فوتو: yerlansakenov
كولىك سالاسىنىڭ سەرپىنى: LRT ءداۋىرى باستالادى
استانا جۇرتشىلىعى اسىعا كۇتكەن LRT جوباسى 2026 جىلدىڭ كوكتەمىندە حالىق يگىلىگىنە بەرىلەدى. كوپ جىلعا سوزىلعان بۇل قۇرىلىس نىسانى رەسمي تۇردە قوعامدىق كولىك رەتىندە ەسىگىن اشادى. قازىرگى تاڭدا سىناق جۇمىستارى اياقتالۋعا جاقىن. بۇگىندە قالاعا 4 قۇرام جەتكىزىلگەن. اۋەجاي ماڭىنداعى دەپو ىسكە قوسىلىپ, قالا بويىنشا ستانتسيالارداعى سوڭعى ارلەۋ جۇمىستارى جۇرگىزىلىپ جاتىر. ستانتسيالاردا نەگىزىنەن جەلدەتۋ, جىلىتۋ جۇيەلەرى مەن ەسكالاتورلار مەن ليفتتەردى ورناتۋ سەكىلدى ىشكى جۇمىستار قالدى.
ايتا كەتەرلىگى, 2026 جىلدىڭ مامىرىنا قاراي اۋەجايدان LRT ستانتسياسىنا دەيىنگى جابىق وتكەل قۇرىلىسى اياقتالۋى ءتيىس.
ساۋلەت جانە رەسمي مەكەندەر: مەملەكەتتىك قابىلداۋ ءۇيى
اقورداعا قاراما-قارسى بەتتە, ەسىل وزەنىنىڭ جاعاسىنداعى كوپىر ماڭىندا مەملەكەتتىك قابىلداۋ ءۇيى بوي كوتەرەدى. قۇرىلىسى اياقتالۋعا جاقىن بۇل نىسان جوعارى دەڭگەيدەگى مارتەبەلى مەيمانداردى قابىلداۋعا ارنالعان.
بولاشاقتا مەملەكەت باسشىلارى وسى جەردە كەزدەسىپ, سونىڭ اسەرىنەن كورتەجدەر باعىتى وزگەرسە, ماڭگىلىك ەل داڭعىلىنداعى كەپتەلىس ازايىپ, قالا تۇرعىندارىنا قولايلى جاعداي جاسالار ەدى دەگەن ءۇمىت باسىم.
«مىڭجىلدىق» اللەياسىنىڭ جاڭا كەيپى
2026 جىلى كوپتەن كۇتكەن «مىڭجىلدىق» (مىنجىلدىك) اللەياسىن اباتتاندىرۋ جۇمىستارى باستالادى. بۇل جوبا جاڭا ۆوكزال ماڭىنداعى قۇرىلىستاردىڭ ساۋلەتتىك ۇيلەسىمىن تۇبەگەيلى وزگەرتەدى. وسى ۋاقىتقا دەيىن قوعامدىق كەڭىستىكتەردەن كەندە قالىپ كەلگەن بۇل اۋدان زاماناۋي كەيىپكە ەنەدى.
كەيبىر تۇستاردا ۇيلەردىڭ تىعىز سالىنۋىنا بايلانىستى كەڭىستىكتىڭ تارىلۋى بايقالعانىمەن, بۇل ايماق قالانىڭ ەڭ تانىمال دەمالىس ورىندارىنىڭ بىرىنە اينالادى دەپ كۇتىلەدى.
سپورتتىق نىساندار: «قازاقستان» جانە قاجىمۇقان ستاديونى
«قازاقستان» سپورت كەشەنىنىڭ 2026 جىلى مودەرنيزاتسياسى تولىق اياقتالۋى ءتيىس. بۇعان دەيىن اپاتتى دەپ تانىلىپ, ينۆەستوردىڭ اۋىسۋىنا بايلانىستى جۇمىسى تۇرالاپ قالعان كەشەندە ەندى باسسەين مەن حوككەي الاڭى حالىققا قىزمەت ەتەتىن بولادى. اسىرەسە, «الماتى» اۋدانىنىڭ تۇرعىندارى بۇل نىساننىڭ اشىلۋىن تاعاتسىزدانا كۇتىپ ءجۇر.
