىقحاتتار جاساۋعا ارنالعان «ەكولوگيالىق كالەيدوسكوپ» جالپىقالالىق ونلاين-چەللەندجى باستالدى. باستاماعا الماتى قالاسىنداعى ءبىلىم بەرۋ ۇيىمدارىنىڭ 1-11-سىنىپ وقۋشىلارى قاتىسىپ جاتىر.
چەللەندجدىڭ نەگىزگى ماقساتى – ءبىلىم الۋشىلاردىڭ ەكولوگيالىق جاۋاپكەرشىلىگىن قالىپتاستىرۋ, ەكولوگيالىق ساۋات دەڭگەيىن ارتتىرۋ, تسيفرلىق جانە شىعارماشىلىق قۇزىرەتىن دامىتۋ, سونداي-اق تابيعاتتى قورعاۋ يدەيالارىن كەڭىنەن ناسيحاتتاۋ.
چەللەندج اياسىندا وقۋشىلاردىڭ قورشاعان ورتانى قورعاۋ جانە تابيعي رەسۋرستاردى ساقتاۋ ماسەلەسىنە نازارىن اۋدارۋ, ولاردىڭ كرەاتيۆتى جانە تسيفرلىق داعدىسىن دامىتۋ, ەكولوگيالىق مادەنيەتتى دامىتۋ مىندەتتەرى جۇزەگە اسىرىلماق. قاتىسۋشىلار گرافيكا, كوللاج جانە انيماتسيا فورماتىندا ەلەكتروندى ەكولوگيالىق اشىقحاتتار دايىندايدى.
جۇمىستاردا قورشاعان ورتانى قورعاۋ, تابيعي رەسۋرستاردى ساقتاۋ, قالدىقتى بولەك جيناۋ, سۋ مەن ەنەرگيانى ۇنەمدەۋ, سونداي-اق «تازا قالا – قاۋىپسىز بولاشاق» تۇجىرىمداماسى سياقتى تاقىرىپتىق باعىتتار قامتىلادى.
چەللەندج بىرنەشە كەزەڭنەن تۇرادى. اقپاراتتىق كەزەڭدە ءبىلىم بەرۋ ۇيىمدارىندا قاتىسۋ شارتتارى تۇسىندىرىلەدى. شىعارماشىلىق كەزەڭدە وقۋشىلار ەلەكتروندى ەكولوگيالىق اشىقحاتتار ازىرلەيدى. چەللەندج-ەستافەتا كەزەڭىندە دايىن جۇمىستار الەۋمەتتىك جەلىلەردە
#ەكولوگيالىقكالەيدوسكوپ, #ەكوالماتى, #تازاقازاقستان حەشتەگتەرىمەن جاريالانادى. قورىتىندى كەزەڭدە ەڭ بەلسەندى قاتىسۋشىلار مەن ۇزدىك جۇمىستاردىڭ اۆتورلارى ماراپاتتالادى. اتالعان چەللەندجدى وتكىزۋ وقۋشىلاردىڭ ەكولوگيالىق ساناسىن ارتتىرۋعا, شىعارماشىلىق الەۋەتىن دامىتۋعا جانە قورشاعان ورتاعا جاۋاپتى قارىم-قاتىناس مادەنيەتىن قالىپتاستىرۋعا ىقپال ەتەدى.
الماتى
