ء«بىز حالىقارالىق قۇقىق قاعيداتتارى مەن نورمالارى قاتاڭ ساقتالۋى كەرەك دەپ سانايمىز. قازاقستان الەمنىڭ بارلىق ەلىمەن دوستىق قارىم-قاتىناسىن نىعايتا بەرەدى. وسى مىزعىماس ۇستانىمدار جاڭا اتا زاڭىمىزدا ناقتى ايقىندالدى. بىراق بۇل قامسىز وتىرۋ قاجەت دەگەن ءسوز ەمەس. ەلىمىز ءتۇرلى سىن-قاتەردىڭ الدىن الۋعا جانە كەز كەلگەن قاۋىپكە توتەپ بەرۋگە دايىن بولۋعا ءتيىس. سوندىقتان مەملەكەتىمىزدىڭ قورعانىس قابىلەتىن كۇشەيتىپ, اسكەرىمىزدى ەڭ ءبىرىنشى كەزەكتە تەحنولوگيالىق تۇرعىدان جاڭعىرتا بەرۋىمىز قاجەت. بۇل – قازىرگى تۇراقسىز, قۇبىلمالى زاماننىڭ تالابى, سونى ەسكەرە وتىرىپ, ەڭ الدىمەن, قارۋلى كۇشتەرىمىزدى جانە اسكەري مەكەمەلەرىمىزدى تۇبەگەيلى رەفورمالاۋ كەرەك. بۇل – ستراتەگيالىق ماڭىزى زور مىندەت, ونى سوزباي, ەكى جىل ىشىندە ورىنداۋ قاجەت», دەدى قاسىم-جومارت توقاەۆ.
قاسىم-جومارت توقاەۆ: الەم ەلدەرىنىڭ قازاق ارمياسىنا دەگەن سەنىمى جوعارى
مەملەكەت باسشىسى سونىمەن قاتار ەلگە قورعان بولۋ ەڭ ابىرويلى قىزمەت ەكەنىن اتاپ ءوتتى.
«ناعىز پاتريوت ازامات ءۇشىن بۇدان اسقان مارتەبە جوق. كۇشتىك قۇرىلىم قىزمەتكەرلەرىنىڭ كۇندەلىكتى تاباندى ەڭبەگى ەل ءۇشىن جاسالعان ەرلىك ەكەنى ءسوزسىز. سىزدەر ارقايسىڭىز سەرتكە بەرىك بولىپ, وتان الدىنداعى مىندەتتەرىڭىزدى ءمىنسىز ورىنداپ جۇرسىزدەر. مەن مەملەكەت باسشىسى جانە جوعارعى باس قولباسشى رەتىندە بارشاڭىزعا شىنايى ريزاشىلىعىمدى بىلدىرەمىن. بۇگىن سىزدەرگە اسكەري اتاق پەن سىنىپتىق شەن بەرۋ تۋرالى ءتيىستى جارلىققا قول قويدىم. بۇعان قوسا بىرقاتار ازاماتتى جوعارى مەملەكەتتىك ناگرادامەن ماراپاتتاۋ تۋرالى شەشىم قابىلدادىم. بارشاڭىزعا قۇتتى بولسىن! وسكەلەڭ ۇرپاق سىزدەرگە قاراپ بوي تۇزەيدى, تۋعان ەلگە ادال بولۋدى ۇيرەنەدى. سىزدەر جاستارعا ۇلگى بولىپ, جول كورسەتىپ, ءاردايىم ۇلت مۇددەسىنە قىزمەت ەتە بەرەسىزدەر دەپ سەنەمىن. ايبىندى ارميامىزدىڭ ابىرويى ارتا بەرسىن», دەدى پرەزيدەنت.
