فوتو: threads.com/@aigulyelemes
اقمارال ءالنازاروۆا ءوزىنىڭ بورىشىن ورىنداعانىن ايتىپ, ەشكىمنىڭ الدىندا اقتالۋعا مىندەتتى ەمەس ەكەنىن جەتكىزدى.
«وكىنىشكە قاراي, حالىقتا كۇمان بولدى. بىراق بۇل مەنىڭ العاش رەت كومەك كورسەتۋىم ەمەس. بۇل جولى تەك بىرەۋ ونى الەۋمەتتىك جەلىگە جۇكتەپ جىبەردى. كومەك شىنىمەن كورسەتىلدى. «ارالارىڭىزدا دارىگەر بار ما؟ ادامنىڭ قان قىسىمى ءتۇسىپ كەتتى» دەگەندە, مەن دەرەۋ بارىپ كومەكتەستىم. مەنىڭ ورنىمدا كەز كەلگەن دارىگەر, كەز كەلگەن مەديتسينا قىزمەتكەرى ءدال سولاي جاسار ەدى, وعان سەنىمدىمىن. سوندىقتان قانداي دا ءبىر كۇدىككە نەمەسە سۇراققا سەبەپ كورىپ تۇرعان جوقپىن», دەدى اقمارال ءالنازاروۆا.
مينيسترگە «بۇل ۆيدەونى پيار ماقساتىندا تۇسىرگەن جوق پا؟» دەگەن سۇراق تا قويىلدى.
ء«ار ادامنىڭ پىكىرى بولادى. مەن اركىمنىڭ كوزقاراسىنا ىقپال ەتە المايمىن. ەڭ باستىسى ءوز بورىشىمدى ورىندادىم. ەشكىمنىڭ الدىندا اقتالۋعا مىندەتتى ەمەسپىن», دەپ جاۋاپ بەردى مينيستر.
ەسكە سالا كەتەيىك, قاراشا ايىنىڭ سوڭىندا Threads الەۋمەتتىك جەلىسىنىڭ قولدانۋشىسى ەلوردادان الماتىعا باعىت العان رەيستە ءبىر جولاۋشىنىڭ جاعدايى ناشارلاعانى تۋرالى ۆيدەو جاريالاعان. ال, ءوزىن ناشار سەزىنگەن جولاۋشىعا العاشقى كومەك كورسەتكەن دارىگەر دەنساۋلىق ساقتاۋ ءمينيسترى ەكەنى بەلگىلى بولدى.
كەيىنىرەك ۇشاق بورتىندا ءوزىن ناشار سەزىنگەن جولاۋشى جۋرناليست گۇلميرا ابىقاي ەكەنى انىقتالدى. ول ءوز كەزەگىندە بۇل وقيعانىڭ پيار ءۇشىن جاسالماعانىن العا تارتىپ, كومەك كورسەتكەن بارلىق جانعا العىسىن بىلدىرگەن ەدى.
«مەن ءدال وسى رەيستە, ەكونوم كلاستا 17J ورىندa وتىرعان جولاۋشى رەتىندە دەنساۋلىعىم كەنەت سىر بەرگەندە شىن جاناشىر بولعان بارشا جاقسى جاندارعا العىس ايتقىم كەلەدى», دەدى ول.
