«قازاقتاردىڭ باتىرلىق ەپوسى كونە گرەك ەپيكالىق جىرلارىمەن جانە ورتاعاسىرلىق ەۋروپا ساگالارىمەن ۇندەس كەلەتىن تۇستارى بولعانىمەن, مازمۇنى جاعىنان باي, جۇيەلى ءارى ءتول تۋىندى سانالادى. XIX عاسىردا ولار رەسەي يمپەرياسىنىڭ قۇرامىنا ەنگەننەن باستاپ, باتىس مادەنيەتىمەن تىعىز قارىم-قاتىناسقا تۇسۋگە ءماجبۇر بولدى. سول شاقتا وتارلىق ۇستەمدىككە قارسى قازاقتاردىڭ نارازىلىعى جاڭا ۇلتتىق ادەبيەتتەن كورىنىس تاپتى. بۇل شىعارمالار كوركەمدىك دەڭگەيى مەن قارسىلىق رۋحى تۇرعىسىنان جاڭا دەڭگەيگە كوتەرىلدى. ءدال وسى كەزەڭ – قازاق ادەبيەتىنىڭ گۇلدەنۋ ءداۋىرى» دەلىنگەن اقپاراتتا.
باسىلىمدا ايتىلعان كىتاپ – اقش پروفەسسورى توماس ۋيننەردىڭ «قازاقتىڭ فولكلورى مەن ادەبيەتى» اتتى تۋىندىسى. XIX عاسىردى قامتيدى. اۆتور وسى ەڭبەگى ءۇشىن جىلدار بويى عىلىمي زەرتتەۋ جاساعانىن بىلەمىز. (ت.ۋيننەر ەڭبەگى تۋرالى ك.ەسماعامبەتوۆ, ب.وماروۆ, ا.ءشارىپ سىندى عالىمداردىڭ ماقالالارى بار. – رەد.) پايىمداۋىنشا, كەڭەستىك كەزەڭدەگى قازاق ادەبيەتىنىڭ ەڭ وزىق ۇلگىلەرى ۇلتتىق ادەبي مۇرادان سۋسىنداپ, جاڭا زاماننىڭ مازمۇنىن جەتكىزە العان قالامگەرلەردىڭ شىعارمالارىندا كورىنىس تاپتى. ال ەڭ ءساتسىز تۋىندىلار – باتىسقا نەمەسە كەڭەستىك ۇلگىلەرگە كوزسىز ەلىكتەپ, ناتيجەسىندە, قازاقى نەمەسە باتىستىق ۇلگىدە جازىلماعان جاساندى شىعارمالار ەكەنى انىق.
ۋنيۆەرسيتەت گازەتى جاريالاعان اقپاراتتا اتالعان كىتاپ تۋرالى ءتۇيىندى پايىم دا جوق ەمەس. «بۇگىندە الەمنىڭ كوپتەگەن باعىنىشتى نەمەسە جارتىلاي باعىنىشتى حالىقتارى ءوز بولمىسىن قايتا جاڭعىرتۋعا ۇمتىلعان تۇستا, ويلى قاۋىم جاس ۇلتتاردىڭ مادەني تۇرعىدا ساقتالۋى مەن دامۋى ماسەلەسىنە ايرىقشا ءمان بەرۋدە. قازاقستان مىسالىندا باتىس مادەنيەتى مەن يندۋستريالانعان قازىرگى قوعامنىڭ ءبىر ۇلتقا تيگىزگەن ىقپالىن تالداي وتىرىپ, دوكتور ۋيننەر وسى اسا ماڭىزدى تۇيتكىلگە تەرەڭىرەك ۇڭىلۋگە مۇمكىندىك بەرەدى». قالاي دەسەك تە, 70 جىل بۇرىن جازىلعان بۇل كىتاپ پەن اقپارات ءبىزدىڭ مادەنيەتىمىز بەن ادەبيەتىمىزدىڭ باتىس جۇرتىنا تانىلۋىنا سەپتىگىن تيگىزدى دەپ باعالايمىز.