1936 جىلى ىرگەسى قالانعان قاجىمۇقان مۇڭايتپاسوۆ اتىنداعى ستاديوننىڭ ورنىنا سالىنعان جاڭا جابىق ارەنا 2026 جىلدىڭ ءبىرىنشى توقسانىندا پايدالانۋعا بەرىلەدى. 3 600 ورىندىق بۇل نىسان قىس مەزگىلىندە دە سپورتتىق شارالار مەن جاتتىعۋلار وتكىزۋگە مۇمكىندىك بەرەدى. ەڭ باستىسى, جەردىڭ نىسانالى ماقساتى ساقتالىپ, كورەرمەن سىيىمدىلىعى ارتادى.
ساۋدا مەن بيزنەس: «ەۆرازيا» سو-نىڭ ترانسفورماتسياسى
2026 جىل ەلورداداعى ەڭ كونە ساۋدا ورتالىقتارىنىڭ ءبىرى – «ەۆرازيا» ءۇشىن بەتبۇرىس كەزەڭى بولماق. كاسىپكەر سەرىك ءتولباسى نىساندى ساتىپ العاننان كەيىن, ونى زاماناۋي «mixed-use» پلاتفورماسىنا اينالدىرۋدى كوزدەپ وتىر.
مۇندا گاسترونوميالىق بازارلار, جاڭا برەندتەر, كوركەم ارحيتەكتۋرا مەن تۇرعىندار ءۇشىن ويلاستىرىلعان دەمالىس ايماقتارى پايدا بولادى. بۇل اۋداننىڭ ساۋدا كونتسەپتسياسى تۇبەگەيلى جاڭارادى.
جاسىل بەلدەۋ جانە رۋحانيات
«دامۋ» (Damu Park) ساياباعى: ءال-فارابي داڭعىلى مەن كەرەي-جانىبەك حاندار كوشەسىنىڭ قيىلىسىندا (Capital park اۋدانى) ورنالاسقان بۇل ساياباق 2026 جىلدىڭ جازىندا اشىلادى.
مۇندا توعان, سپورتتىق ايماقتار, ساۋدا پاۆيلوندارى مەن ءدامحانالار بولادى.
پراۆوسلاۆ حرامى مەن رۋحاني كەشەن: ۇلتتىق عارىش ورتالىعى ماڭىندا جاڭا رۋحاني-اعارتۋشىلىق كەشەنى بوي كوتەرەدى. 2025 جىلى پاتريارح كيريلل نەگىزىن قالاعان بۇل جوبانىڭ العاشقى عيماراتى 2026 جىلى دايىن بولادى. بولاشاقتا مۇندا مەكتەپ, بالاباقشا, مەديتسينالىق جانە اكىمشىلىك مەكەمەلەردى قامتيتىن 7 عيماراتتان تۇراتىن قالاشىق پايدا بولادى.
جاڭا كونگرەسس-حولل
بەيبىتشىلىك جانە كەلىسىم ساياباعى ماڭىندا سالىنىپ جاتقان جاڭا كونگرەسس-حولل دا 2026 جىلى ەسىگىن اشادى. دەپۋتاتتار قالاشىعىنا جاقىن ورنالاسقان بۇل نىسان تىنىش لوكاتسيادا بولۋىمەن ەرەكشەلەنەدى.
مۇمكىن, الداعى ۋاقىتتا ماڭىزدى حالىقارالىق كەزدەسۋلەر تۇرعىن ۇيلەرمەن قورشالعان تاۋەلسىزدىك سارايىندا ەمەس, ءدال وسى جەردە وتەتىن بولادى.
