فوتو: Bristol Museum & Art Gallery (Facebook)
ۇرلىق 25 قىركۇيەككە قاراعان ءتۇنى بولعان. بريستول قالالىق كەڭەسىنىڭ وكىلى مالىمدەگەندەي, بيلىك الدىن الا تەرگەۋ جۇمىستارى اياقتالعانشا اقپاراتتى جاريالاماۋدى ءجون كورگەن. سونىمەن قاتار ارحيۆ قىزمەتكەرلەرىنە ناقتى قانداي زاتتاردىڭ جوعالعانىن انىقتاۋ ءۇشىن ۋاقىت قاجەت بولعان. مۋزەي قويماسىنان مادەني جانە ماتەريالدىق تۇرعىدان اسا قۇندى 600-دەن استام زات ۇرلانعانى تۋرالى BBC-ءدىڭ رەسەيدەگى قىزمەتى حابارلاعان.
«بۇل ارتەفاكتىلەر XVIII عاسىردىڭ سوڭىنان XX عاسىردىڭ سوڭىنا دەيىنگى كەزەڭدە بريتانيا مەن بۇرىن بريتان يمپەرياسىنىڭ قۇرامىنا كىرگەن ەلدەر اراسىنداعى بايلانىستاردى قۇجاتتايتىن كوللەكتسيانىڭ ءبىر بولىگى ەدى. كوللەكتسيا كوپتەگەن مەملەكەتتەر ءۇشىن مادەني ماڭىزعا يە. بۇل ارتەفاكتىلەر بريتان يمپەرياسىنىڭ قىزمەتىنە قاتىسقان ءارى ودان زارداپ شەككەن ادامداردىڭ ومىرىنە قاتىستى باعا جەتپەس دەرەكتەر», دەدى بريستول قالالىق كەڭەسىنىڭ مادەنيەت جانە كرەاتيۆتى يندۋستريالار دەپارتامەنتىنىڭ جەتەكشىسى فيليپ ۋوكەر.
پوليتسيا ۇرلىقتان كەيىنگى بەينەباقىلاۋ جازبالارىنان الىنعان 4 ەر ادامنىڭ فوتوسۋرەتتەرىن جاريالاپ, ولاردى تانىعان نەمەسە ۇرلانعان زاتتاردى ونلاين ساتۋ الاڭدارىندا بايقاپ قالعان بارلىق ازاماتتاردى حابارلاسۋعا شاقىرادى.
ەسكە سالايىق, بۇعان دەيىن قازان ايىندا لۋۆر مۋزەيى دە تونالىپ, ناپولەون داۋىرىنە قاتىستى زەرگەرلىك بۇيىمدار ۇرلانعان ەدى. فرانتسيادا تەرگەۋ ءالى جالعاسىپ جاتىر.
