ەلوردادا اشىلاتىن بۇل ورتالىقتىڭ ەرەكشەلىگى – جاسوسپىرىمگە «تەحنولوگيانى تۇتىنۋ» دەڭگەيىنەن «تەحنولوگيانى جاساۋ» دەڭگەيىنە وتۋگە جول اشۋىندا. بۇگىندە بالالاردىڭ كوبى تەلەفون مەن الەۋمەتتىك جەلىنى ەركىن مەڭگەرگەنىمەن, ونىڭ ار جاعىنداعى الگوريتم, جاساندى ينتەللەكت قالاي جۇمىس ىستەپ تۇرعانىن, ويىن نەگە ءدال سولاي قۇراستىرىلعانىن, بەينە مەن دىبىستىڭ قالاي وڭدەلەتىنىن بىلە بەرمەيدى.
قازىر قالانىڭ وزىندە ساپالى IT-كۋرستاردىڭ باعاسى ءار وتباسىعا بىردەي قولجەتىمدى ەمەس. ال تەستىلەۋى بار باعدارلامالاردا كەي وقۋشى «ىرىكتەۋدەن وتپەي قالارمىن» دەپ تايساقتايدى. «TUMO Astana» ەمتيحانسىز قابىلداۋ ارقىلى ءجاسوسپىرىمنىڭ ىنتاسىن ءبىرىنشى ورىنعا قويادى, ياعني قىزىعۋشىلىق بولسا – ەسىك اشىق.
ونىڭ ۇستىنە «TUMO» فورماتى مەكتەپتەگى ءداستۇرلى «تىڭدا دا جاتتا» ۇلگىسىن قايتالامايدى. مۇندا ءار بالا ءوز قارقىنىمەن ىلگەرىلەپ, ناقتى جوبالار جاساپ, ناتيجەسىن تسيفرلىق پورتفوليوعا اينالدىرادى. ءبىرى العاشقى سايتىن قۇراستىرىپ شىعۋى مۇمكىن, «ەندى ءبىرى روبوت قۇراستىرىپ, ونى قوزعالتۋدى ۇيرەنەدى, ال ءۇشىنشىسى گەنەراتيۆتى جاساندى ينتەللەكت كومەگىمەن يلليۋستراتسيا جاساپ, موۋشن-گرافيكاعا دەيىن بارادى. مۇنداي تاجىريبە جاسوسپىرىمگە «مەن ىستەي الامىن» دەگەن سەنىم بەرەدى ءارى ۋاقىت وتە كەلە جاي قىزىعۋشىلىق كاسىبي داعدىعا, ءتىپتى بولاشاق ماماندىققا ۇلاسۋى بەك مۇمكىن.
«TUMO Astana» «alem.ai» حالىقارالىق جاساندى ينتەللەكت ورتالىعىندا ورنالاسىپ, الەمنىڭ ونداعان ەلىندە جۇمىس ىستەپ تۇرعان «TUMO» جاھاندىق جەلىسىنىڭ ءبىر بولىگىنە اينالماق.
بۇل ورتالىقتا جاسوسپىرىمدەر 11 باعىت بويىنشا تەگىن ءبىلىم الادى. ولاردىڭ قاتارىندا گەنەراتيۆتى جاساندى ينتەللەكت, روبوتتەحنيكا, باعدارلامالاۋ, گرافيكالىق ديزاين, انيماتسيا, كينووندىرىس, تسيفرلىق مۋزىكا, 3D-مودەلدەۋ, ۆەب-ازىرلەۋ, ويىن جاساۋ جانە موۋشن-گرافيكا بار. وقىتۋ وفلاين فورماتتا, تاجىريبەگە سۇيەنىپ ۇيىمداستىرىلادى. قاتىسۋشىلار ناقتى جوبالارمەن جۇمىس ىستەيدى, وقۋ قارقىنىن وزدىگىنشە ايقىنداپ, تالىمگەرلەردىڭ قولداۋىنا يە بولادى.
