بۇل – بيىل Disney-ءدىڭ قازاق تىلىندە «سويلەتكەن» ءتورتىنشى ءفيلمى. فيلمدەردى ءتۇرلى ەلدەرگە بەيىمدەپ, دۋبلياجداۋ – Disney كومپانياسىندا بۇرىننان قالىپتاسقان ءۇردىس. Disney جىل سايىن ءار ءفيلمنىڭ ءتۇرلى تىلدەردەگى 40-قا جۋىق نۇسقاسىن دايىندايدى. «قازاق ءتىلى» قوعامىنىڭ ۇيىتقى بولۋىمەن بىلتىردان باستاپ ءىرى حالىقارالىق ستۋديالار الەمدىك پرەمەرالارىن قازاق تىلىندە ۇسىنا باستادى. وسى باستاما اياسىندا Disney ستۋدياسى 2024 جىلى «ويجۇمباق 2», «موانا 2», «مۋفاسا. ارىستان پاتشا» دەپ اتالاتىن ءۇش ءفيلمىن قازاق تىلىنە اۋدارىپ, دۋبلياج جۇمىستارىن قارجىلاندىردى. بيىل «اقشاقار», «ليلو مەن ستيچ», «ەليو» تۋىندىسى ۇسىنىلدى.
كورسەتىلىمگە دۋبلياج اكتەرلارىنىڭ تولىق قۇرامى مەن تانىمال تۇلعالار كەلدى. مۋلفيلمدە اكتريسا جانە ءانشى سابيرا جاراسقىزى دجۋدي حوپپستىڭ, تەاتر جانە كينو اكتيورى باقىتجان الپەيىس ميلتون رىcەۆيچتىڭ, تەاتر جانە كينو اكتيورى اسان ءماجيت بوگو باسەكەنىڭ (كاپيتان بۋيۆولسون), تەاتر جانە كينو اكتيورى ەركەبۇلان دايىروۆ ءداۋ مىرزانىڭ (ميستەر بيگ) داۋىسىن دىبىستادى.
«ەندى «اڭدار شاھارى» سىندى تانىمال تۋىندىنىڭ ەكىنشى ءبولىمى قازاق تىلىندە كورسەتىلەدى. بۇل ءبىزدىڭ مادەني كەڭىستىگىمىزدەگى ۇلكەن وزگەرىستەردى كورسەتەتىن ماڭىزدى وقيعا. الەمدىك دەڭگەيدەگى كونتەنتتى قازاقشا تاماشالاۋ قالىپتى ءارى تاماشا داستۇرگە اينالىپ كەلەدى. بۇل انيماتسيالىق فيلم الەمنىڭ قىرىققا جۋىق تىلىنە اۋدارىلدى. قازاق ءتىلى وسى ءىرى تىلدەرمەن ءبىر قاتاردا تۇر. Disney سەكىلدى الەمدىك ستۋديالاردىڭ ءوز تۋىندىسىن قازاقشا سويلەتۋى – ءبىزدىڭ قوعامنىڭ مادەني تالعامىنىڭ جانە تىلگە دەگەن جاڭا ۇستانىمنىڭ ناتيجەسى. ءدال وسىنداي جوبالار ءتىلىمىزدىڭ تابيعي ورتاسىن كەڭەيتۋگە زور ىقپال ەتەدى», دەيدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
