فوتو: Zakon.kz
زەينەتاقى اكتيۆتەرىنىڭ قىسقا مەرزىمدى جەكە كەزەڭدەردەگى كىرىستىلىگى ولاردى باسقارۋ تيىمدىلىگىنىڭ كورسەتكىشى بولا المايدى. ويتكەنى قارجى قۇرالدارى مەن باسقا وپەراتسيالار بويىنشا سىياقى تۇرىندەگى قىسقا مەرزىمدە ەسەپتەلگەن كىرىستەر وسى كەزەڭدەگى باعالى قاعازدار مەن ۆاليۋتا باعامدارىنىڭ وزگەرۋىن ءاردايىم جابا بەرمەيدى. سوندىقتان ينۆەستيتسيالىق كىرىستىڭ مولشەرىن وبەكتيۆتى تالداۋدى كەم دەگەندە 1 جىلدىق كورسەتكىش بويىنشا جاساعان ءجون.
2024 جىلدىڭ قاراشاسىنان باستاپ 2025 جىلدىڭ قازانىنا دەيىنگى 12 اي ىشىندە ەسەپتەلگەن ينۆەستيتسيالىق كىرىس مولشەرى شامامەن 2,82 ترلن تەڭگە بولدى, وسى كەزەڭدەگى كىرىستىلىك – 12,58%. 2025 جىلعى 1 قاراشاداعى جاعداي بويىنشا جۇمىس بەرۋشىنىڭ مىندەتتى زەينەتاقى جارنالارى (جمزج) ەسەبىنەن زەينەتاقى اكتيۆتەرىنىڭ كىرىستىلىگى سوڭعى 12 ايدا 7,51% قۇرادى.
ورتا جانە ۇزاق مەرزىمدى كەلەشەكتە زەينەتاقى جيناقتارىنىڭ وڭ ناقتى (جيناقتالعان ينفلياتسيادان اساتىن) تابىستىلىعى قامتاماسىز ەتىلەدى. ماسەلەن, 1998 جىلى جيناقتاۋشى زەينەتاقى جۇيەسى قۇرىلعان ساتتەن باستاپ 2025 جىلعى 1 قاراشاعا دەيىن جيناقتالعان ينۆەستيتسيالىق كىرىستىلىك 1062,38% بولدى, ال بۇكىل كەزەڭدەگى ينفلياتسيا 925,20%.
ەسكە سالايىق, قازاقستاندا ينفلياتسيا دەڭگەيىن ەسكەرە وتىرىپ, مىندەتتى زەينەتاقى جارنالارىنىڭ ساقتالۋىنا بىرەگەي كەپىلدىك بەرىلەدى. سالىمشىنىڭ تولەمگە قۇقىعى باستالعان كەزدە جيناقتالعان كىرىستىلىگىنە كەرى اسەرىن تيگىزگەن جەكەلەگەن كەزەڭدەردەگى كىرىستىلىكتىڭ تومەندەۋى جاعدايىندا ايىرمانىڭ وتەماقىسىنا مەملەكەت كەپىلدىك بەرەدى.
زەينەتاقى اكتيۆتەرىن ينۆەستيتسيالىق باسقارۋ مەن ەسەپكە الۋ جۇيەسى تولىقتاي اشىق: ءاربىر سالىمشىنىڭ enpf.kz سايتىنداعى نەمەسە ۇيالى قوسىمشاداعى جەكە كابينەتىنەن ءوزىنىڭ ينۆەستيتسيالىق كىرىسىن كورۋگە مۇمكىندىگى بار.
بجزق زەينەتاقى اكتيۆتەرىن ينۆەستيتسيالىق باسقارۋ جانە ولار ورنالاستىرىلعان قارجى قۇرالدارى تۋرالى اقپارات قوردىڭ enpf.kz رەسمي سايتىنداعى «ستاتيستيكا جانە اناليتيكا/زەينەتاقى اكتيۆتەرىن ينۆەستيتسيالىق باسقارۋ» بولىمىندە جاريالانادى.