بۇل مودەلدىڭ تيىمدىلىگىن «Dalberg» كونسالتينگتىك كومپانياسىنىڭ حالىقارالىق زەرتتەۋى دە دالەلدەگەن. تەحنيكالىق داعدىلارمەن قاتار, «TUMO» كوماندالىق جۇمىس, باستاماشىلدىق, ەمپاتيا, كوممۋنيكاتسيا جانە ۋاقىتتى باسقارۋ سياقتى امبەباپ قۇزىرەتتەردى دامىتادى. ءبىلىم بەرۋ جەكە وقۋ تراەكتورياسىنا نەگىزدەلگەن «TUMO Path» جۇيەسى ارقىلى جۇزەگە اسادى, سونداي-اق ءار ەلدەن كەلگەن ساراپشىلار قاتىساتىن پراكتيكالىق ۆوركشوپتار مەن زەرتحانالاردى قامتيدى.
جوبانى «Alem.ai Foundation» قورى ىسكە اسىرادى. اتالعان قور ەلى-مىزدە تەحنولوگيانى يگەرگەن كرەاتيۆتى تالانتتاردىڭ جاڭا بۋىنىن قالىپتاستىرۋدى كوزدەيدى.
ء«بىز ەلوردا جاسوسپىرىمدەرىنە ىرىكتەۋ مەن ەمتيحانسىز ءوز داعدىلارىن شىڭداۋعا بولاتىن الاڭ ۇسىنعىمىز كەلەدى. ول ءۇشىن تەحنولوگياعا دەگەن سۇيىسپەنشىلىك پەن قىزىعۋشىلىق بولسا جەتكىلىكتى. «TUMO» تاجىريبە جاساۋعا, قاتەلەسۋگە, جاڭا دۇنيەلەردى جاساۋعا جانە دارا جولدى تابۋعا مۇمكىندىك بەرەدى», دەدى «Alem.ai Foundation» قورىنىڭ باس ديرەكتورى ادينا ماراتقىزى.
ايتا كەتەيىك, «Alem.ai Foundation» – ەلىمىزدە جاساندى ينتەللەكت پەن اقپاراتتىق تەحنولوگيالار سالاسىنداعى يننوۆاتسيالىق ءبىلىم بەرۋ باستامالارىن دامىتاتىن كوممەرتسيالىق ەمەس كورپوراتيۆتىك قور. قوردىڭ نەگىزگى جوبالارىنىڭ قاتارىندا «Tomorrow School» جاساندى ينتەللەكت مەكتەبى مەن «TUMO Astana» بار. قور تسيفرلىق ەكونوميكاداعى جاڭا بۋىن جي-كوشباسشىلارىنا قولداۋ كورسەتىپ, ولاردىڭ داعدىلارىن دامىتۋدى ماقسات ەتەدى.
«TUMO Astana»-عا قابىلداۋ اشىق فورماتتا جۇرگىزىلەدى. مۇندا ەمتيحان, تەستىلەۋ نەمەسە باسقا دا بايقاۋ جوق. باعدارلاما تەحنولوگيامەن ەندى تانىسىپ جۇرگەن جاسوسپىرىمدەرگە دە, ءوز داعدىلارىن جۇيەلى تۇردە دامىتىپ, جەكە تسيفرلىق پورتفوليو قالىپتاستىرۋدى كوزدەيتىن قاتىسۋشىلار ءۇشىن دە قىزىقتى بولاتىنى ءسوزسىز. تۇيىندەپ ايتساق, «TUMO Astana» – جاي عانا ۇيىرمە نەمەسە قىسقا كۋرس ەمەس, ءجاسوسپىرىمنىڭ قابىلەتىن ەرتە تانىپ, ونى ناقتى ونىمگە اينالدىرۋعا مۇمكىندىك بەرەتىن ورتا. مۇندا العان ءبىلىم بالانىڭ ەرتەڭگى كاسىبي تاڭداۋىن ايقىنداپ قانا قويماي, ەلىمىزدىڭ كرەاتيۆتى يندۋسترياسى مەن تسيفرلىق ەكونوميكاسىنا جاڭا تىنىس اكەلەتىن كادرلىق الەۋەتتى كۇشەيتپەك. باستىسى – بۇل باستاما جاس بۋىنعا «تەحنولوگيا سەن ءۇشىن جابىق الەم ەمەس, ونى مەڭگەرۋگە دە, جاساۋعا دا بولادى» دەگەن سەنىم ۇيالاتادى.
