فوتو: shyndyq.kz
تۇرعىنداردىڭ جارتىسىنان استامى (51,1%) ChatGPT, Google Gemini, Midjourney جانە باسقا دا جاساندى ينتەللەكت تەحنولوگيالارىن قولدانادى.
جاساندى ينتەللەكتىنى ەڭ بەلسەندى قولداناتىندار جاستار: 18-29 جاس ارالىعىنداعى رەسپوندەنتتەردىڭ 76,2%-ى جاساندى ينتەللەكت سەرۆيستەرىن پايدالانادى. 30-45 جاستا بۇل كورسەتكىش 57,1%-عا دەيىن تومەندەيدى. جاس ۇلعايعان سايىن تەحنولوگيانى قولدانۋ دەڭگەيى بىرتىندەپ ازايادى: 46-60 جاس توبىندا 37,5%, ال 61 جاستان اسقان ازاماتتار اراسىندا – 16,6%.
جاستار مۇنداي تسيفرلىق قۇرالداردى كوبىنە وقۋ ۇردىسىنە جانە ءوزىن-ءوزى دامىتۋ ءۇشىن (48,7%), سونداي-اق ماتىندەرمەن جۇمىس ىستەۋگە (44,2%) پايدالانادى. ورتا جاستاعى رەسپوندەنتتەردىڭ نەگىزگى سۇرانىستارى دا وسى باعىتتارمەن سايكەس كەلەدى: ءبىلىم الۋ جانە ماتىندىك مىندەتتەر باستى قاجەتتىلىكتەردىڭ قاتارىندا تۇر. ال 61 جاستان اسقان ازاماتتار ءۇشىن جاساندى ينتەللەكت سەرۆيستەرى كوبىنە اقپارات ىزدەۋدىڭ قۇرالىنا اينالعان: بۇل توپتىڭ 40,8%-ى جي ەڭ الدىمەن قاراپايىم ىزدەۋ جۇيەسى رەتىندە قولدانادى.
گەندەرلىك جانە الەۋمەتتىك-دەموگرافيالىق ايىرماشىلىقتار دا ايقىن بايقالادى. ايەلدەر تسيفرلىق سەرۆيستەردى ەرلەرگە قاراعاندا ءجيى قولدانادى (54,6% جانە 46,6%). سونداي-اق قالا تۇرعىندارى اۋىلدىق جەرلەرمەن سالىستىرعاندا جاساندى ينتەللەكتتى بەلسەندىرەك پايدالانادى: تيىسىنشە 53,2% جانە 47,9%. بۇل ايىرماشىلىق كوبىنە قالالارداعى تسيفرلىق ينفراقۇرىلىمنىڭ كەڭىرەك قولجەتىمدىلىگىمەن تۇسىندىرىلەدى.
ءبىلىم دەڭگەيى دە تسيفرلىق قۇرالداردى قولدانۋداعى ماڭىزدى فاكتورلاردىڭ ءبىرى. جوعارى ءبىلىمدى رەسپوندەنتتەر (64,2%) مەن ورتا ءبىلىمدى ازاماتتار (37,7%) اراسىنداعى الشاقتىق 1,7 ەسەگە دەيىن جەتەدى. بۇل جاڭا تەحنولوگيالاردى مەڭگەرۋ ءۇشىن ءبىلىم مەن دايىندىقتىڭ شەشۋشى ءرولىن كورسەتەدى. سونداي-اق ءبىلىم دەڭگەيى مەن تسيفرلىق قۇزىرەتتىلىك اراسىنداعى بايلانىس تا ايقىن كورىنەدى: ءبىلىم دەڭگەيى جوعارىلاعان سايىن زاماناۋي تەحنولوگيالاردى كۇندەلىكتى ومىرگە ەنگىزۋگە دەگەن دايىندىق تا ارتا تۇسەدى.
ايتا كەتەلىك, الەۋمەتتانۋلىق ساۋالناما قسزي تاپسىرىسىمەن بيىلعى 3 قازان مەن 5 قاراشا ارالىعىندا جۇرگىزىلىپ, ىرىكتەمە كولەمى 8 000 رەسپوندەنتتى قۇراعان. ساۋالناماعا 17 وبلىس پەن استانا, الماتى, شىمكەنت قالالارىنىڭ 18 جاستان اسقان رەسپوندەنتتەرى قاتىسقان.
