زاۋىتتىڭ باس ديرەكتورى قۋانىش ءبيشىموۆتىڭ ايتۋىنشا, مۇنداي جوبانى ىسكە اسىرۋ ءۇشىن وسى سالادا مول تاجىريبەسى بار سەرىكتەس قاجەت. ويتكەنى جاساندى ينتەللەكتىمەن مۇناي وڭدەۋ زاۋىتىنداعى ءتۇرلى جابدىقتىڭ ىستەن شىعۋىنا پرەديكتيۆتى تالداۋ جۇيەسى قولدانىلادى. مىنە, وسىنداي سەبەپپەن اتالعان جوبانى ەنگىزۋگە اقش-تىڭ ونەركاسىپتىك اۆتوماتتاندىرۋ جانە تەحنولوگيالىق ۇدەرىستەردى باسقارۋ سالاسىندا وزىق تاجىريبە جيناقتاعان «Honeywell» كورپوراتسياسى سەرىكتەس رەتىندە تارتىلىپتى.
«مۇناي وڭدەۋ تەحنولوگياسى كۇردەلىلىگىمەن ەرەكشەلەنەدى. وسى ورايدا پرەديكتيۆتى تالداۋ جابدىقتاردا جۇمىس پارامەترلەرى نەگىزىندە ىقتيمال اقاۋلاردىڭ باستاپقى بەلگىلەرىن انىقتايدى. جابدىقتاردىڭ تەحنيكالىق جاي-كۇيىن بولجاۋعا مۇمكىندىك بەرەدى. جاساندى ينتەللەكت جۇيەسى اۋقىمدى دەرەكتەردى تالدايدى. تەحنولوگيالىق اۋىتقۋلاردى انىقتاپ, جابدىقتاردىڭ ناقتى جاعدايىنا سايكەس تەحنيكالىق قىزمەت كورسەتۋ مۇمكىندىگىن قامتاماسىز ەتەدى. تەحنيكالىق پەرسونالعا ارنايى ۇسىنىستار دايىندايدى», دەيدى ق.ءبيشىموۆ.
ونىڭ دەرەگىنە قاراعاندا, مۇناي وڭدەۋ زاۋىتىندا پرەديكتيۆتى تالداۋدى ەنگىزۋ بىرنەشە ۇدەرىستى بىرىكتىرەتىن بىرىڭعاي مونيتورينگ جۇيەسىن قۇرۋعا باعىتتالىپ وتىر. بىرىنشىدەن, دەرەكتەردى جيناۋعا باسىمدىق بەرىلەدى. ەكىنشىدەن, جابدىقتاردىڭ تەحنيكالىق كۇيىنە تالداۋ جاسالادى. ۇشىنشىدەن, باسقارۋشىلىق شەشىمدەردى قولداۋعا باعىت ۇستالادى.
«بۇل وقىس جايتتار مەن اپاتتىق جاعدايدا توقتاتۋ تاۋەكەلىن تومەندەتەدى. جابدىقتاردىڭ سەنىمدىلىگىن ارتتىرىپ, قىزمەت كورسەتۋ مەرزىمىن ۇزارتادى. مۇنداي تيىمدىلىك وندىرىستىك اكتيۆتەردى ءتيىمدى باسقارۋعا مۇمكىندىك بەرەدى», دەيدى باس ديرەكتور.
قازىر مۇناي وڭدەۋ زاۋىتىندا دامىعان تسيفرلىق ەكوجۇيە قالىپتاسقان. بۇل جۇيەدە وندىرىستىك, ەنەرگەتيكالىق جانە زەرتحانالىق ۇدەرىستەردى باسقارۋ, ونىڭ ىشىندە Honeywell PHD دەرەكتەردى ساقتاۋ پلاتفورماسى, MES ساناتىنداعى شەشىمدەر مەن جابدىقتاردى مونيتورينگىلەۋ باعىتى بار.
«تسيفرلاندىرۋدىڭ جاڭا كەزەڭى زاۋىتتىڭ اسا ماڭىزدى تەحنولوگيالىق قوندىرعىلارىن قامتىدى. اتاپ ايتقاندا, قازان ايىندا «Honeywell» كورپوراتسياسىمەن بىرلەسە ىسكە قوسىلعان پيلوتتىق جوبا كاتاليتيكالىق كرەكينگ قوندىرعىسىنىڭ كومپرەسسورى مەن ۇزدىكسىز كاتاليتيكالىق ريفورمينگ قوندىرعىسى بار CCR كەشەنىنىڭ نەگىزگى جابدىقتارىنا ەنگىزىلدى. زاۋىت وندىرىسىندەگى جاڭا تەحنولوگيانىڭ تيىمدىلىگى دالەلدەنىپ وتىر. بۇل جۇيە كومپرەسسورداعى جاسىرىن انوماليانى انىقتاپ, اقاۋ جوسپارلى الدىن الۋ جۇمىستارى كەزىندە جويىلدى», دەپ مالىمدەدى ق.ءبيشىموۆ.
سونداي-اق زاۋىت «ديناميكا» عىلىمي-وندىرىستىك ورتالىعىمەن ىنتىماقتاستىقتى نىعايتىپ وتىر. بۇل – ءدىرىلدى دياگنوستيكالاۋ, كومپيۋتەرلىك مونيتورينگ, ونەركاسىپتىك جابدىقتاردىڭ تەحنيكالىق جاي-كۇيىن كەشەندى باعالاۋ تەحنولوگيالارى مەن جۇيەلەرىن ازىرلەۋگە, ەنگىزۋگە ماماندانعان رەسەيلىك كومپانيا.
«بىلتىر اتالعان كومپانيانىڭ ءدىرىلدى دياگنوستيكالاۋ جۇيەسى زاۋىتتاعى 819 تەحنيكانى قامتىدى. ال (كاتاليتيكالىق كرەكينگتىڭ بەنزينىن گيدروتازارتۋ كەشەنىندەگى Prime G قوندىرعىسىنىڭ فۋنكتسيونالىن كەڭەيتۋ اياسىندا جۇيەگە قوسىمشا قىسىم, تەمپەراتۋرا جانە دەڭگەي پارامەترلەرى ەنگىزىلدى. جاساندى ينتەللەكت مودەلدەرى مۇندا دا جوعارى ناتيجە كورسەتتى. جۇيە سورعىلاردىڭ كىرىسىندەگى قىسىمنىڭ تومەندەۋىن اۆتوماتتى تۇردە انىقتاپ, ناتيجەسىندە جابدىقتىڭ جۇمىسى دەرەۋ تۇراقتاندىرىلدى», دەيدى كاسىپورىن باسشىسى.
«قازمۇنايگاز» كومپانياسى بۇل جوبالاردى وپەراتسيالىق تيىمدىلىكتى ارتتىرۋعا باعىتتالعان ۇزاقمەرزىمدى ستراتەگيانىڭ نەگىزى رەتىندە قاراستىرىپ وتىر. ال اتىراۋ مۇناي زاۋىتى ءۇشىن پرەديكتيۆتى تالداۋدى ەنگىزۋدىڭ ءۇش جىلدىق باعدارلاماسى ازىرلەندى. ماسەلەن, الداعى مونيتورينگ جۇيەسى ەنگىزىلەتىن اسا ماڭىزدى 28 بىرلىك جابدىقتىڭ ءتىزىمى جاساقتالدى. قازىر كومپانيا ساراپشىلارى وزگە دە جەتەكشى ۆەندورلاردىڭ تەحنيكالىق شەشىمدەرىن جان-جاقتى زەردەلەۋدى قولعا الدى.
اتىراۋ وبلىسى
