قالالىق اكىمدىك قولداۋىمەن قازاقستان جازۋشىلار وداعى ۇيىمداستىرعان شارا ءۇش الىپ اقىننىڭ ۇلتتىق ادەبيەتتەگى ورنى مەن رۋحاني بيىگىن بۇگىنگى كوزقاراس تۇرعىسىنان زەردەلەۋگە ارنالدى. كەشتىڭ اتاۋى دا اقىندار بولمىسىنىڭ كوركەم ءارى ءدال سيپاتتاماسىنا اينالىپ, ولاردىڭ پوەزياداعى دارالىق سيپاتىن ايقىن كورسەتتى.
كەش بارىسىندا قادىر مىرزا ءالىنىڭ وي بيىگى مەن فيلوسوفيالىق تەرەڭدىگى, ۇلتتىق مىنەزدى, قوعامدىق سانا مەن ادام بولمىسىن تەرەڭ زەردەلەگەن پوەزياسى كەڭىنەن اشىلدى. تۇمانباي مولداعاليەۆتىڭ قازاق ليريكاسىنداعى سەزىم كەڭدىگى, ماحاببات پەن ادام جانىنىڭ نازىك قىرلارىن ايرىقشا سىرشىلدىقپەن جىرلاعان تۋىندىلارى كورەرمەنگە ەرەكشە اسەر سىيلادى. ال جۇمەكەن ناجىمەدەنوۆتىڭ تەرەڭ ويلى, ادام جان دۇنيەسىنىڭ كۇردەلى الەمىنە بويلاعان, ازاماتتىق پافوسى جوعارى, ۇلت تاعدىرىنا الاڭداعان پوەزياسى كەشتىڭ رۋحاني وزەگىنە اينالدى. ولاردىڭ ەڭ تاڭداۋلى ولەڭدەرى وقىلدى.
كوركەمسوز وقۋ, ساحنالىق پوەتيكالىق كومپوزيتسيالار, بەينەۇزىندىلەر مەن مۋزىكالىق سۇيەمەلدەۋ كەشتىڭ مازمۇنىن بايىتتى. اقىنداردىڭ سوزىنە جازىلعان اندەر ورىندالىپ, پوەزيا مەن مۋزىكا ۇندەستىگى قوسا جارقىرادى.
كەشتىڭ اشىلۋىندا الماتى قالاسى اكىمىنىڭ ورىنباسارى ابزال نۇكەنوۆ پەن قازاقستان جازۋشىلار وداعىنىڭ توراعاسى مەرەكە قۇلكەنوۆ ءسوز سويلەپ, قازاق ادەبيەتىنىڭ ۇلى تۇلعالارىن ۇلىقتاۋدىڭ ماڭىزىنا توقتالدى.
پوەتيكالىق كەش – تەك مەرەيتويلىق ەسكە الۋ شاراسى عانا ەمەس, قازاق پوەزياسىنىڭ التىن قورىن جاڭاشا زەردەلەپ, ۇلتتىق ادەبيەتكە دەگەن قۇرمەتتى كۇشەيتكەن مازمۇندى رۋحاني باسقوسۋ بولدى. ءۇش بىردەي الىپ اقىننىڭ وشپەس مۇراسى ەل جادىندا ماڭگى ساقتالاتىنىن, پوەزياسى ۇرپاقپەن بىرگە جاساي بەرەتىنىن تاعى ءبىر مارتە دالەلدەدى.
