بىلتىر قىركۇيەك ايىندا باستالعان جوباعا «Institute of Smart Systems and Artificial Intelligence», ا.بايتۇرسىن ۇلى اتىنداعى ءتىل ءبىلىمى ينستيتۋتى, اقپاراتتىق جانە ەسەپتەۋ تەحنولوگيالارى ينستيتۋتى, ء«تىل-قازىنا» ۇلتتىق عىلىمي-پراكتيكالىق ورتالىعى جانە «Softcraft» كومپانياسى اتسالىسقان.
– جوبا اياسىندا قازاق تىلىندە جوعارى ءونىمدى ۇلكەن تىلدىك مودەل ازىرلەۋگە باعىتتالعان عىلىمي-تەحنيكالىق باعدارلاما جۇزەگە اسىپ جاتىر. بۇگىنگە دەيىن قاجەتتى ءماتىن كورپۋستارى جيناقتالدى, تاڭبالاۋ قۇرالدارى جاسالدى, مودەل ازىرلەنىپ, وڭتايلاندىرىلدى, ونى ورنالاستىرۋعا ارنالعان ينفراقۇرىلىم دايىندالدى. مۇندا دەرەكتەردىڭ ەتيكاسى مەن قاۋىپسىزدىگى باستى نازاردا بولدى. ناتيجەسىندە, 100 ميلليوننان استام سوزدەن تۇراتىن ۇلكەن دەرەكتەر قورى قۇرىلدى. ونىڭ ىشىندە ءتۇرلى سالا مەن جانردى قامتيتىن تاقىرىپ كورپۋستارى, ءماتىن, سۋرەت, اۋديو فورماتىنداعى مۋلتيمودالدى مالىمەتتەر, رەسمي قۇجاتتار مەن ينتەراكتيۆتى ستسەناريلەر جيناقتارى بار. جوبانىڭ ماڭىزدى جەتىستىكتەرىنىڭ ءبىرى جوعارى ءونىمدى ەسەپتەۋ ينفراقۇرىلىمىنىڭ ىسكە قوسىلۋى. ۋنيۆەرسيتەتكە «NVIDIA DGX H200» جاساندى ينتەللەكت كلاستەرى ساتىپ الىندى, – دەدى قازۇۋ عىلىمي-يننوۆاتسيالىق قىزمەت جونىندەگى پرورەكتورى مارعۇلان يبراگيموۆ.
قازۇۋ بازاسىندا «LLM» نەگىزىندە بىرقاتار ارنايى AI-اگەنتتەر جاسالعان. ولار ءماتىندى تالداۋ, جاۋاپ گەنەراتسياسى, اۆتوماتتى كلاسسيفيكاتسيا جانە ينتەللەكتۋالدى پايدالانۋشىنىڭ قولداۋ باعىتتارىنا بەيىمدەلگەن. الداعى ۋاقىتتا قازاق تىلىندەگى ءبىلىم بەرۋ جانە زەرتتەۋ باعىتىنداعى ينتەللەكتۋالدى اگەنتتەر مەن چات-بوتتاردى ازىرلەۋ جوسپارلانىپ وتىر. كەلەر جىلى جوبانى كەڭەيتۋ, جاڭا تاقىرىپ كورپۋستارىن ازىرلەۋ, ينتەرنەت-پلاتفورمانى ىسكە قوسۋ, LLM-ءدى قولدانبالى جۇيەلەرگە ينتەگراتسيالاۋ جانە ارنايى قازاقتىلدى چات-بوتتاردى ازىرلەۋ جوسپاردا تۇر.
Nazarbayev University اقىلدى جۇيەلەر جانە جاساندى ينتەللەكت ينستيتۋتىنىڭ (ISSAI) نەگىزىن قالاۋشى ءارى ديرەكتورى اتاكان ۆارول ەلىمىزدەگى جاساندى ينتەللەكت گەنەراتيۆتى مودۋلدەرىن ازىرلەۋ سالاسىنداعى زەرتتەۋلەر, سماترتفون, نوۋتبۋكتە جۇمىس ىستەي بەرەتىن جاڭا تىلدىك-ۆيزۋالدى مودەلدەر تۋرالى ايتىپ بەردى.
– قازاقستاندا مەملەكەتتىك تىلمەن قاتار ورىس جانە اعىلشىن تىلدەرى كەڭ قولدانىلادى. سونداي-اق ەلدە ءتۇرلى ەتنوستاردىڭ تىلدەرى دە بار. گەنەراتيۆتى جاساندى ينتەللەكت داۋىرىندە وسى تىلدىك ارتۇرلىلىكتى ەسكەرەتىن, قازاق ءتىلىن جاقسى تۇسىنەتىن, ورىس جانە اعىلشىن تىلدەرىمەن جۇمىس ىستەي الاتىن ءىرى تىلدىك جانە تىلدىك-ۆيزۋالدى مودەلدەر ازىرلەۋ قاجەتتىگى تۋىندادى. ويتكەنى قازىرگى الەمدە وسىنداي تەحنولوگيالاردى دامىتپاعان ەلدەر ءوز ءتىلىنىڭ تسيفرلىق كەڭىستىكتەگى ورنىن السىرەتىپ, ءتىپتى جوعالتىپ الۋ قاۋپىنە تاپ بولۋى مۇمكىن. بۇگىندە قازاقستاننىڭ اكادەميالىق قاۋىمداستىعى وسى جاۋاپكەرشىلىكتى سەزىنىپ, بەلسەندى جۇمىس ىستەپ جاتىر. بۇل – قازاق ءتىلىنىڭ تسيفرلىق بولاشاعى ءۇشىن ماڭىزدى قادام, – دەيدى اتاكان ۆارول.
الماتى
