فوتو: وقۋ-اعارتۋ مينيسترلىگى
الماتىداعى مەدەۋ اۋدانىندا ەكى ءبىلىم بەرۋ نىسانى 140 ورىندىق جاڭا №195-ءشى بالالار بوبەكجاي-باقشاسى مەن رەكونسترۋكتسيادان وتكەن №99-شى مەكتەپتىڭ تەحنيكالىق اشىلۋى ءوتتى. مەكتەپتە حيميا, فيزيكا جانە بيولوگيا كابينەتتەرى, سپورت زالى, بەينەلەۋ ونەرى كابينەتى, سونداي-اق 100 ورىندىق اكت زالى جاساقتالعان. وقۋشىلاردىڭ قاۋىپسىزدىگىن ساقتاۋ ماقساتىندا زاماناۋي ءورت قاۋىپسىزدىگى جۇيەسى ەنگىزىلگەن, دابىل قۇرىلعىلارى ورناتىلعان, عيمارات سەيسميكالىق تۇرعىدا كۇشەيتىلگەن.
ال اقتوبە وبلىسىنىڭ جاعابۇلاق اۋىلىندا 100 ورىندىق زاماناۋي بالاباقشا اشىلدى. مۇندا ۇيىرمەلەر مەن دامىتۋ ستۋديالارى جۇمىس ىستەيدى, سونىڭ ىشىندە 4 جاستان باستاپ روبوتوتەحنيكا, ۇلدارعا دويبى, قىزدارعا توقۋ ۇيىرمەلەرى ۇيىمداستىرىلعان.
قوستاناي وبلىسىنىڭ فرۋنزەنسكوە اۋىلىندا جاڭا بالاباقشا پايدالانۋعا بەرىلدى. عيمارات زاماناۋي مەكتەپكە دەيىنگى ءبىلىم ستاندارتتارىنا تولىق ساي كەلەدى. وبلىستا 28 مىڭنان استام بالانى قامتيتىن 467 مەكتەپكە دەيىنگى ۇيىم جۇمىس ىستەپ تۇر.
شىعىس قازاقستان وبلىسىنىڭ سارىولەڭ اۋىلىندا باۋىرجان مومىش ۇلى اتىنداعى جاڭا مەكتەپ اشىلدى. ءبىلىم بەرۋ ۇيىمى قازىرگى تالاپتارعا سايكەس جابدىقتالعان: حيميا, بيولوگيا, فيزيكا, ماتەماتيكا كابينەتتەرى جانە باسقا دا ءپان كابينەتتەرى, شاعىن ورتالىق جۇمىس ىستەيدى. وقۋشىلار ءۇشىن اسحانا, سپورت جانە اكت زالدارى قاراستىرىلعان.
ال ەلوردادا «كەلەشەك مەكتەپتەرى» ۇلتتىق جوباسى اياسىندا №23-ءشى مەكتەپتىڭ قۇرىلىسى اياقتالدى. ايتا كەتەيىك, سالىنعان جانە سالىنىپ جاتقان مەكتەپتەردىڭ باسىم بولىگى استانانىڭ ەسىل اۋدانى مەن نۇرلى شاعىناۋدانىندا ورنالاسقان.
ماڭعىستاۋ وبلىسىنىڭ جاڭاوزەن قالاسىندا 1200 وقۋشىعا ارنالعان جاڭا فورماتتاعى مەكتەپ اشىلدى. مەكتەپتە 61 وقۋ كابينەتى, سونىڭ ىشىندە ديزاين جانە تەحنولوگيا, تاماقتانۋ مادەنيەتى, كوركەم ونەر, روبوتوتەحنيكا, STEM جانە مۋزىكا كابينەتتەرى قاراستىرىلعان. قاۋىپسىزدىكتى قامتاماسىز ەتۋ ءۇشىن 126 بەينەكامەرا ورناتىلعان. بۇل وڭىردە ۇلتتىق جوبا اياسىندا پايدالانۋعا بەرىلگەن 12-ءشى مەكتەپ.
مينيسترلىك مالىمەتىنشە, قازىر ەلىمىزدە 192 مىڭ ورىنعا ارنالعان 130 مەكتەپتىڭ قۇرىلىسى اياقتالعان. ونىڭ 92-ءسى «كەلەشەك مەكتەپتەرى» ۇلتتىق جوباسى اياسىندا سالىنعان, جارتىسى اۋىلدىق ەلدى مەكەندەردە ورنالاسقان.
ايتا كەتەيىك, 2025–2026 وقۋ جىلىندا ەلىمىزدە 232 ءبىلىم بەرۋ ۇيىمى سالىنادى.
