فوتو: اشىق دەرەككوز
دەپۋتاتتىڭ ايتۋىنشا, شەتەلدە بيلەت تولىق باعامەن ساتىلسا, كومپانيا تۇتىنۋشى قاراجاتىن پايدالانعانى ءۇشىن جاۋاپكەرشىلىك الادى جانە اقشانى قايتارۋدان باس تارتپايدى.
«مىسالى, بيلەت 40 مىڭ تەڭگە, ال مەن ونى جەڭىلدىكپەن 12 مىڭعا ساتىپ الدىم, مۇنداي بيلەتتەردىڭ ءبىر بولىگى قايتارىلمايتىن بولۋى مۇمكىن. بىراق بىزدە ولاي ەمەس. قازاقستاندا بيلەتتەردىڭ باسىم بولىگى نەگىزسىز «قايتارىلمايدى» دەپ راسىمدەلەدى. كەلىسىمشارتتى كورسەتپەي تۇرىپ, تۇتىنۋشىدان اقشا ۇستاپ قالۋعا ەشكىمنىڭ قۇقىعى جوق», دەدى ول.
ابەنوۆ ۆيتسە-مينيستر تالعات لاستاەۆتىڭ مالىمدەمەسىن سىنعا الىپ, مەملەكەتتىك قىزمەتكەر قوعامعا جالعان تۇسىنىك قالىپتاستىرماۋى ءتيىس ەكەنىن اتاپ ءوتتى.
«پارلامەنتكە كەلمەي تۇرىپ, ماسەلەنى تولىق زەرتتەمەي, قوعامدى دەپۋتاتتارعا قارسى قويۋ – ەتيكاعا دا, زاڭعا دا قايشى. بۇل جەكە تاسىمالداۋشىلاردىڭ مۇددەسىن قورعاۋ. ال بيلەتتەر بىزدە ونسىز دا تىم قىمبات», دەدى ماجىلىسمەن.
ول سونىمەن بىرگە اۆياكومپانيالار بۇعان دەيىن جەڭىلدىكتەر سۇراعانىن, الايدا تۇتىنۋشى ءۇشىن بيلەت باعاسى ارزانداماعانىن مىسالعا كەلتىردى.
«قىزىلورداعا بيلەت الدىن الا السام دا, 40 مىڭ تەڭگە. تاعى دا «قايتارىلمايدى» دەيدى. بۇل جۇيەنىڭ جونسىزدىگى», دەدى دەپۋتات.
ەستەرىڭىزگە سالا كەتەيىك, 8 جەلتوقساندا مۇرات ابەنوۆ قازاقستاندا «قايتارىلمايتىن بيلەتتەردى» جويۋ باستاماسىن جاريالاعان بولاتىن. ال كەشە ۆيتسە-مينيستر تالعات لاستاەۆ بۇل قادام اۋە بيلەتتەرىنىڭ قىمباتتاۋىنا اكەلۋى مۇمكىن ەكەنىن ايتقان ەدى.
