ء«باھادۇر بابالارىمىز رۋحى اسقاق, نامىسى بيىك ەكەنىن ەرەن ەرلىگىمەن دالەلدەپ كەلدى. داڭقتى ەرلەرىمىز ەكىنشى دۇنيەجۇزىلىك سوعىس كەزىندە قايتپاس قايسارلىقتىڭ وزىق ۇلگىسىن كورسەتتى. 500-گە جۋىق جەرلەسىمىز كەڭەس وداعىنىڭ باتىرى اتاندى. الايدا, كوپتەگەن مايدانگەردىڭ ەرلىگى ەلەنبەي قالعانى دا جاسىرىن ەمەس. ۇلتىنا قورعان بولعان ەرجۇرەك جاۋىنگەرلەردىڭ ەسىمىن ۇرپاق جادىندا ساقتاۋىمىز كەرەك. بۇل – ءبىزدىڭ پەرزەنتتىك پارىزىمىز», دەدى پرەزيدەنت.
قاسىم-جومارت توقاەۆ: الەم ەلدەرىنىڭ قازاق ارمياسىنا دەگەن سەنىمى جوعارى
قاسىم-جومارت توقاەۆ وسى ورايدا وتانداسىمىز كەنجەباي مادەنوۆتىڭ ەرلىگىن ەرەكشە اتاپ ءوتتى.
« ۇلى وتان سوعىسىنىڭ سوڭىندا ول ۆزۆود كومانديرى رەتىندە قاندىكويلەك جولداستارىمەن بىرگە بەرليننىڭ راتۋشا عيماراتىنا جەڭىس تۋىن ءىلدى. بۇل ناتسيستىك رەجيمنىڭ كۇيرەۋىن كورسەتكەن, مايدانگەرلەردىڭ رۋحىن كوتەرگەن, شابۋىلدى ودان ءارى ۇدەتە تۇسۋگە دەم بەرگەن ءسات ەدى. ونىڭ قاھارماندىق جولى تۋرالى مارشال گەورگي جۋكوۆ جانە باسقا دا مىقتى قولباسشىلار, سونداي-اق جەڭىسپەن اياقتالعان قاندى شايقاس جونىندە قالام تەربەگەن جۋرناليستەر دە جازدى. وكىنىشكە قاراي, بۇل تاريحي ءمان-ماڭىزى ايرىقشا داڭقتى ەرلىك وسى كەزگە دەيىن لايىقتى باعاسىن العان جوق. سوندىقتان مەن ۇلى وتان سوعىسىندا كورسەتكەن جانقيارلىعى مەن باتىلدىعى ءۇشىن مارقۇم كەنجەباي مادەنوۆكە «حالىق قاھارمانى» اتاعىن بەرۋ تۋرالى جارلىققا قول قويدىم. وسىلايشا, ءبىز بۇگىن ءبىر ەل بولىپ تاريحي ادىلدىكتى قالپىنا كەلتىرىپ وتىرمىز», دەدى مەملەكەت باسشىسى.
مەملەكەت باسشىسى «حالىق قاھارمانى» كەنجەباي مادەنوۆتىڭ ۇلى ماحامبەت كەنجەباي ۇلىنا ايرىقشا ەرەكشەلىك بەلگىسى – التىن جۇلدىز بەن «وتان» وردەنىن سالتاناتتى تۇردە تاپسىردى.
