فوتو: اقوردا
مەملەكەت باسشىسى – قازاقستان قارۋلى كۇشتەرى جوعارعى باس قولباسشىسى قاسىم-جومارت توقاەۆ ساردارلار مەن ساربازداردى, جيىنعا قاتىسۋشىلاردى وتان قورعاۋشى كۇنىمەن جانە جەڭىس كۇنىمەن قۇتتىقتادى.
«قوس مەرەكەنىڭ ءمان-مازمۇنى – ۇندەس, تاعىلىمى – ورتاق. وسى مەيرامداردا ەلىمىزدىڭ ەرلىك ءداستۇرى كەڭىنەن دارىپتەلەدى. ءبىز بۇل كۇندەرى جۇرتىمىزعا قورعان بولىپ جۇرگەن ەرلەرگە قۇرمەت كورسەتەمىز. سونداي-اق سۇراپىل سوعىستا وتان ءۇشىن وت كەشكەن باتىرلاردىڭ رۋحىنا تاعزىم ەتەمىز. قازاق – شەكاراسىن اق نايزانىڭ ۇشىمەن, اق بىلەكتىڭ كۇشىمەن بەكەمدەگەن قاھارمان حالىق, ەرجۇرەك ۇلت. باتىر بابالارىمىز ەل تاعدىرى سىنعا تۇسكەن ساتتە ءبىر تۋدىڭ استىنا جينالعان. بىرلىگىن نىعايتىپ, جۇرتىن جاۋدان قورعاعان. بايتاق دالانى كوزدىڭ قاراشىعىنداي ساقتاپ, ۇرپاققا امانات ەتكەن. وسى اماناتقا ادال بولۋ – ءبىزدىڭ قاستەرلى بورىشىمىز. ءبىرتۇتاس قازاقستان حالقى مۇنى جاقسى تۇسىنەدى. ناۋرىز ايىنداعى كونستيتۋتسيالىق رەفورما – سونىڭ ايقىن دالەلى. ساياسي ناۋقان كەزىندە ءبىز ەڭ الدىمەن وسكەلەڭ ۇرپاق الدىنداعى جاۋاپكەرشىلىكتى تەرەڭ سەزىنە وتىرىپ, تاريحي تاڭداۋىمىزدى جاسادىق. ءبارىمىز ءبىر ەل بولىپ, جاڭا كونستيتۋتسيانى قابىلدادىق. مۇنى ۇلت بولاشاعىنا تىكەلەي ىقپال ەتەتىن اسا ماڭىزدى شەشىم دەسەك, قاتە بولمايدى», دەدى پرەزيدەنت.
قاسىم-جومارت توقاەۆ كونستيتۋتسيا مەملەكەتتىگىمىز بەن ەگەمەندىگىمىزدىڭ مىزعىماس كەپىلى ەكەنىن اتاپ ءوتتى.
«باس قۇجاتتا حالقىمىزدىڭ مۇددەسى, ماقسات-مۇراتى مەن بىرەگەي قۇندىلىقتارى كورىنىس تاپتى. جاڭا اتا زاڭدا ەگەمەندىك پەن تاۋەلسىزدىكتى قورعاۋ, ازاماتتاردىڭ قۇقىقتارى مەن بوستاندىقتارىن ساقتاۋ, حالقىمىزدىڭ ءال-اۋقاتىن ارتتىرۋ, بىرلىگىن كۇشەيتۋ بۇلجىماس قاعيدات رەتىندە ايقىندالدى. ادام كاپيتالىن, ءبىلىم-عىلىمدى, يننوۆاتسيانى دامىتۋ مەملەكەت قىزمەتىنىڭ ستراتەگيالىق باعىتى رەتىندە بەكىتىلدى. وسىلايشا, ءبىز زاڭ مەن ءتارتىپ ۇستەمدىك قۇراتىن, بارشاعا بىردەي مۇمكىندىك بەرىلەتىن, ادىلەتتى, قۋاتتى, وركەنيەتتى مەملەكەت قۇرۋ جولىنا بەت الدىق. قازاقستاننىڭ ماقساتى – بيىك, باعدارى – ايقىن. ىرىستى ىنتىماعىمىزدى جانە بەرەكەلى بىرلىگىمىزدى ساقتاي بىلسەك, وسى مۇراتىمىزعا جەتەمىز», دەدى مەملەكەت باسشىسى.
