فوتو: Akorda.kz
ەرلان قارين پرەزيدەنت قاسىم-جومارت توقاەۆ قوعامدا ەڭبەك كۋلتىن ورنىقتىرۋ, جۇمىسشى ماماندىقتارىنىڭ مارتەبەسىن ارتتىرۋ ساياساتىن جۇيەلى تۇردە جۇرگىزىپ وتىرعانىن اتاپ ءوتتى.
«مەملەكەت باسشىسى بيىل كاسىبي مەرەكەلەر اياسىندا ەنەرگەتيكتەردى, قۇتقارۋشىلاردى, مۇعالىمدەردى, مۇنايشىلاردى, دارىگەرلەردى, سۋ شارۋاشىلىعى سالاسىنىڭ قىزمەتكەرلەرىن, اۋىل شارۋاشىلىعى ماماندارىن اقوردادا ارنايى قابىلداپ, قۇرمەت كورسەتتى. جالپى, وسى جىلى پرەزيدەنت جارلىعىمەن 1300-گە جۋىق جۇمىسشى ماماندىقتار وكىلى مەملەكەتتىك ماراپاتقا يە بولدى. وسىنىڭ بارلىعى ەسەلى ەڭبەكتى قادىرلەۋگە باعىتتالعان ماڭىزدى قادامدار. بۇل – ەڭبەك ادامى مەملەكەتتىك ساياساتتىڭ باستى نازارىندا دەگەن ءسوز», دەدى مەملەكەتتىك كەڭەسشى.
ەرلان قارين ەڭبەكتى قادىرلەۋ, ۇرپاقتار ساباقتاستىعىن ساقتاۋ, جۇمىسشى جاستاردى قولداۋ مەملەكەتتىك ساياساتتىڭ باسىم باعىتى بولىپ قالا بەرەتىنىن ايتتى.
«جۇمىسشى ماماندىقتارى جىلى ءبىزدىڭ قوعام ەڭبەكتى ەرەكشە قادىرلەيتىنىن كورسەتتى. حالىق اراسىندا ەلگە ناقتى پايدا اكەلەتىن ادامدار قۇرمەتتى, سىيلى ەكەنىن بايقاتتى. كاسىبي مامانداردى دارىپتەۋ الداعى ۋاقىتتا دا ۇزدىكسىز جالعاسا بەرمەك», دەدى مەملەكەتتىك كەڭەسشى.
ءىس-شارا بارىسىندا جۇمىسشى ماماندىقتارىنىڭ ۇزدىك وكىلدەرى مەملەكەتتىك ناگرادالارمەن ماراپاتتالدى.
سونىمەن قاتار رەسپۋبليكالىق «ەڭبەك جولى» بايقاۋىنىڭ «ۇزدىك ەڭبەك اۋلەتى», «جۇمىسشى جاستاردىڭ ۇزدىك تالىمگەرى», «وندىرىستەگى ۇزدىك جاس قىزمەتكەر» اتالىمدارىندا توپ جارعان ازاماتتارعا قۇرمەت كورسەتىلدى. وعان قوسا «ەرلىك پەن ەڭبەك داستانى» بايقاۋىنىڭ جەڭىمپازدارى, جۇمىسشى جاستاردىڭ الەۋەتىن قولداپ, دامىتۋ ماقساتىندا جۇزەگە اسىرىلىپ جاتقان «جۇمىسشى جاستار اماناتى» جوباسىنىڭ قاتىسۋشىلارى قۇرمەتكە بولەندى.
جيىنعا قاتىسۋشىلار مەملەكەت تاراپىنان قابىلدانىپ جاتقان شارالار قوعامداعى ەڭبەك ادامىنىڭ ءرولىن ارتتىرۋعا ىقپال ەتىپ, جۇمىسشى ماماندىقتارىن كەڭىنەن ناسيحاتتاۋعا سونى سەرپىن بەرگەنىن ايتتى. جۇمىسشى ماماندىقتارى جىلىنىڭ قورىتىندىسىنا ارنالعان سالتاناتتى ءراسىم ەلىمىزدىڭ دامۋىنا كۇندەلىكتى ادال ەڭبەگىمەن ۇلكەن ۇلەس قوسىپ جۇرگەن جانداردىڭ كاسىبيلىگى مەن جاۋاپكەرشىلىگىنە كورسەتىلگەن لايىقتى قۇرمەتتىڭ تاعى ءبىر دالەلى بولدى.
