دەپۋتات: اۆتومەكتەپتەردەگى زاڭسىز جينالاتىن 5,6 ملرد تەڭگە كىمنىڭ قالتاسىنا ءتۇسىپ جاتىر؟

«قازىر ءار ازامات اۆتومەكتەپتە شامامەن ەكى جارىم اي وقۋ كۋرسىنان ءوتۋى ءتيىس. بۇل دۇرىس. بىراق سونىمەن قاتار اۆتومەكتەپ ىشىندە QR-كود ارقىلى 8,5 مىڭ تەڭگە تولەۋ تالاپ ەتىلەدى. بۇل اقشا اۆتومەكتەپكە دە, رەسمي جۇيەگە دە بايلانىستى ەمەس», دەدى دەپۋتات.

 زاڭ جوباسى ماقۇلداندى: ەندى اۆتومەكتەپتەرگە قانداي تالاپ قويىلادى؟

ونىڭ ايتۋىنشا, جىل سايىن شامامەن 670 مىڭ ادام جۇرگىزۋشى كۋالىگىن الۋعا ءوتىنىش بەرەدى. ەگەر ارقايسىسى اتالعان سومانى تولەسە, جىلدىق اينالىم 5-6 ملرد تەڭگەگە دەيىن جەتۋى مۇمكىن.

«بۇل قاراجات بيۋدجەتكە دە, ءىىم جۇيەسىنە دە تۇسپەيدى. اشىق ەسەپ جوق. كەيبىر دەرەكتەرگە سايكەس, اقشا شەتەلدە تۇراتىن جەكە تۇلعالاردىڭ پايداسىنا كەتۋى مۇمكىن. بۇل كولەڭكەلى قارجى اينالىمى ەمەس پە؟», دەپ سۇراق قويدى ماقسات تولىقباي.

دەپۋتات بۇل سحەمانىڭ ارتىندا ۇيىمداسقان قۇرىلىم بولۋى مۇمكىن ەكەنىن دە جوققا شىعارماي, ۋاكىلەتتى ورگانداردى شارا قابىلداۋعا شاقىردى.

ىشكى ىستەر مينيسترلىگىنىڭ وكىلى سانجار ءادىلوۆ بۇل ماسەلەگە قاتىستى تەكسەرىس باستالعانىن ايتتى.

«بۇل ماسەلە جۇمىس توپتارىندا دا كوتەرىلدى. قازىرگى ۋاقىتتا اكىمشىلىك پوليتسيا كوميتەتى قىزمەتتىك تەكسەرىس جۇرگىزىپ جاتىر. ءبىز مۇنداي دەلدالدار مەن زاڭسىز تولەمدەرگە جول بەرىلمەۋى ءتيىس دەپ سانايمىز. ءتيىستى شارالار قابىلدانادى», دەدى ول.

اۆتومەكتەپتەردە ولقىلىقتار انىقتالدى: 700-دەن استام وقۋ توبى جابىلدى

ءىىم مالىمەتىنشە, ەلدە 727 اۆتومەكتەپ تىركەلگەن, ونىڭ 160-ى مەملەكەتتىك, 567-ءسى جەكە مەنشىك. دەگەنمەن ولاردىڭ قىزمەتىنە باقىلاۋ السىرەگەنى ايتىلدى.

نۇربولات امانبەك