اسكەري قىزمەتشىلەر نەسيەسىن قالاي كەيىنگە قالدىرا الادى؟

قاعيدالارعا سايكەس, بارلىق قىزمەت ەتۋ مەرزىمىنە جانە دەموبيليزاتسيادان كەيىن 60 كۇن ىشىندە پايىزدار, ايىپپۇلدار مەن ءوسىمپۇلدار ەسەپتەلمەي تولەمدەر بويىنشا كەيىنگە قالدىرۋ بەرىلەدى.

2025 جىلعى قاراشاداعى مالىمەتتەر بويىنشا, مەرزىمدى اسكەري قىزمەتكە شاقىرىلعان 21,9 مىڭ قارىز الۋشىنىڭ ىشىنەن 19,2 مىڭى قارىزدار بويىنشا كەيىنگە قالدىرۋ مۇمكىندىگىن الدى. بەرىلگەن كەيىنگە قالدىرۋدىڭ جالپى سوماسى 8,5 ملرد تەڭگەنى قۇرادى.

كەيىنگە قالدىرۋ مۇمكىندىگىن الۋ ءۇشىن نە ىستەۋ كەرەك؟

قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە, كەيىنگە قالدىرۋ ءوتىنىشسىز بەرىلەدى. اسكەرگە شاقىرۋ تۋرالى دەرەكتەردى قورعانىس مينيسترلىگى كرەديتتىك بيۋروعا, سودان كەيىن بانكتەر مەن ميكروقارجى ۇيىمدارىنا جىبەرەدى. بانكتەر مەن ميكروقارجى ۇيىمدارى حابارلاما العان ساتتەن باستاپ كۇنتىزبەلىك 15 كۇن ىشىندە كەيىنگە قالدىرۋ مۇمكىندىگىن ۇسىنۋعا مىندەتتى.

حابارلاۋ جازباشا نەمەسە ونلاين رەجيمىندە جەكە قاتىسۋ نەمەسە قوسىمشا كەلىسىمدەرگە قول قويۋ قاجەتتىلىگىنسىز جۇزەگە اسىرىلادى. شارا نەگىزگى بورىشقا جانە ەسەپتەلەتىن سىياقىعا قولدانىلادى.

سونداي-اق كەيىنگە قالدىرۋ كەزەڭىندە ايىپپۇلدار, ءوسىمپۇلدار ەسەپتەۋگە جانە ءوندىرىپ الۋ شارالارىن قولدانۋعا تىيىم سالىنادى. اسكەري ءبولىمنىڭ تىزىمىنەن مەرزىمىنەن بۇرىن شىعارىلعان جاعدايدا, كەيىنگە قالدىرۋ تاعى 60 كۇنگە ساقتالادى.

كەيىنگە قالدىرۋدان باس تارتۋدى قالاسا, قارىز الۋشى جازباشا ءوتىنىشتى بانك حابارلاما العان كۇننەن باستاپ كۇنتىزبەلىك 14 كۇن ىشىندە جىبەرۋگە قۇقىلى, مۇنداي جاعدايدا كرەديتور كەيىنگە قالدىرۋدى قولدانۋدىڭ كۇشىن جويادى.

ەگەر كرەديت بويىنشا سوت شەشىمى شىعارىلسا, تاتۋلاسۋ كەلىسىمى جاسالسا نەمەسە اتقارۋشىلىق جازبا رەسىمدەلسە, كەيىنگە قالدىرۋ بەرىلمەيدى.

كەيىنگە قالدىرۋدى اۆتوماتتى تۇردە الماعان جاعدايدا اسكەري قىزمەتشى قارجى ۇيىمىنا جازباشا ءوتىنىش جىبەرە الادى, ماسەلە رەتتەلمەگەن جاعدايدا بانك/ميكروقارجى ومبۋدسمانىنا جانە قارجى نارىعىن رەتتەۋ جانە دامىتۋ اگەنتتىگىنە جۇگىنە الادى.