فوتو: istockphoto.com
2024 جىلدىڭ قاراشاسىنان 2025 جىلدىڭ ناۋرىزىنا دەيىن سوتتالۋشى س. قىزمەتكەرلەردىڭ جەكە دەرەكتەرىنە قول جەتكىزگەن. كاسىپوداق تاراپىنان ماتەريالدىق كومەك كورسەتىلەدى دەگەن جەلەۋمەن جانە باسقا دا ويدان شىعارىلعان سەبەپتەرمەن ارىپتەستەرىن اداستىرىپ, ولاردى ميكروقارجى ۇيىمدارىندا ونلاين بەينەۆەريفيكاتسيادان وتكىزگەن.
«زاڭعا قايشى نيەتتەرىنەن بەيحابار بولعان مەكتەپ قىزمەتكەرلەرى وعان سەنىپ, بەينەۆەريفيكاتسيادان ءوتىپ, وزدەرىن كاسىپوداق كومەگىن الۋ راسىمىنە قاتىسىپ جاتىرمىز دەپ ويلاعان. كەيىن ماقۇلدانعان نەسيەلەر س.-نىڭ بانك شوتىنا اۋدارىلعان. الىنعان قاراجاتتىڭ از عانا بولىگى ماتەريالدىق كومەك رەتىندە قىزمەتكەرلەرگە بەرىلىپ, قالعان سومانى ول ءوز قالاۋىنشا جۇمساعان. قىلمىستىق ارەكەتتەر ناتيجەسىندە س. ميكروقارجى ۇيىمدارىنا جالپى سوماسى 3,6 ميلليون تەڭگەدەن استام ماتەريالدىق زالال كەلتىرگەن. سوتتا س. كىناسىن تولىق مويىنداپ, جاساعان ىسىنە وكىنىش ءبىلدىردى», دەلىنگەن سوت حابارلاماسىندا.
ءىستىڭ ءمان-جايىن, جاسالعان ارەكەتتەردىڭ قوعامدىق قاۋىپتىلىك دەڭگەيىن, سوتتالۋشىنىڭ جەكە باسىن جانە جابىرلەنۋشىلەرگە كەلتىرىلگەن ماتەريالدىق زالالدىڭ ءبىر بولىگىنىڭ وتەلگەنىن ەسكەرە وتىرىپ, سوت س.-عا 3 جىل 6 اي مەرزىمگە بوستاندىعىن شەكتەۋ, جازانىڭ بۇكىل مەرزىمىنە پروباتسيالىق باقىلاۋ بەلگىلەۋ جانە 5 جىلعا كاسىپوداق ءتورايىمى لاۋازىمىن اتقارۋ قۇقىعىنان ايىرۋ تۇرىندەگى جازا تاعايىندادى.
«كونستيتۋتسيانىڭ 30 جىلدىعىنا بايلانىستى امنيستيا تۋرالى» زاڭنىڭ 3-بابى 4-تارماعىنا سايكەس, سوتتالۋشىنىڭ جازا مەرزىمى قىسقارتىلىپ, 2 جىل 9 اي 18 كۇن بوستاندىعىن شەكتەۋ تۇرىندەگى جازا تۇپكىلىكتى بەلگىلەندى.
جابىرلەنۋشىلەردىڭ ازاماتتىق تالاپ-ارىزدارى قاناعاتتاندىرىلدى. ۇكىم زاڭدى كۇشىنە ەندى.
