كوللاجدى جاساعان – قونىسباي شەجىمباي, «EQ»
ب.جاقسەلەكوۆانىڭ ايتۋىنشا, تۇزەتۋلەردىڭ ماقساتى – زياتكەرلىك ەڭبەكتىڭ ناتيجەلەرى ناقتى ەكونوميكالىق اكتيۆكە اينالاتىن قۇقىقتىق ورتا قالىپتاستىرۋ.
«بۇگىندە ونلاين ساۋدا, ماركەتپلەيستەر بەلسەندى دامىپ كەلەدى. ولار ساتۋشىلاردان تىركەلگەن تاۋار بەلگىسىنىڭ بولۋىن تالاپ ەتەدى. الايدا وتىنىشتەردى قاراۋ مەرزىمى – 7 اي. بۇل بيزنەس سۇرانىسىن قاناعاتتاندىرمايدى. مىسالى, ستارتاپ نەمەسە شاعىن كاسىپكەر ءۇشىن نارىققا شىعۋ, كوبىنە برەندتى تىركەۋ مەرزىمىنە تاۋەلدى. وسىعان بايلانىستى زاڭدا ءوتىنىش بەرۋشىنىڭ قالاۋى بويىنشا تاۋار بەلگىسىن 3 اي ىشىندە جەدەل تىركەۋ تەتىگىن ەنگىزۋ جونىندەگى تۇزەتۋلەر كوزدەلگەن», دەدى ۆيتسە-مينيستر.
سونىمەن قاتار تاۋار بەلگىلەرى يەلەرىنىڭ قۇقىقتارىن قورعاۋدى كۇشەيتۋ ماقساتىندا تاۋار بەلگىسى رەتىندە تىركەۋگە ۇسىنىلعان بەلگىلەرگە قارسىلىق ءبىلدىرۋ مەرزىمى 2 ايعا دەيىن ۇزارتىلدى. ەندى بيزنەس پەن كاسىبي قاۋىمداستىقتىڭ مالىمدەلگەن بەلگىلەردى تالداۋعا, ءوز قۇقىقتارىن قورعاۋعا كوبىرەك ۋاقىتى بولادى.
«پاتەنتتىك سەنىم بىلدىرىلگەن وكىلدەردىڭ قىزمەت ساپاسىن قامتاماسىز ەتۋ ءۇشىن ولاردىڭ دارالاندىرۋ قۇرالدارى مەن پاتەنتتەۋ وبەكتىلەرى بويىنشا قىزمەتى اجىراتىلدى. ناقتى ايتقاندا, ماماندانۋ ەنگىزىلەدى. بۇل كەڭەس بەرۋ ساپاسىن ارتتىرۋعا جانە وتىنىمدەردى سۇيەمەلدەۋ كەزىندە قاتە جىبەرۋ قاۋپىن ازايتۋعا مۇمكىندىك بەرەدى», دەپ ءتۇسىندىردى ب.جاقسەلەكوۆا.
سپيكەر بۇل تۇزەتۋلەر اقش, كانادا, ۇلىبريتانيانىڭ تاجىريبەسى نەگىزىندە ازىرلەنگەنىن اتاپ ءوتتى. وسىلايشا, مينيسترلىك بۇل مودەلدەردىڭ وزىق ەلەمەنتتەرىن ۇلتتىق جاعدايعا بەيىمدەدى.
ەندى بۇدان بىلاي ەلىمىزدە اۆتورلىق قۇقىقتاردى ۇجىمدىق باسقارۋ سالاسى تسيفرلاندىرىلادى. ياعني اۆتورلىق قوعامدار جۇمىسىنىڭ اشىقتىعىن, سونداي-اق جينالعان سىياقىنى ءادىل ءبولۋ مەن تولەۋدى قامتاماسىز ەتۋگە مۇمكىندىك بەرەتىن بىرىڭعاي تسيفرلىق پلاتفورما قۇرۋ جوسپارلانىپ وتىر.
ادىلەت ۆيتسە-ءمينيسترى ب.جاقسەلەكوۆا پلاتفورمانىڭ ەنگىزىلۋى اۆتورلىق قوعامدار قىزمەتىنىڭ اشىقتىعىن قامتاماسىز ەتەتىنىن, بارلىق تاراپتىڭ اقپاراتقا قولجەتىمدىلىگىن ارتتىراتىنىن, قۇقىقتاردى ۇجىمدىق باسقارۋ جۇيەسىنە دەگەن سەنىمدى كۇشەيتەتىنىن اتاپ ءوتتى.
