وقۋ-اعارتۋ مينيسترلىگىنىڭ مالىمەتىنشە, زەرتتەۋ ءداستۇرلى PISA ادىستەمەسىنە نەگىزدەلگەن جانە وقۋ ساۋاتتىلىعى, ماتەماتيكا, جاراتىلىستانۋ عىلىمدارى بويىنشا فۋنكتسيونالدىق ساۋاتتىلىقتىڭ نەگىزگى داعدىلارىن باعالايدى. سونىمەن قاتار بۇل زەرتتەۋ ارقىلى ءبىلىم بەرۋ ۇيىمدارىنا سىرتقى باعالاۋ جۇرگىزىلەدى. ونىڭ ناتيجەلەرى وقۋشىلاردىڭ وقۋ ۇلگەرىمىنە اسەر ەتەتىن نەگىزگى فاكتورلاردى انىقتاۋعا باعىتتالعان.
«مەكتەپتەرگە ارنالعان PISA زەرتتەۋى جىل سايىن جۇزەگە اسىرىلادى. ءداستۇرلى PISA زەرتتەۋىنەن ايىرماشىلىعى, ول ءار مەكتەپ بويىنشا سىرتقى باعالاۋ جۇرگىزە وتىرىپ, ناتيجەسىندە ءبىلىم بەرۋ ۇيىمدارىنىڭ باسشىلارىنا وقۋ ورىندارىنىڭ كۇشتى جانە ءالسىز جاقتارىن انىقتاۋعا مۇمكىندىك بەرەتىن ەسەپتەر جولدانادى. بۇل ءاربىر ءبىلىم بەرۋ ۇيىمىنا ءبىلىم بەرۋ پروتسەسىن جاقسارتۋعا ىقپال ەتەتىن قاجەتتى شارالاردى قابىلداۋعا كومەكتەسەدى», دەپ اتاپ ءوتتى ءبىلىم بەرۋ سالاسىندا ساپانى قامتاماسىز ەتۋ كوميتەتىنىڭ توراعاسى سەرىك ءاشىروۆ.
ايتا كەتۋ كەرەك, «مەكتەپتەرگە ارنالعان PISA» زەرتتەۋىن ەكونوميكالىق ىنتىماقتاستىق جانە دامۋ ۇيىمى جۇرگىزەدى. وعان 2021-2024 جىلدار ارالىعىندا ەلىمىزدىڭ 3000-نان استام ءبىلىم بەرۋ ۇيىمدارى قاتىستى. زەرتتەۋدىڭ قازاقستانداعى ۇيلەستىرۋشىسى – ا. بايتۇرسىن ۇلى اتىنداعى ۇلتتىق زەرتتەۋلەر جانە ءبىلىمدى باعالاۋ ورتالىعى.
