تالقىلاۋعا قالالىق پوليتسيا, جەرگىلىكتى اكىمدىكتىڭ ىشكى ساياسات, تۇرعىن ءۇي-كوممۋنالدىق شارۋاشىلىق باسقارمالارىنىڭ وكىلدەرى, سونداي-اق «قاپشاعاي – التىن الما» تۇتىنۋشىلىق باقشا كووپەراتيۆىنىڭ (تبك) مۇشەلەرى قاتىستى.
«قاپشاعاي – التىن الما» تبك وكىلدەرىنىڭ ايتۋىنشا, داۋ كووپەراتيۆ مۇشەلەرىنىڭ قاراجاتى ەسەبىنەن سالىنعان جانە كۇتىم جاسالعان, ۇزىندىعى 3 600 مەترگە جۋىق سۋ جەلىسىنە قاتىستى بولىپ وتىر. كەيىننەن اتالعان نىسان رەسىمدەردىڭ زاڭدىلىعى كۇماندى جاعدايدا جانە قۇقىقتاردىڭ اۋىسۋى ءتيىستى تۇردە تىركەلمەي, ءۇشىنشى تۇلعالاردىڭ پايداسىنا رەسىمدەلىپ كەتكەن.
اسحات راقىمجانوۆ بۇل جاعدايدى زەردەلەۋ كەزىندە م ۇلىكتى رەسىمدەۋدىڭ زاڭدىلىعىنا قاتىستى سۇراقتار تۋىنداعانىن ايتتى.
ء«بىز جاعدايدى ەگجەي-تەگجەيلى قاراستىرا كەلىپ, جاي سەرىكتەستىكتەر دەپ اتالاتىن م ۇلىكتى رەسىمدەۋ زاڭدىلىعىنا قاتىستى كوپتەگەن ماسەلەلەردى بايقادىق. قازىرگى تاڭدا زاڭنامانى ساقتاماۋ بەلگىلەرى بار دەۋگە بولادى», دەدى دەپۋتات.
ونىڭ ايتۋىنشا, سەرىكتەستىكتەردى قۇرۋ حاتتامالارىن رەسىمدەۋ پروتسەسى مەن ونداعى قولتاڭبالاردىڭ شىنايىلىعىنا قاتىستى جايت ەرەكشە نازار اۋدارىپ وتىر.
كەزدەسۋ بارىسىندا تۇرعىنداردىڭ 1998 جىلى ءوز ەسەبىنەن سالعان سۋ قۇبىرى جەلىلەرىن بەرۋى ماسەلەسى دە قوزعالدى. اسحات راقىمجانوۆ اتاپ وتكەندەي, تۇرعىندار سۋ جەلىلەرىن ءوز كۇشىمەن سالىپ, وعان كۇتىم جاساعان. سونداي-اق شىعىندارىن كوتەرىپ, سالىق تولەگەن. بىراق كەيىننەن بۇل م ۇلىك ءۇشىنشى تاراپقا بەرىلگەن. ونىڭ پىكىرىنشە, سەرىكتەستىكتەر قۇرۋ كەزىندە بۇزۋشىلىقتار بولعان جاعدايدا بۇل رەسىمدەۋ پروتسەسى جۇرگىزىلمەۋى كەرەك ەدى.
جيىن قورىتىندىسى بويىنشا قوناەۆ قالاسىنىڭ پروكۋراتۋراسى جاعدايدى باقىلاۋعا العانىن جەتكىزدى. قاداعالاۋشى ورگاننىڭ الدىنا وسى ءىستىڭ بارلىق ءمان-جايىن, سونىڭ ىشىندە كوندومينيۋم نىساندارىن رەسىمدەۋ مەن مەنشىك يەلەرىنىڭ قۇقىن قورعاۋعا قاتىستى جايتتاردى قايتادان جان-جاقتى قاراۋ ماسەلەسى قويىلدى.
«نەگىزگى مىندەت – ادىلدىكتى قايتا ورناتۋ. ينفراقۇرىلىمعا قاراجات سالعان ادامدار ءوز مۇددەلەرىن قورعاۋعا جانە كەتكەن شىعىندارىن وتەۋگە قۇقىلى. بارلىق شەشىم تەك قۇقىق نەگىزىندە قابىلدانۋعا ءتيىس», دەدى اسحات راقىمجانوۆ.
كەزدەسۋ بارىسىندا دەپۋتات ماجىلىستەگى جالپىۇلتتىق سوتسيال دەموكراتيالىق پارتيا (جسدپ) فراكتسياسىنىڭ زاڭنامانى جەتىلدىرۋ قىزمەتى تۋرالى باياندادى. اتاپ ايتقاندا, ءتيىستى زاڭ جوباسى اياسىندا باۋ-باقشا سەرىكتەستىكتەرىن مەملەكەتتىك قولداۋ كۇشەيەتىنىنە توقتالدى. پارتيانىڭ باستامالارى ازاماتتاردىڭ وتىنىشتەرىنە جانە ساياجاي بىرلەستىكتەرىنىڭ جەرگىلىكتى جەرلەردە كەزدەسەتىن ناقتى پروبلەمالارىنا نەگىزدەلگەنىن جەتكىزدى.
دەپۋتات سونداي-اق وڭىرلەرگە جۇمىس ساپارلارى, سايلاۋشىلارمەن كەزدەسۋلەر جەر-جەردەگى جۇيەلى پروبلەمالاردى انىقتاۋعا, وعان قولدانىستاعى زاڭناما شەڭبەرىندە مەملەكەتتىك ورگانداردىڭ نازارىن اۋدارۋعا مۇمكىندىك بەرەتىنىن اتاپ ءوتتى.
ءماجىلىس دەپۋتاتتارىنىڭ وڭىرلەردەگى كەزدەسۋلەرى 5-13 قاڭتار ارالىعىندا جالعاسادى. جۇمىس ساپارلارى بارىسىندا AMANAT, اۋىل, اق جول, جسدپ, قازاقستان كوممۋنيستىك پارتياسى جانە Respublica ساياسي پارتيالارىنىڭ پارلامەنتتىك فراكتسيالارىنىڭ دەپۋتاتتارى سايلاۋشىلاردى قابىلدانعان زاڭدار تۋرالى حاباردار ەتەدى. ولاردىڭ جەرگىلىكتى جەرلەردە قولدانىلۋ بارىسىن زەردەلەيدى جانە ازاماتتاردى تولعاندىراتىن وزەكتى ماسەلەلەر مەن پروبلەمالاردى تىڭدايدى.
