ۇستازدار جاساندى ينتەلەكتىنى قولدانۋ ادىستەرىن مەڭگەردى

جاساندى ينتەللەكتتىڭ مۇمكىندىگىن ءتيىمدى پايدالانۋ

سەميناردىڭ نەگىزگى ماقساتى – مۇعالىمدەرگە جاساندى ينتەللەكتىنى ءبىلىم بەرۋدە ءتيىمدى قۇرال رەتىندە كورسەتۋ. زاماناۋي تەحنولوگيالار وسىعان دەيىن ءبىلىم بەرۋدە قولدانىلىپ كەلگەن ءداستۇرلى تاسىلدەردى تەز وزگەرتىپ جاتىر. ال جاساندى ينتەللەكت ەندى پەداگوگتاردىڭ كۇندەلىكتى جۇمىسىنىڭ ءبىر بولىگىنە اينالىپ, ساباققا دايىندالۋعا, تەستتەر مەن كورنەكى ماتەريالدار جاساۋعا, وقىتۋ ۇدەرىسىن وقۋشىنىڭ جەكە قابىلەتىن ەسكەرىپ بەيىمدەۋگە كومەكتەسەتىن تاپتىرماس قۇرالعا اينالىپ ۇلگەردى.

ء«بىلىم بەرۋ سالاسىن دامىتۋ جانە پەداگوگتاردىڭ قۇزىرەتتىلىگىن ارتتىرۋ – جۇمىسىمىزدىڭ باستى باعىتتارىنىڭ ءبىرى. مۇعالىمدەردىڭ كاسىبي تۇرعىدان وسۋىنە جانە جاڭا تەحنولوگيالاردى بارىنشا مەڭگەرۋىنە مۇمكىندىك جاساۋعا بارىمىزدى سالامىز. سوندىقتان Halyk قورىمەن بىرگە وسىنداي ءبىلىم بەرۋ باستامالارىن جۇزەگە اسىرىپ كەلەمىز», دەدى NNEF قوعامدىق قورىنىڭ ءبىلىم بەرۋ ءبولىمىنىڭ باسشىسى ماريا كوۆجاساروۆا.

وقىتۋدىڭ بەس پراكتيكالىق ءمودۋلى

سەمينار باعدارلاماسى جالپى ۇزاقتىعى 20 ساعاتتى قامتيتىن بەس پراكتيكالىق مودۋلدەن تۇردى. ونىڭ ءبىرىنشىسى – «جي ءبىلىم بەرۋدە». مۇندا جاساندى ينتەللەكتىنىڭ مۇمكىندىكتەرى, تسيفرلىق وقىتۋ ادەبى جانە اكادەميالىق ادالدىق نەگىز بولادى. ەكىنشى مودۋل – «جي كومەگىمەن ساباققا دايىندالۋ»: ChatGPT جانە باسقا پلاتفورمالاردى جوسپار, تەست جانە تاپسىرما ازىرلەۋدە پايدالانۋ. ءۇشىنشى مودۋل – «ۆيزۋالدى كونتەنت جاساۋ»: Gamma AI جانە Canva ارقىلى پرەزەنتاتسيالار دايىنداۋ. ءتورتىنشىسى – «مۋلتيمەديا جانە ينفوگرافيكا»: ۆيدەو, سۋرەت جانە اۋديو ماتەريالداردى دايىنداۋعا قاجەتتى قۇرالداردى مەڭگەرۋ. بەسىنشى مودۋل – «گەيميفيكاتسيا»: EducaPlay, Quizizz, Classcraft پلاتفورمالارى ارقىلى وقۋشىلاردىڭ بىلىمگە قىزىعۋشىلىعىن ارتتىرۋ.

بۇل مودۋلدەردىڭ بارلىعى پراكتيكالىق جاتتىعۋلارعا نەگىزدەلگەن. كۋرس بارىسىندا قاتىسۋشىلار ءدارىس تىڭداپ قانا قويماي, وزدەرىنە قاجەتتى وقۋ ماتەريالدارىن جاساپ, جي قۇرالدارىن قولدانىپ, ءوز جۇمىسىنداعى ناقتى كەيستەردى تالقىلاۋعا مۇمكىندىك الدى.

«جي مۇمكىندىكتەرىن ءتۇسىندىرىپ قانا قويماي, مۇعالىمدەرگە بۇل قۇرالداردى سىنىپتا قالاي قولدانا الاتىنىن كورسەتۋ ءبىز ءۇشىن باستى ماقسات بولدى. اقتاۋ مەن اۋدانداردان كەلگەن مۇعالىمدەر بەلسەندى تۇردە ترەنينگكە قاتىسىپ, سۇراقتار قويىپ, ءتۇرلى تاجىريبە جاساعانى ءبىزدى قاتتى قۋانتتى», دەدى باعدارلاما ترەنەرى, الماتى قالاسىنداعى «ميراس» حالىقارالىق مەكتەبىنىڭ وقىتۋشىسى ەرلان كەرىمباي.

