فوتو: ۇكىمەتتىڭ ءباسپاسوز قىزمەتى
«اتالعان باعدارلاماعا سايكەس ءبىز جاي عانا سۋبسيديا ءبولۋ ادىسىنەن, وڭىرلەردىڭ ورتاق جاۋاپكەرشىلىگى مودەلىنە كوشەمىز. ءبىزدىڭ ماقساتىمىز تەك نەسيە بەرۋ ەمەس, تۇراقتى ءوندىرىس قۇرىپ, ءونىم شىعارۋ كولەمىنىڭ ناقتى ءوسىمىن قامتاماسىز ەتۋ», دەدى پرەمەر-مينيستر.
قارجى مينيسترلىگىنە «ىسكەر ايماق» باعدارلاماسىن قارجىلاندىرۋدى قامتاماسىز ەتۋ تاپسىرىلدى. باعدارلامانى جەرگىلىكتى بيۋدجەتتەر ەسەبىنەن دە قوسا قارجىلاندىرۋ كوزدەلۋى قاجەت. ءوڭىر اكىمدىكتەرى ءبىرىنشى دەڭگەيدەگى سۋبسيديالاردى (بيۋدجەتتىڭ 70%-ى) ءبولۋ ءۇشىن اۋدانداردىڭ ەرەكشەلىگىن ەسكەرە وتىرىپ, بارىنشا قىسقا مەرزىمدە باسىم سالالاردىڭ تىزبەسىن ازىرلەۋ كەرەك.
سونداي-اق ۇكىمەت باسشىسى جاڭا بيۋدجەت كودەكسىنە سايكەس شاعىن بيزنەستەن تۇسەتىن بارلىق سالىق ءتۇسىمى اكىمدىكتەردىڭ يەلىگىندە قالاتىنىن اتاپ ءوتتى.
«جاڭا بيۋدجەت كودەكسى شاعىن بيزنەستەن تۇسەتىن بارلىق سالىق ءتۇسىمىن اكىمدىكتەردىڭ يەلىگىندە قالدىرۋدى كوزدەيدى. ەندى اكىمدەر ءاربىر كاسىپكەردىڭ تابىسقا جەتۋىنە مۇددەلى بولادى. ويتكەنى ول جەرگىلىكتى بيۋدجەت كىرىستەرىنىڭ وسۋىنە تىكەلەي ىقپال ەتەدى», دەدى ولجاس بەكتەنوۆ.
ايتا كەتەيىك, ەلىمىزدە كاسىپكەرلەرگە تەگىن بۋحگالتەرلىك كەڭەس بەرەتىن «حالىق بۋحگالتەرى» اكتسياسى باستالادى.