«پلاتفورما شارتتار جاساسۋدان باستاپ اۆتورلارعا سىياقى تولەۋگە دەيىنگى بارلىق ۇدەرىستى قامتيدى. سونىمەن قاتار تسيفرلىق پلاتفورمانى قۇرۋ ورىندالاتىن تۋىندىلاردى ەسەپكە الۋ ماسەلەسىن شەشۋگە مۇمكىندىك بەرەدى. قازىر تەلەۆيدەنيە مەن راديو ارنالارىن اۆتوماتتى تۇردە تانۋ, شىعارمالاردى ەسەپكە الۋ جۇيەسىنە قوسۋ جۇمىستارى ءجۇرىپ جاتىر. مىسالى, مۋزىكالىق شىعارما تەلەارنا نەمەسە راديودا ورىندالسا, بۇل اقپارات تسيفرلىق جۇيەدە تىركەلەدى, ال اۆتورعا سىياقى بەلگىلەنگەن ەرەجەلەرگە سايكەس اۆتوماتتى تۇردە ەسەپتەلەدى. قانداي شىعارما, قانشا رەت جانە قاي كەزەڭدە ورىندالعانى انىق كورىنىپ تۇرادى. بۇل سىياقىنى بولۋدەگى ادىلدىك پەن دالدىكتى ايتارلىقتاي ارتتىرادى», دەدى سپيكەر.
بىرىڭعاي تسيفرلىق پلاتفورما ءۇش كەزەڭمەن ەنگىزىلەدى. ءبىرىنشى كەزەڭدە كەلەسى جىلدىڭ قاڭتارىنان باستاپ, پلاتفورما ارقىلى ەفيرلىك جانە كابەلدىك حابار تاراتۋ ۇيىمدارى جۇمىس ىستەيدى, ەكىنشى كەزەڭدە الداعى جىلعى 1 شىلدەدەن باستاپ تەاترلار, كينوتەاترلار مەن فيلارمونيالار قوسىلادى, ال ءۇشىنشى كەزەڭدە 2027 جىلعى 1 قاڭتاردان باستاپ وزگە دە بارلىق پايدالانۋشىلار جۇيەگە قوسىلادى.
سونداي-اق ب.جاقسەلەكوۆا ەلىمىزدەگى اۆتورلىق قۇقىقتى بۇزعانى ءۇشىن جاۋاپكەرشىلىك كۇشەيتىلگەنىن ايتتى. ياعني مۇنداي قۇقىق بۇزعان ادامعا ازاماتتىق جانە قىلمىستىق جاۋاپكەرشىلىك قاراستىرىلعان. قىلمىستىق كودەكستىڭ 198-بابىنا سايكەس, 80-نەن 160 اەك-كە دەيىن ايىپپۇل سالۋ, 80-نەن 160 ساعاتقا دەيىن قوعامدىق جۇمىستارعا تارتۋ, سونداي-اق 3 جىلدان 6 جىلعا دەيىن باس بوستاندىعىن شەكتەۋ جازاسى قاراستىرىلعان.
سپيكەر ءباسپاسوز ءماسليحاتىندا زياتكەرلىك مەنشىك ماسەلەلەرى بويىنشا قابىلدانعان زاڭدى ءتۇسىندىردى.
«جاڭا زاڭ كەشەندى تۇردە اۆتورلار مەن قۇقىق يەلەنۋشىلەردىڭ قۇقىقتارىن قورعاۋدى ەداۋىر كۇشەيتىپ, ۇجىمدىق باسقارۋ سالاسىنداعى اشىقتىق پەن جاۋاپكەرشىلىكتى ارتتىرادى جانە تۇتاستاي العاندا, ۇلتتىق زياتكەرلىك مەنشىك جۇيەسىن جەتىلدىرۋدەگى ماڭىزدى كەزەڭ بولادى دەپ سەنەمىز. ناتيجەسىندە, بارلىق تاراپ ۇتادى: اۆتورلار ءادىل سىياقى الادى, بيزنەسكە تۇسىنىكتى ءارى بولجامدى ەرەجەلەر قالىپتاسادى, مەملەكەت ءۇشىن كرەاتيۆتى ەكونوميكانىڭ دامۋى مەن زياتكەرلىك ەڭبەككە سالىناتىن ينۆەستيتسيالار ارتادى», دەدى ب.جاقسەلەكوۆا.
