وسى جىلى قازاق سپورتى كىمدەردەن ايىرىلدى؟

وسى جىلدىڭ قازان ايىندا قازاقستان ۇلتتىق قۇراماسىنىڭ بۇرىنعى قاقپاشىسى اندرەي مورەۆ 52 جاسىندا دۇنيەدەن وزدى. 

اندرەي مورەۆ «جەڭىس», «وقجەتپەس», «توبىل» جانە «اقتوبە» سىندى كوماندالار ساپىندا ونەر كورسەتكەن. «اقتوبە» ساپىندا ەكى دۇركىن قازاقستان چەمپيونى اتانىپ, ەل كۋبوگىنىڭ يەگەرى بولدى. 2005 جىلى ەلىمىزدەگى ەڭ ۇزدىك قاقپاشى اتاعىنا لايىق دەپ تانىلدى.

اندرەي مورەۆ قازاقستان ۇلتتىق قۇراماسىنىڭ قاتارىندا ەكى ماتچ وتكىزگەن. دەبيۋتتىك ويىنىندا قارسىلاس بولعان تۇركيا قۇراماسىنىڭ پەنالتيىن ءساتتى قايتارىپ, جانكۇيەرلەردىڭ قوشەمەتىنە بولەنگەن ەدى.

جارىس الدىندا تولىق مەديتسينالىق تەكسەرۋدەن وتسە دە الماتىداعى Salomon Trail تاۋ جارىسى كەزىندە 70 جاستاعى سپورتشى ۆلاديمير كريۆەنتسوۆ كوز جۇمدى. 

ۇيىمداستىرۋشىلاردىڭ ايتۋىنشا, قارت سپورتشى جارىس باستالعان تۇستا قۇلاپ, دەنساۋلىعى سىر بەرگەن. توتەنشە جاعدايلار قىزمەتىنىڭ ماماندارى ىلە-شالا العاشقى مەديتسينالىق كومەك كورسەتىپ, «مەدەۋ» مۇز ايدىنى كەشەنىندەگى قۇتقارۋ بولىمىنە جەتكىزگەن. دارىگەرلەر سپورتشىنى امان الىپ قالۋعا بار كۇش-جىگەرىن سالعانمەن, سپورتشى قايتىس بولعان. 

ۆلاديمير كريۆەنتسوۆ سپورتپەن كاسىبي تۇردە اينالىسقان. پولياتلون, پرەزيدەنتتىك جانە قىسقى كوپسايىس تۇرلەرىنەن قازاقستاننىڭ بىرنەشە دۇركىن جۇلدەگەرى بولعان. ول سپورتتىق جارىستارعا ۇنەمى قاتىسىپ جۇرگەن بەلسەندى سپورتشى رەتىندە ەل ەسىندە قالارى ءسوزسىز...

ورنى تولماس قازانىڭ ءبىرى – قازاقستاننىڭ ءبىرىنشى ليگاسىندا ونەر كورسەتەتىن «حان ءتاڭىرى» كلۋبىنىڭ ويىنشىسى دياس تولەۋدىڭ جاسىل الاڭدا جان تاپسىرۋى. قايعىلى وقيعا «حان ءتاڭىرى» – «ەكىباستۇز» ماتچىنىڭ 64-ءشى مينۋتىندا بولعان. 19 جاستاعى شابۋىلشىنىڭ دەنساۋلىعى كەنەت ناشارلاپ, ونى الاڭنان زەمبىلمەن الىپ شىققان. كوپ ۇزاماي ويىنشىنىڭ قايتىس بولعانى رەسمي تۇردە جاريالاندى. فۋتبولعا دەگەن سۇيىسپەنشىلىگى جوعارى جاس تالانت «قايرات» اكادەمياسىندا ءتالىم العان. 

بيىل «اقتوبە» فۋتبول كلۋبىنىڭ 15 جاستاعى فۋتبولشىسى ارون مۇسا دا ومىردەن ءوتتى. جاس دارىن ارون مۇسا مەن اجەسى, نەمەرە  اعاسى گازدان ۋلانىپ باقيلىق بولعانى بەلگىلى بولدى. 

بيىل قازاق حالقى «قايراتتىڭ» بۇرىنعى باپكەرى, قازاقستان U-19 جاسوسپىرىمدەر قۇراماسىنىڭ اعا جاتتىقتىرۋشىسى ءارى «قايرات» فك اكادەمياسىنىڭ جەتەكشىسى كيريلل كەكەردەن دە ايىرىلىپ قالدى. ول ۇزاق جىل «قايرات» فۋتبول كلۋبىنىڭ قۇرىلىمىندا ەڭبەك ەتىپ, اكادەميادا جاس فۋتبولشىلاردى شىڭداۋمەن اينالىسقان. 2022–2024 جىلدار ارالىعىندا الماتىلىق كلۋبتىڭ نەگىزگى كومانداسىن تىزگىندەگەن, سونىمەن قاتار 2024 جىلى «ورداباسى» فۋتبول كلۋبىنىڭ باس باپكەرى قىزمەتىن اتقارعان. كيريلل كەكەر فۋتبولشى رەتىندە دە جۇرتشىلىق جادىندا. ول «قىزىلجار», «وقجەتپەس», «سۇڭقار» جانە «شىعىس» كوماندالارىنىڭ ساپىندا قورعاۋشى بولىپ دوپ تەپكەن. 

جەلتوقساندا الماتى – بىشكەك تاسجولىندا بولعان جول اپاتى 5 سپورت ارداگەرىنىڭ ءومىرىن جالمادى. قايعىلى وقيعا بىشكەكتەگى فۋتبول تۋرنيرىنەن قايتىپ كەلە جاتقاندا بولعان. 

قازا تاپقان سپورتشىلاردىڭ ەسىمى:

• اسىل يبرايموۆ – ەستۋ قابىلەتى شەكتەۋلى سپورتشىلاردىڭ فۋتبولدان جاتتىقتىرۋشىسى;
• دميتري موچالسكي – سۋردليمپيالىق چەمپيون, شاحماتتان ەۋروپا چەمپيونى;
• ساكەن سماعۇلوۆ – فۋتبول ارداگەرى, ەستۋ قابىلەتى شەكتەۋلى ۇلتتىق قۇرامانىڭ ويىنشىسى;
• سەرگەي ۆولكوۆينسكي – فۋتبول ارداگەرى, ۇلتتىق قۇراما مۇشەسى;
• سەرىك مولداشەۆ – فۋتبول ارداگەرى, ۇلتتىق كوماندا ويىنشىسى.

قازاق سپورتىنىڭ بەدەلىن بيىكتەتۋ جولىندا تەر توككەن سپورتشىلاردىڭ جارقىن بەينەسى جادىمىزدا قالارى ءسوزسىز...

بۇعان دەيىن 2025 جىلى قازاقستان سپورتشىلارى قانداي تاريحي جەڭىستەرگە قول جەتكىزگەنى تۋرالى جازعان ەدىك.