ال ءبىلىم بەرۋدە جاساندى ينتەلەكتىنى قولدانۋ تاقىرىبى بويىنشا بۋداپەشت ۋنيۆەرسيتەتىندە ديسسەرتاتسيا قورعاپ كەلگەن, جوبانىڭ ترەنەرى اديليا باتتالوۆانىڭ ايتۋىنشا, جاساندى ينتەللەكتىنى مۇعالىمدى الماستىراتىن قۇرال دەپ ەمەس, كومەكشى رەتىندە قابىلداۋ كەرەك.

«مۇعالىمدەرگە ChatGPT جانە باسقا دا جاساندى ينتەللەكت قۇرالدارىنىڭ تاپتىرماس كومەكشى بولاتىنىن كورسەتتىك. ەڭ باستىسى, سىني تۇرعىدان ويلاۋ, شىعارماشىلىق ءادىس-ءتاسىلدى قولدانۋ», دەدى باعدارلاما ترەنەرى اديليا باتتالوۆا.

جي ارقىلى ساباقتى تۇرلەندىرە تۇسۋگە بولادى

ترەنينگكە قاتىسقان پەداگوگتار جاساندى ينتەللەكت ساباقتى بارىنشا تۇرلەندىرە ءتۇسىپ, وقۋشىنىڭ قىزىعۋشىلىعىن ارتتىرۋدىڭ وڭ جولى ەكەنىن ايتادى.

«جاساندى ينتەللەكتكە قاتىستى كۋرستان ءوتىپ, ءبىز تەك ChatGPT قۇرالى جايلى عانا ەمەس, بالالارمەن جۇمىس ىستەۋدىڭ ءتيىمدى تاسىلدەرىن, وقۋشىنىڭ دامۋىنا, ماماندىق تاڭداۋىنا باعىت بەرۋ جولدارىن دا ۇيرەندىك. ءبىز ءتۇرلى باعدارلامانى مەڭگەرىپ, وتە پايدالى كەڭەستەر الدىق», دەدى باسقۇدىق اۋىلىنداعى №14 ورتا مەكتەبىنىڭ مۇعالىمى ءايتبيبى بەكوۆا.

ماڭعىستاۋ وبلىسى ءبىلىم باسقارماسى وقۋ-ادىستەمەلىك ورتالىعىنىڭ قوعامدىق-گۋمانيتارلىق ءبىلىم بەرۋ ءبولىمىنىڭ باسشىسى جانسايا مولداجانوۆانىڭ ايتۋىنشا, قازىر جاساندى ينتەللەكت قوعام دامۋىنا اسەر ەتەتىن نەگىزگى تەحنولوگيالاردىڭ بىرىنە اينالدى.

«وعان مەملەكەت باسشىسى قاسىم-جومارت توقاەۆ تا ۇستازداردىڭ تامىز كەڭەسىندە اسا ءمان بەرگەن بولاتىن. جاساندى ينتەللەكت قازىر ءبىلىم بەرۋ سالاسىنا دا بەلسەندى تۇردە ەنگىزىلىپ جاتىر», دەيدى.

ءىس-شارا سوڭىندا ترەنينگتىڭ بارلىق قاتىسۋشىسىنا جاساندى ينتەللەكتىنى ءبىلىم بەرۋدە قولدانۋعا قاجەتتى داعدىلاردى مەڭگەرگەنىن راستايتىن سەرتيفيكات تابىستالدى. پەداگوگتار بۇل جاڭا تاسىلدەردى ءوز مەكتەپتەرى مەن كوللەدجدەرىندە ەنگىزۋدى جوسپارلاپ وتىر.

NNEF قوعامدىق قورى مەن تيمۋر ق ۇلىباەۆتىڭ Halyk قورى وسىنداي ءبىلىم بەرۋ باستامالارىن جالعاستىرىپ, باعدارلامانىڭ اۋقىمىن كەڭەيتۋ ءارى قاتىسۋشىلار سانىن ارتتىرۋدى كوزدەپ وتىر. جوبانىڭ باستى ماقساتى – مۇعالىمنىڭ وزىنە سەنىمدىلىگىن ارتتىرىپ, وقۋشىعا زامان تالابىنا ساي ءبىلىم الاتىن تۇراقتى تسيفرلىق وقىتۋ ەكوجۇيەسىن قالىپتاستىرۋ.